കൊച്ചി: സോളാര് പീഡനക്കേസില് സര്ക്കാരിനെ വെട്ടിലാക്കി ക്രൈംബ്രാഞ്ച് റിപ്പോര്ട്ട്. കേസില് മുന് മുഖ്യമന്ത്രി ഉമ്മന് ചാണ്ടിക്കെതിരേ തെളിവില്ലെന്ന് ക്രൈംബ്രാഞ്ച് റിപ്പോര്ട്ടില് പറയുന്നു. വിവരാവകാശ നിയമപ്രകാരം ലഭിച്ച ആഭ്യന്തര വകുപ്പിന്റെ റിപ്പോര്ട്ടിന്റെ വിശദാംശങ്ങളാണ് പുറത്തുവന്നിരിക്കുന്നത്.
പരാതിക്കാരി പറഞ്ഞ ദിവസം ഉമ്മന് ചാണ്ടി ക്ലിഫ് ഹൗസില് ഇല്ലായിരുന്നു. പരാതിക്കാരി ക്ലിഫ് ഹൗസില് വന്നതിന് തെളിവില്ലെന്നും ആഭ്യന്തര-അഡീഷനല് ചീഫ് സെക്രട്ടറിയുടെ റിപ്പോര്ട്ടില് വ്യക്തമാക്കുന്നു.
ഡ്യൂട്ടിയിലുണ്ടായിരുന്ന പോലീസുകാരെയും പേഴ്സണല് സ്റ്റാഫിനെയും ക്രൈംബ്രാഞ്ച് വിശദമായി ചോദ്യം ചെയ്തിരുന്നതായും റിപ്പോര്ട്ടില് പറയുന്നു. സോളാര്കേസ് സംസ്ഥാന സര്ക്കാര് സിബിഐക്ക് കൈമാറിയിരുന്നു. ക്രൈംബ്രാഞ്ച് അന്വേഷണ റിപ്പോര്ട്ട് കേന്ദ്ര ആഭ്യന്തര മന്ത്രാലയത്തിന് അയച്ചു നല്കുകയും ചെയ്തു.