തിരുവനന്തപുരം തൈക്കാട് പോലീസ് ട്രെയിനിങ് കോളേജിലെ പരേഡ് ഗ്രൗണ്ടിൽ പരിശീലനത്തിനിടെ അപ്രതീക്ഷിത അതിഥിയായെത്തിയ പാമ്പ് പോലീസുകാരെ അല്പനേരം പരിഭ്രാന്തിയിലാഴ്ത്തി. കൃത്യമായ ചുവടുവെപ്പുകളുമായി പരേഡ് നടത്തിക്കൊണ്ടിരുന്ന പോലീസുകാരുടെ ഇടയിലേക്കാണ് ഒരു വലിയ ചേരപ്പാമ്പ് ഇഴഞ്ഞെത്തിയത്. പാമ്പിനെ കണ്ടതോടെ അച്ചടക്കത്തോടെ നീങ്ങിയിരുന്ന പോലീസുകാർ ചിതറിയോടുന്ന ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്.
ഗ്രൗണ്ടിന് നടുവിലൂടെ പോലീസുകാരുടെ ഇടയിലൂടെ പാമ്പ് ഭയമില്ലാതെ ഇഴഞ്ഞുനീങ്ങുന്നതും, വരി തെറ്റിച്ച് ഉദ്യോഗസ്ഥർ സുരക്ഷിത സ്ഥാനത്തേക്ക് മാറുന്നതും ദൃശ്യങ്ങളിൽ വ്യക്തമാണ്. എന്നാൽ പരേഡ് ഗ്രൗണ്ടിലുണ്ടായ ബഹളങ്ങളൊന്നും തന്നെ ബാധിക്കില്ലെന്ന മട്ടിൽ ശാന്തനായാണ് ചേര കടന്നുപോയത്.
സംസ്ഥാനത്ത് വേനൽച്ചൂട് കടുത്തതോടെ പാമ്പുകൾ മാളങ്ങളിൽ നിന്ന് പുറത്തിറങ്ങുന്നത് പതിവായിരിക്കുകയാണ്. ജനവാസ മേഖലകളിലും പൊതുസ്ഥലങ്ങളിലും പാമ്പുകളുടെ സാന്നിധ്യം വർധിക്കുന്നത് ആശങ്കയുണ്ടാക്കുന്നുണ്ടെങ്കിലും, ട്രെയിനിങ് കോളേജിലെ ഈ സംഭവം ഉദ്യോഗസ്ഥർക്കിടയിൽ ചെറിയൊരു പരിഭ്രാന്തിക്കും പിന്നാലെ കൗതുകത്തിനും കാരണമായി. മുമ്പും സമാനമായ രീതിയിൽ ഗ്രൗണ്ടുകളിൽ പാമ്പുകളെ കണ്ടെത്തിയിട്ടുണ്ടെങ്കിലും, പരേഡിനിടയിലുള്ള ഈ “കടന്നുകയറ്റം” സോഷ്യൽ മീഡിയയിലും ശ്രദ്ധ നേടുകയാണ്.
A large rat snake caused panic at the Thycaud Police Training College parade ground in Thiruvananthapuram during an ongoing training session. Viral footage shows disciplined police officers scattering in different directions as the snake slithered into the middle of their parade formation. The non-venomous snake eventually retreated into nearby bushes without causing any injuries, leaving the trainees with a surprising and humorous memory of their drill.