അടിമാലി:പ്രണയത്തില്‍ നിന്ന് പിന്മാറിയ യുവാവിന്റെ മുഖത്ത് ആസിഡ് ഒഴിച്ച സംഭവത്തില്‍ അറസ്റ്റിലായ ഷീബ(35)യെ കോട്ടയം വനിത ജയിലിലേക്ക് മാറ്റി.
ഫെയ്‌സ്ബുക്കിലൂടെ പരിചയപ്പെട്ട് പ്രണയത്തിലായ തിരുവനന്തപുരം പൂജപ്പുര അര്‍ച്ചന ഭവനില്‍ അരുണ്‍ കുമാറിനാണ്(27) ആസിഡ് ആക്രമണത്തില്‍ ഗുരുതരമായി പരിക്കേറ്റത്. ഇരുമ്ബുപാലത്തേക്ക് വിളിച്ച്‌ വരുത്തിയ ശേഷം ഷീബ അരുണിന്റെ മുഖത്ത് ആസിഡ് ഒഴിക്കുകയായിരുന്നു. ഇവിടുത്തെ പള്ളിയില്‍ സ്ഥാപിച്ചിട്ടുള്ള സിസിടിവി ക്യാമറ ദൃശ്യങ്ങളില്‍ ഷീബ അരുണിന്റെ മുഖത്ത് ആസിഡ് ഒഴിക്കുന്നത് വ്യക്തമാണ്.
ഷീബയും അരുണും രണ്ട് വര്‍ഷം മുന്‍പാണ് പ്രണയത്തിലായത്. ഇതിന് പിന്നാലെ ഷീബ ഹോം നഴ്‌സായി തിരുവനന്തപുരത്ത് ജോലിക്ക് കയറി. ഇരുവരും തമ്മിലുള്ള ബന്ധം ഇവിടെ വച്ച്‌ കൂടുതല്‍ ശക്തമായി. അഞ്ച് മാസം മുന്‍പ് മകള്‍ ആത്മഹത്യ ചെയ്തതോടെയാണ് ഷീബ തിരുവനന്തപുരത്തെ ജോലി അവസാനിപ്പിച്ച്‌ വീണ്ടും നാട്ടിലെത്തുന്നത്. എങ്കിലും ഷീബ അരുണുമായുള്ള പ്രണയബന്ധം തുടര്‍ന്നു. അടുത്തിടെയാണ് ഷീബ വിവാഹിതയാണെന്നും കുട്ടികളുണ്ടെന്നുമുള്ള വിവരം അരുണ്‍ മനസിലാക്കുന്നത്. ഇതോടെ ബന്ധം പിരിയാന്‍ തീരുമാനിക്കുകയായിരുന്നു.
പ്രണയം മുന്നോട്ട് കൊണ്ടു പോകണമെന്നും, വിവാഹം ചെയ്യണമെന്നും ഷീബ ആവശ്യപ്പെട്ടെങ്കിലും അരുണ്‍ സമ്മതിച്ചില്ല. മറ്റൊരു വിവാഹത്തിന് അരുണ്‍ തയ്യാറെടുക്കുന്നുവെന്ന വിവരം ലഭിച്ചതോടെയാണ് ആസിഡ് ആക്രമണം നടത്താന്‍ ഷീബ മുതിര്‍ന്നതെന്ന് പോലീസ് പറഞ്ഞു. മുരിക്കാശേരിയിലുള്ള ഭര്‍ത്താവിന്റെ വീട്ടില്‍ നിന്നാണ് ആസിഡ് എത്തിച്ചതെന്നും ഷീബ മൊഴി നല്‍കിയിട്ടുണ്ട്.
