വയനാട്: വയനാട്ടില് കഞ്ചാവ് മിഠായി പിടികൂടി. ബത്തേരിയിലെ കോളേജ് വിദ്യാര്ത്ഥിയില് നിന്നുമാണ് കഞ്ചാവ് അടങ്ങിയ മിഠായി പിടികൂടിയത്. ഓണ്ലൈനില് നിന്നുമാണ് മിഠായി വാങ്ങിയതെന്ന് പൊലീസ് പറഞ്ഞു. ഇക്കഴിഞ്ഞ രണ്ട് ദിവസങ്ങളിലായാണ് വിദ്യാര്ത്ഥികളില് നിന്നും ഇത്തരത്തില് മിഠായികള് കണ്ടെടുത്തത്.
കഴിഞ്ഞ മൂന്ന് മാസമായി ഓണ്ലൈനിലൂടെ വാങ്ങിയ മിഠായി വിദ്യാര്ത്ഥി മറ്റ് വിദ്യാര്ത്ഥികള്ക്കിടയില് വില്പ്പന നടത്തുന്നുണ്ടെന്നും പൊലീസ് കണ്ടെത്തി. അതേസമയം സംഭവത്തില് പൊലീസ് വിദ്യാര്ത്ഥിക്കെതിരെ കേസെടുത്തു. സംശയാസ്പദമായ സാഹചര്യത്തില് കണ്ട വിദ്യാര്ത്ഥികളെ ചോദ്യം ചെയ്തപ്പോഴാണ് കഞ്ചാവ് മിഠായി കണ്ടെത്തിയത്. മറ്റൊരു വിദ്യാര്ത്ഥിയാണ് നല്കിയതെന്ന് ഇവര് മൊഴി നല്കി.
തുടര്ന്ന് നടത്തിയ അന്വേഷണത്തില് വിദ്യാര്ത്ഥികളില് ഒരാളാണ് ഓണ്ലൈനിലൂടെ വാങ്ങി മുപ്പത് രൂപ നിരക്കില് കഞ്ചാവ് മിഠായി വില്പ്പന നടത്തിയതെന്ന് വ്യക്തമായതായി പൊലീസ് പറഞ്ഞു. വിദ്യാര്ത്ഥികള്ക്കെതിരെ എന്ഡിപിഎസ് വകുപ്പ് പ്രകാരം കേസെടുത്തിട്ടുണ്ട്.