CRIME 🦹മസാജ് പാർലറിലെ അടിപിടിക്കിടെ മൊബൈൽ നഷ്ടമായി,അന്വേഷണമെത്തിയത് പെണ്‍വാണിഭകേന്ദ്രത്തില്‍,യുവതിയടക്കം പിടിയില്‍

കോഴിക്കോട്: കോവൂർ നെയ്ത്തുകുളങ്ങര റോഡിലെ ഫ്‌ളാറ്റ് കേന്ദ്രീകരിച്ച് പെൺവാണിഭം നടത്തിവന്ന സംഘത്തെ പൊലീസ് പിടികൂടി. മൂന്നുമാസത്തിലേറെയായി ഇവിടെ പെൺവാണിഭം നടത്തുകയായിരുന്നു സംഘം. ടൗൺ പൊലീസ് പരിധിയിലെ മസാജ് പാർലറിൽ കഴിഞ്ഞദിവസം നടന്ന അടിപിടിയുമായാണ് പൊലീസിന് തുമ്പായത്.

പ്രധാന നടത്തിപ്പുകാരനായ കൊടുവള്ളി വാവാട് കത്തലാംകുഴിയിൽ ടി പി ഷമീർ (29), ഇയാളുടെ കൂട്ടാളി കർണാടക വിരാജ്പേട്ട സ്വദേശിനി ആയിഷ എന്ന ബിനു (32), ഇവിടെ ഇടപാടുകാരനായി എത്തിയ തമിഴ്‌നാട് കരൂർ സ്വദേശി വെട്രിശെൽവൻ (28) എന്നിവരാണ് ഫ്‌ളാറ്റിൽ നടത്തിയ റെയ്ഡിൽ മെഡിക്കൽ കോളേജ് പൊലീസിന്റെ പിടിയിലായത്. നേപ്പാൾ, തമിഴ്‌നാട് സ്വദേശികളായ രണ്ടു യുവതികളെയും ഫ്‌ളാറ്റിൽനിന്ന് കസ്റ്റഡിയിലെടുത്തു. ഇവരെ കോടതിയിൽ ഹാജരാക്കിയശേഷം സർക്കാർ മഹിളാമന്ദിരത്തിലേക്കു മാറ്റി.

ടൗൺ പൊലീസ് പരിധിയിലെ മസാജ് പാർലറിലെ അടിപിടിക്കിടെ ഇടപാടുകാരന്റെ ഫോൺ നഷ്ടപ്പെട്ടിരുന്നു. ഇതുസംബന്ധിച്ച് അന്വേഷണം നടത്തുമ്പോഴാണ് കോവൂരിലെ ഫ്‌ളാറ്റിലെ പെൺവാണിഭത്തെക്കുറിച്ച് സൂചന ലഭിച്ചത്. ഈ കേസിലെ പ്രതികൾ ഫ്‌ളാറ്റിലെ നിത്യസന്ദർശരാണ്. പെൺവാണിഭകേന്ദ്രത്തിൽ ഇതരസംസ്ഥാനങ്ങളിൽനിന്ന് പെൺകുട്ടികൾ എത്താറുണ്ടെന്നും ഇവിടെനിന്ന് ഇവരെ മറ്റുപല സ്ഥലങ്ങളിലേക്കും കൊണ്ടുപോകാറുണ്ടെന്നും പൊലീസ് തിരിച്ചറിഞ്ഞു. ഇതോടെയായിരുന്നു റെയ്ഡ്.

ജാർഖണ്ഡ്, ഉത്തരാഖണ്ഡ്, ഒഡീഷ, നേപ്പാൾ എന്നിവിടങ്ങളിൽ നിന്നെത്തുന്ന തൊഴിലാളികളുടെ സഹായത്തോടെ യുവതികളെ ഫ്‌ളാറ്റിലെത്തിക്കാറുണ്ടെന്നതിന്റെ തെളിവുകൾ പൊലീസിനു ലഭിച്ചിട്ടുണ്ട്. ഇതുസംബന്ധിച്ച് കൂടുതൽ അന്വേഷണം നടത്തുമെന്ന് അസിസ്റ്റന്റ് കമ്മീഷണർ കെ. സുദർശൻ പറഞ്ഞു.

ഇൻസ്പെക്ടർ ബെന്നി ലാലു, എസ്ഐ സദാനന്ദൻ, സീനിയർ സിപിഒ ബിന്ദു, സിപിഒമാരായ വിനോദ് കുമാർ, പ്രജീഷ്, ശ്രീലേഷ് എന്നിവരുൾപ്പെട്ട സംഘമാണ് റെയ്ഡ് നടത്തിയത്.