ഡല്ഹി : മുതിര്ന്ന പൗരന്മാര്ക്കുള്ള കോവിഡ് വാക്സിനേഷന് മാര്ച്ച് ഒന്നു മുതല് ആരംഭിക്കുമെന്ന് കേന്ദ്ര സര്ക്കാര്. മന്ത്രിസഭാ യോഗ തീരുമാനങ്ങള് വിശദീകരിച്ച് നടത്തിയ വാര്ത്താ സമ്മേളനത്തില് കേന്ദ്രമന്ത്രി പ്രകാശ് ജാവഡേക്കറാണ് ഇക്കാര്യം അറിയിച്ചത്. സര്ക്കാര്, സ്വകാര്യ ആശുപത്രികളില് നിന്ന് വാക്സിന് ലഭിക്കും. സര്ക്കാര് ആശുപത്രികളില് വാക്സിന് സൗജന്യമായിരിക്കുമെന്നും അദ്ദേഹം പറഞ്ഞു.
സര്ക്കാര്, സ്വകാര്യ ആശുപത്രികള് മുഖേനയാണ് വാക്സിനേഷന് നടത്തുക. 10000 സര്ക്കാര് ആശുപത്രികളും 20000 സ്വകാര്യ ആശുപത്രികളുമാണ് വാക്സിനേഷന് സെന്ററുകളായി പ്രവര്ത്തിക്കുക. 60 വയസിന് മുകളിലുള്ളവര്ക്ക് പുറമേ മറ്റു രോഗങ്ങള് അലട്ടുന്ന 45 വയസിന് മുകളില് പ്രായമുള്ളവര്ക്കും ഈ ഘട്ടത്തില് വാക്സിന് വിതരണം ചെയ്യുമെന്നും പ്രകാശ് ജാവഡേക്കര് പറഞ്ഞു.
നിലവില് രാജ്യത്ത് ഒന്നേകാല് കോടി ജനങ്ങളാണ് വാക്സിന് സ്വീകരിച്ചത്. കൃത്യമായി പറഞ്ഞാല് 1,21,65,598 പേര് വാക്സിന് സ്വീകരിച്ചതായി സര്ക്കാര് കണക്കുകള് വ്യക്തമാക്കുന്നു.