ന്യൂയോര്ക്ക്: കൃത്രിമബുദ്ധി (AI) സാങ്കേതികവിദ്യ ഉപയോഗിക്കുന്ന സ്ഥാപനങ്ങളും കോർപ്പറേറ്റ് കമ്പനികളും അറിയാതെ തന്നെ വലിയൊരു വില കൊടുക്കേണ്ടി വരുന്നുവെന്ന നിർണ്ണായക മുന്നറിയിപ്പുമായി മൈക്രോസോഫ്റ്റ് ചീഫ് എക്സിക്യൂട്ടീവ് ഓഫീസര് സത്യ നദെല്ല രംഗത്ത്. എ.ഐ സേവനങ്ങൾക്കായി പണം നല്കുന്നതിന് പുറമെ, കമ്പനികളുടെ ഏറ്റവും വലിയ ആസ്തിയായ സ്വന്തം രഹസ്യവിവരങ്ങളും സാങ്കേതിക വിജ്ഞാനവുമാണ് (IP) അറിയാതെ കൈമാറേണ്ടി വരുന്നതെന്ന് അദ്ദേഹം ചൂണ്ടിക്കാട്ടി. തന്റെ വ്യക്തിഗത ബ്ലോഗിലൂടെയായിരുന്നു എ.ഐ സാങ്കേതികവിദ്യയുടെ ലോകത്തെ ഏറ്റവും വലിയ തലവന്മാരിൽ ഒരാളായ സത്യ നദെല്ലയുടെ ഈ ഞെട്ടിക്കുന്ന തുറന്നുപറച്ചില്. ആഗോളതലത്തിൽ എ.ഐ കമ്പനികൾ ഉപയോക്താക്കളുടെ ഡാറ്റ കൈകാര്യം ചെയ്യുന്നതിനെക്കുറിച്ച് വലിയ ചർച്ചകൾ നടക്കുന്ന പശ്ചാത്തലത്തിലാണ് ഈ പുതിയ പ്രസ്താവന.
നൊബേല് സമ്മാന ജേതാവായ സാമ്പത്തിക ശാസ്ത്രജ്ഞന് കെന്നത്ത് ആരോയുടെ പ്രശസ്തമായ ‘ഇന്ഫര്മേഷന് പാരഡോക്സ്’ (Information Paradox) തിയറിയെ ഉദ്ധരിച്ചാണ് നദെല്ല ഈ സങ്കീർണ്ണമായ വിഷയം വിശദീകരിച്ചത്. എ.ഐ യുഗത്തില് ഈ സിദ്ധാന്തത്തിന് നേരെ തിരിച്ചാണ് കാര്യങ്ങൾ സംഭവിക്കുന്നതെന്ന് അദ്ദേഹം വ്യക്തമാക്കി. ഒരു എ.ഐ ഉല്പ്പന്നം കൃത്യമായി ഉപയോഗിക്കാന് വേണ്ടി വാങ്ങുന്നയാള് സ്വന്തം വിവരങ്ങള് വില്ക്കുന്നയാള്ക്ക് നിരന്തരം നല്കേണ്ടി വരുന്ന സാഹചര്യമാണ് ഇപ്പോഴുള്ളത്. എ.ഐ മോഡലുകളുടെ പ്രകടനം മെച്ചപ്പെടുത്താൻ വേണ്ടി കമ്പനികള് കൂടുതൽ കൂടുതൽ വിവരങ്ങള് അതിലേക്ക് നൽകും; എന്നാൽ കാലക്രമേണ, സേവനം നല്കുന്ന എ.ഐ കമ്പനി ഉപയോക്താക്കളെക്കുറിച്ച് എല്ലാം പഠിച്ചെടുക്കുമെങ്കിലും ഉപയോക്താവിന് തിരിച്ചുള്ള വിവര ലഭ്യത വളരെ കുറവായിരിക്കുമെന്നും നദെല്ല വ്യക്തമാക്കുന്നു.
ഓരോ സ്ഥാപനത്തിലെയും ജീവനക്കാര് എ.ഐ ടൂളുകൾക്ക് നല്കുന്ന കമാന്ഡുകള് (Prompts), എ.ഐ വരുത്തുന്ന തെറ്റുകളുടെ തിരുത്തലുകള്, നിർമ്മിച്ച് നൽകുന്ന പ്രത്യേക പ്രവർത്തനരീതികൾ എന്നിവയെല്ലാം ആ സ്ഥാപനത്തിന്റെ മാത്രം വിലയേറിയ ബൗദ്ധിക സ്വത്താണ്. പുതിയ സാങ്കേതികവിദ്യ ഉപയോഗിക്കുന്നതിലൂടെ ഇത് മറ്റാരുമറിയാതെ എ.ഐ കമ്പനികള്ക്ക് വലിയ തോതിൽ കൈമാറാന് ഇടവരരുതെന്ന് അദ്ദേഹം മുന്നറിയിപ്പ് നൽകുന്നു. ഇതിനായി എ.ഐ യുഗത്തില് ശക്തമായ ഒരു ‘ട്രസ്റ്റ് ബൗണ്ടറി’ (Trust Boundary) രൂപപ്പെടണമെന്നും അദ്ദേഹം അഭിപ്രായപ്പെട്ടു. മുൻപ് പല പ്രമുഖ കമ്പനികളും തങ്ങളുടെ ജീവനക്കാർ ചാറ്റ് ജിപിടി ഉൾപ്പെടെയുള്ള ടൂളുകൾ ഉപയോഗിക്കുന്നത് ഡാറ്റ ചോർച്ച ഭയന്ന് വിലക്കിയ പശ്ചാത്തലവും ഈ പ്രസ്താവനയ്ക്ക് പിന്നിലുണ്ട്.
ഏതെങ്കിലും ഒരു എ.ഐ സേവന ദാതാവിനെ മാത്രം കമ്പനികൾ പൂർണ്ണമായി ആശ്രയിക്കുന്നത് വരുംദിവസങ്ങളിൽ വലിയ അപകടം ചെയ്യുമെന്നും അദ്ദേഹം കൂട്ടിച്ചേര്ത്തു. തങ്ങളുടെ ഡാറ്റയുടെയും തന്ത്രപരമായ പ്രവര്ത്തനങ്ങളുടെയും പൂര്ണ്ണ ഉടമസ്ഥാവകാശം സ്വന്തം കൈകളിൽ നിലനിര്ത്തിക്കൊണ്ട് തന്നെ, ആവശ്യാനുസരണം വിവിധ എ.ഐ മോഡലുകളിലേക്ക് മാറാന് സാധിക്കുന്ന ഹൈബ്രിഡ് സംവിധാനം സ്ഥാപനങ്ങള് കെട്ടിപ്പടുക്കണമെന്നും അദ്ദേഹം നിർദ്ദേശിച്ചു. ഭാവിയില് ലോകത്തെ ഏറ്റവും വലിയ എ.ഐ മോഡലുകള് ആര് ഉണ്ടാക്കുന്നു എന്നതിലല്ല കാര്യം. മറിച്ച് സാങ്കേതികവിദ്യ ബിസിനസ്സിൽ ഉപയോഗിക്കുമ്പോള് സ്വന്തം വിവരങ്ങളുടെയും അറിവുകളുടെയും മേല് കമ്പനികള്ക്ക് എത്രത്തോളം നിയന്ത്രണമുണ്ടെന്നതിലാണ് കാര്യമെന്നും സത്യ നദെല്ല ഓര്മ്മിപ്പിക്കുന്നു.
ഓപ്പൺ എ.ഐ ഉൾപ്പെടെയുള്ള വൻകിട കമ്പനികളിൽ വലിയ നിക്ഷേപമുള്ള മൈക്രോസോഫ്റ്റിന്റെ മേധാവി തന്നെ ഇത്തരമൊരു നിലപാട് വ്യക്തമാക്കിയത് ആഗോള ടെക് ലോകത്ത് വലിയ ചർച്ചകൾക്ക് തുടക്കമിട്ടിട്ടുണ്ട്. വിവര സുരക്ഷ ഉറപ്പാക്കാൻ കമ്പനികൾ സ്വന്തമായി വലിയ നിക്ഷേപം നടത്തേണ്ടി വരുമെന്നാണ് ഈ പ്രസ്താവന നൽകുന്ന സൂചന. വരും വർഷങ്ങളിൽ കോർപ്പറേറ്റ് ലോകം എ.ഐ നയങ്ങളിൽ വരുത്തേണ്ട വലിയ മാറ്റങ്ങളിലേക്കാണ് സത്യ നദെല്ല വിരൽ ചൂണ്ടുന്നത്.
English Summary
Microsoft Chief Executive Officer Satya Nadella has issued a vital warning to companies using Artificial Intelligence (AI) technologies, stating that they are paying a hidden cost. In his personal blog, Nadella pointed out that besides monetary payments, companies are inadvertently handing over their confidential data and core intellectual property to AI service providers. Citing Kenneth Arrow’s ‘Information Paradox’, he explained that to make AI models perform better, companies supply extensive data, allowing the AI to learn all about the user while offering minimal transparency in return. He emphasized the urgent need for a strict ‘Trust Boundary’ and advised businesses not to rely on a single AI provider, ensuring they maintain complete ownership of their data control.