മുംബൈ: ഇന്ത്യയുടെ ടി20 ലോകകപ്പ് വിജയത്തിൽ നിർണായക പങ്കുവഹിച്ച മലയാളി താരം സഞ്ജു സാംസണിന് കളത്തിന് പുറത്തും നേട്ടങ്ങളുടെ കാലം. ടൂർണമെന്റിലുടനീളം തകർപ്പൻ പ്രകടനം കാഴ്ചവെച്ച സഞ്ജു, കേവലം അഞ്ച് മത്സരങ്ങളിൽ നിന്ന് 321 റൺസാണ് അടിച്ചുകൂട്ടിയത്. തുടർച്ചയായി മൂന്ന് മത്സരങ്ങളിൽ അർധ സെഞ്ചുറി നേടിയ താരം ടൂർണമെന്റിലെ മികച്ച താരമായി (Player of the Tournament) തിരഞ്ഞെടുക്കപ്പെട്ടിരുന്നു. ഫൈനലിൽ ന്യൂസിലൻഡിനെതിരെ നേടിയ 89 റൺസ് ഉൾപ്പെടെയുള്ള പ്രകടനം സഞ്ജുവിന്റെ കരിയറിലെ തന്നെ ഏറ്റവും മികച്ച ഏടായി മാറി. ഈ ലോകകപ്പ് നേട്ടത്തിന് പിന്നാലെ താരത്തിന്റെ ബ്രാൻഡ് മൂല്യവും വരുമാനവും കുതിച്ചുയരുകയാണ്.
അടുത്ത കുറച്ചു മാസങ്ങൾക്കുള്ളിൽ സഞ്ജുവിന്റെ അക്കൗണ്ടിലേക്ക് 24.23 കോടി രൂപ എത്തുമെന്നാണ് പുറത്തുവരുന്ന കണക്കുകൾ സൂചിപ്പിക്കുന്നത്. ഐപിഎൽ 2026 സീസണിൽ ചെന്നൈ സൂപ്പർ കിങ്സിന് വേണ്ടി കളിക്കുന്ന സഞ്ജുവിന് പ്രതിഫലമായി 18 കോടി രൂപ ലഭിക്കും. രാജസ്ഥാൻ റോയൽസിൽ നിന്ന് രവീന്ദ്ര ജഡേജയ്ക്കും സാം കറനും പകരമായാണ് സഞ്ജുവിനെ ചെന്നൈ ട്രേഡ് ചെയ്തത്. ലോകകപ്പ് വിജയിച്ച ഇന്ത്യൻ ടീമിന് ബിസിസിഐ പ്രഖ്യാപിച്ച 131 കോടി രൂപയുടെ സമ്മാനത്തുകയിൽ നിന്ന് സഞ്ജുവിന് 6 കോടി രൂപ ലഭിക്കും. ഇതിന് പുറമെ ടൂർണമെന്റിലെ താരമായതിന് ഐസിസി നൽകുന്ന 23 ലക്ഷം രൂപയും സഞ്ജുവിന് സ്വന്തമാകും.
ഐപിഎല്ലിലെ വമ്പൻ ട്രേഡിലൂടെ ചെന്നൈ സൂപ്പർ കിങ്സിലേക്ക് എത്തിയ സഞ്ജു ഇത്തവണ ടൂർണമെന്റിലെ തന്നെ ഏറ്റവും ഉയർന്ന പ്രതിഫലം വാങ്ങുന്ന താരങ്ങളിൽ ഒരാളാണ്. രാജസ്ഥാൻ റോയൽസിന്റെ നായകസ്ഥാനം ഒഴിഞ്ഞാണ് താരം മഞ്ഞക്കുപ്പായത്തിലേക്ക് ചേക്കേറിയിരിക്കുന്നത്. ധോണിയുടെ പിൻഗാമിയായി സഞ്ജുവിനെ ചെന്നൈ ആരാധകർ വലിയ ആവേശത്തോടെയാണ് വരവേൽക്കുന്നത്. ലോകകപ്പിലെ ഫോം ഐപിഎല്ലിലും തുടരാനായാൽ സഞ്ജുവിന്റെ മൂല്യം ഇനിയും വർദ്ധിക്കുമെന്നുറപ്പാണ്. നിലവിൽ സിഎസ്കെയുടെ പ്ലേയിംഗ് ഇലവനിലെ പ്രധാനിയായി സഞ്ജുവിനെ മാനേജ്മെന്റ് ഉറപ്പിച്ചു കഴിഞ്ഞു.
ലോകകപ്പ് വിജയത്തിന് പിന്നാലെ സഞ്ജു സാംസണിന്റെ ആകെ ആസ്തിയിൽ വൻ വർദ്ധനവാണ് രേഖപ്പെടുത്തിയിരിക്കുന്നത്. 2026 മാർച്ചിലെ കണക്കനുസരിച്ച് സഞ്ജുവിന്റെ ആകെ ആസ്തി 85 കോടി മുതൽ 100 കോടി രൂപ വരെയായി ഉയർന്നതായി ന്യൂസ് 24 റിപ്പോർട്ട് ചെയ്യുന്നു. ഐപിഎൽ ശമ്പളം, ബിസിസിഐ കരാർ, മാച്ച് ഫീ എന്നിവയ്ക്ക് പുറമെ റിയൽ എസ്റ്റേറ്റ് നിക്ഷേപങ്ങളും താരത്തിനുണ്ട്. തിരുവനന്തപുരത്തെ ആഡംബര വസതിക്ക് പുറമെ വിവിധ നഗരങ്ങളിൽ സഞ്ജുവിന് വസ്തുവകകളുണ്ട്. സാമ്പത്തിക ഭദ്രത ഉറപ്പാക്കുന്ന തരത്തിലുള്ള സഞ്ജുവിന്റെ നിക്ഷേപ രീതികൾ വലിയ രീതിയിൽ ചർച്ച ചെയ്യപ്പെടുന്നുണ്ട്.
ബ്രാൻഡ് എൻഡോഴ്സ്മെന്റുകളിലൂടെയും സഞ്ജു വലിയ തുക പ്രതിവർഷം സമ്പാദിക്കുന്നുണ്ട്. സ്പോർട്സ് വെയറുകൾ, ലൈഫ് സ്റ്റൈൽ ബ്രാൻഡുകൾ എന്നിവയുമായി സഞ്ജുവിന് നിലവിൽ കരാറുകളുണ്ട്. ലോകകപ്പിലെ മിന്നും പ്രകടനത്തോടെ കൂടുതൽ ദേശീയ-അന്തർദേശീയ ബ്രാൻഡുകൾ സഞ്ജുവിനെ തേടിയെത്തുകയാണ്. നിലവിൽ ബിസിസിഐയുടെ ഗ്രേഡ്-സി കരാറിലുള്ള താരത്തിന്റെ വരുമാനത്തിൽ അടുത്ത കരാർ പുതുക്കലിലൂടെ വലിയ മാറ്റം വരുമെന്നാണ് പ്രതീക്ഷിക്കുന്നത്. വിക്കറ്റ് കീപ്പർ ബാറ്റർ എന്ന നിലയിലുള്ള സഞ്ജുവിന്റെ മികവ് ബ്രാൻഡുകൾക്ക് വലിയ പ്രിയങ്കരനാക്കി മാറ്റിയിട്ടുണ്ട്.
ആഡംബര കാറുകളോടുള്ള താല്പര്യവും സഞ്ജുവിനുണ്ട്. റേഞ്ച് റോവർ സ്പോർട്സ്, ബിഎംഡബ്ല്യു 5 സീരീസ്, ഓഡി എ6 തുടങ്ങിയ ആഡംബര വാഹനങ്ങൾ സഞ്ജുവിന്റെ ഗാരേജിലുണ്ട്. ക്രിക്കറ്റ് മൈതാനത്തെ ശാന്തമായ പെരുമാറ്റം പോലെ തന്നെ പക്വമായ സാമ്പത്തിക നീക്കങ്ങളാണ് താരം നടത്തുന്നത്. 2012-ൽ 18 ലക്ഷം രൂപയ്ക്ക് ഐപിഎൽ കരിയർ തുടങ്ങിയ സഞ്ജു 15 സീസണുകൾ പിന്നിടുമ്പോൾ നൂറ് കോടിക്ക് മുകളിൽ ശമ്പളം വാങ്ങിയ താരമായി മാറിക്കഴിഞ്ഞു. മലയാളി കായിക താരങ്ങളിൽ ഏറ്റവും കൂടുതൽ ആസ്തിയുള്ളവരിൽ ഒരാളാണ് ഇന്ന് സഞ്ജു.
വരാനിരിക്കുന്ന ഐപിഎൽ സീസൺ സഞ്ജുവിന്റെ കരിയറിലെ തന്നെ ഏറ്റവും പ്രധാനപ്പെട്ട ഒന്നായിരിക്കും. ധോണിയുടെ സാന്നിധ്യത്തിൽ ചെന്നൈയുടെ വിജയങ്ങളിൽ പങ്കാളിയാവുക എന്ന വലിയ ഉത്തരവാദിത്തമാണ് താരത്തിനുള്ളത്. മാർച്ച് 30-ന് തന്റെ പഴയ ടീമായ രാജസ്ഥാൻ റോയൽസിനെതിരെ തന്നെയാണ് സഞ്ജുവിന്റെ ചെന്നൈ അരങ്ങേറ്റം. ഈ സീസണിൽ മികച്ച പ്രകടനം തുടരാനായാൽ സഞ്ജുവിന്റെ ബ്രാൻഡ് മൂല്യം ഇന്ത്യൻ ക്രിക്കറ്റിലെ സൂപ്പർ താരങ്ങൾക്കൊപ്പമെത്തും. സഞ്ജുവിന്റെ ഈ സാമ്പത്തിക വളർച്ച യുവതാരങ്ങൾക്കും വലിയ പ്രചോദനമാണ് നൽകുന്നത്.
Sanju Samson’s net worth has soared to an estimated ₹85-100 crore following his stellar performance as the ‘Player of the Tournament’ in the 2026 T20 World Cup. He is set to earn ₹24.23 crore in the coming months, including his ₹18 crore IPL salary from Chennai Super Kings and a ₹6 crore bonus from the BCCI. This financial milestone marks a significant leap in the Kerala-born cricketer’s brand value and career earnings