കീവ്: യുക്രൈനിലെ ജനവാസ മേഖലകളെയും തന്ത്രപ്രധാനമായ അടിസ്ഥാന സൗകര്യങ്ങളെയും പൂർണ്ണമായി തകർക്കുക എന്ന ലക്ഷ്യത്തോടെ റഷ്യ നടത്തിയ അതിശക്തമായ വ്യോമാക്രമണങ്ങളിൽ കൊല്ലപ്പെട്ടവരുടെ എണ്ണം പത്തായി ഉയർന്നു. തലസ്ഥാന നഗരമായ കീവിൽ നാലും ജനനിബിഡമായ ഡിനിപ്രോയിൽ ആറും പേരാണ് റഷ്യൻ മിസൈലാക്രമണത്തിൽ കൊല്ലപ്പെട്ടത്. ചൊവ്വാഴ്ച പുലർച്ചെയോടെ രാജ്യം കടുത്ത ഭീതിയിലാഴ്ന്ന ആക്രമണത്തിൽ 700-ലധികം മിസൈലുകളും അത്യാധുനിക ഡ്രോണുകളുമാണ് റഷ്യൻ സൈന്യം യുക്രൈന് നേരെ പ്രയോഗിച്ചതെന്ന് യുക്രൈൻ വ്യോമസേന ഔദ്യോഗികമായി സ്ഥിരീകരിച്ചു. ഇതിൽ 642 എണ്ണം തങ്ങളുടെ വ്യോമപ്രതിരോധ സംവിധാനം ഉപയോഗിച്ച് വെടിവെച്ചിട്ടതായും അവർ അവകാശപ്പെട്ടു.
റഷ്യൻ മിസൈലുകൾ നേരിട്ട് പതിച്ചതിനെ തുടർന്ന് കീവിലെ രണ്ട് വൻകിട ബഹുനില പാർപ്പിട സമുച്ചയങ്ങൾ (Apartments) പൂർണ്ണമായി തകർന്നു തരിപ്പണമായിട്ടുണ്ട്. നിരവധി കുടുംബങ്ങൾ ഇപ്പോഴും തകർന്ന കെട്ടിടങ്ങളുടെ അവശിഷ്ടങ്ങൾക്കിടയിൽ കുടുങ്ങിക്കിടക്കുകയാണെന്ന് കീവ് മേയർ വിറ്റാലി ക്ലിറ്റ്ഷ്കോ അടിയന്തര വാർത്താസമ്മേളനത്തിൽ അറിയിച്ചു. നഗരത്തിലെ പ്രധാന ഗ്യാസ് സ്റ്റേഷനുകൾക്കും വലിയ നിർമാണ മേഖലകൾക്കും സമീപം മിസൈൽ അവശിഷ്ടങ്ങൾ വീണ് വൻ തീപിടുത്തമുണ്ടായി. പല പ്രവിശ്യകളിലും പവർ ഗ്രിഡുകൾ തകർന്നതിനെ തുടർന്ന് പൂർണ്ണമായി വൈദ്യുതി ബന്ധം നിലച്ചിരിക്കുകയാണ്. കീവിൽ മാത്രം നിലവിൽ 51 പേർക്ക് ഗുരുതരമായി പരിക്കേറ്റിട്ടുണ്ട്.
തലസ്ഥാനത്തിന് പുറമെ തെക്കൻ യുക്രൈൻ നഗരമായ സപ്പോറീഷ്യയിലെ പ്രമുഖ വ്യവസായ ശാലയ്ക്ക് നേരെയും റഷ്യൻ ക്രൂയിസ് മിസൈലുകൾ പതിച്ചു. റഷ്യൻ സൈന്യം കീവിലെ തന്ത്രപ്രധാനമായ ഭരണകേന്ദ്രങ്ങളെയും പാർലമെന്റ് മന്ദിരത്തെയും ലക്ഷ്യമിട്ട് വരും മണിക്കൂറുകളിൽ കൂടുതൽ വിനാശകരമായ ആക്രമണത്തിന് മുതിരുമെന്ന് യുക്രൈൻ പ്രസിഡന്റ് വൊളോഡിമിർ സെലെൻസ്കി തിങ്കളാഴ്ച രാത്രി തന്നെ രാജ്യത്തിന് മുന്നറിയിപ്പ് നൽകിയിരുന്നു. പ്രസിഡന്റിന്റെ മുൻകൂർ ജാഗ്രതാ നിർദേശമുണ്ടായിരുന്നതിനാൽ പതിനായിരക്കണക്കിന് ആളുകൾ രാത്രി തന്നെ ഭൂഗർഭ മെട്രോ സ്റ്റേഷനുകളിലും ബങ്കറുകളിലും അഭയം പ്രാപിച്ചതിനാലാണ് മരണസംഖ്യ വലിയ രീതിയിൽ ഉയരാതിരുന്നത്.
തങ്ങളുടെ നിയന്ത്രണത്തിലുള്ള റഷ്യൻ മേഖലയിലെ ഒരു വിദ്യാർത്ഥി ഹോസ്റ്റലിന് നേരെ യുക്രൈൻ സൈന്യം കഴിഞ്ഞ ദിവസം നടത്തിയ ആസൂത്രിത ആക്രമണത്തിനുള്ള ശക്തമായ മറുപടിയാണ് ഇതെന്നാണ് റഷ്യയുടെ വാദം. കീവിലും ഡിനിപ്രോയിലും നടത്തിയ മിസൈൽ ആക്രമണം പൂർണ്ണ വിജയമായിരുന്നുവെന്നും നിശ്ചയിച്ചിരുന്ന സൈനിക ലക്ഷ്യങ്ങളെല്ലാം കൃത്യമായി തകർക്കാൻ കഴിഞ്ഞതായും റഷ്യൻ പ്രതിരോധ മന്ത്രാലയം ഔദ്യോഗിക പ്രസ്താവനയിലൂടെ അവകാശപ്പെട്ടു. യുക്രൈന്റെ വ്യോമപ്രതിരോധ ശേഷി തകർത്തതായും റഷ്യ അവകാശപ്പെടുന്നുണ്ട്.
അതേസമയം, റഷ്യയുടെ കനത്ത വ്യോമാക്രമണത്തിന് തൊട്ടുപിന്നാലെ റഷ്യൻ അതിർത്തിക്കുള്ളിൽ തിരിച്ചടി നൽകാനും യുക്രൈൻ സൈന്യത്തിന് കഴിഞ്ഞിട്ടുണ്ട്. റഷ്യയിലെ ക്രാസ്നോദർ ക്രാ മേഖലയിലുള്ള തന്ത്രപ്രധാനമായ ‘ഇൽസ്കി’ എണ്ണ ശുദ്ധീകരണ ശാലയ്ക്ക് (Ilsky Oil Refinery) നേരെ യുക്രൈൻ നടത്തിയ ഡ്രോൺ ആക്രമണത്തെത്തറ്റുടർന്ന് വൻ തീപിടുത്തമുണ്ടായി. എണ്ണ സംഭരണികൾ പൊട്ടിത്തെറിച്ചതിനെ തുടർന്ന് കിലോമീറ്ററുകളോളം ദൂരത്തിൽ കറുത്ത പുക പടരുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്. റഷ്യൻ സാമ്പത്തിക സ്രോതസ്സുകളെ തകർക്കുക എന്ന ലക്ഷ്യത്തോടെയാണ് യുക്രൈൻ ഈ ഡ്രോൺ ആക്രമണം നടത്തിയത്.
യുക്രൈനിലെ ജനവാസ മേഖലകൾക്ക് നേരെയുണ്ടായ റഷ്യയുടെ ഈ ക്രൂരമായ ആക്രമണത്തെ അമേരിക്കയും യൂറോപ്യൻ യൂണിയനും കടുത്ത ഭാഷയിൽ അപലപിച്ചു. റഷ്യൻ യുദ്ധക്കുറ്റങ്ങൾക്കെതിരെ അന്താരാഷ്ട്ര സമൂഹം അടിയന്തരമായി ഇടപെടണമെന്നും യുക്രൈന് കൂടുതൽ അത്യാധുനിക പാട്രിയറ്റ് മിസൈൽ പ്രതിരോധ സംവിധാനങ്ങൾ കൈമാറണമെന്നും യുക്രൈൻ വിദേശകാര്യ മന്ത്രാലയം ആവശ്യപ്പെട്ടു. കെട്ടിടാവശിഷ്ടങ്ങൾക്കിടയിൽ കുടുങ്ങിയവർക്കായുള്ള രക്ഷാപ്രവർത്തനം സൈന്യത്തിന്റെയും സന്നദ്ധപ്രവർത്തകരുടെയും നേതൃത്വത്തിൽ യുദ്ധകാലാടിസ്ഥാനത്തിൽ പുരോഗമിക്കുകയാണ്.
അവശിഷ്ടങ്ങൾക്കിടയിൽ നിന്നും കൂടുതൽ മൃതദേഹങ്ങൾ കണ്ടെത്താനുള്ള സാധ്യതയുള്ളതിനാൽ വരും മണിക്കൂറുകളിൽ മരണസംഖ്യ ഇനിയും ഉയർന്നേക്കുമെന്നാണ് ദുരന്തനിവാരണ വിഭാഗം നൽകുന്ന സൂചന. ആശുപത്രികളിൽ പ്രവേശിപ്പിച്ച പലരുടെയും പരിക്ക് അതീവ ഗുരുതരമായി തുടരുകയാണ്. കഴിഞ്ഞ ഏതാനും മാസങ്ങൾക്കിടയിൽ യുക്രൈൻ തലസ്ഥാനമായ കീവ് ലക്ഷ്യമാക്കി റഷ്യ നടത്തുന്ന ഏറ്റവും വലിയ സംയുക്ത വ്യോമാക്രമണമാണ് ഇത്. ഇതോടെ ഇരുരാജ്യങ്ങളും തമ്മിലുള്ള അതിർത്തി യുദ്ധം കൂടുതൽ വലിപ്പത്തിലുള്ള പ്രതിസന്ധിയിലേക്ക് നീങ്ങുകയാണ്.
English Summary
At least ten people were killed, including four in Kyiv and six in Dnipro, following a massive Russian missile and drone barrage targeting residential areas and infrastructure across Ukraine. The Ukrainian Air Force reported that Russia launched over 700 missiles and drones early Tuesday, with 642 of them successfully intercepted. Kyiv Mayor Vitali Klitschko stated that two high-rise apartment buildings were destroyed, leaving many trapped under the rubble and injuring 51 people. Russia claimed the strikes successfully fulfilled their objectives in retaliation for a previous Ukrainian attack on a student hostel. Meanwhile, a Ukrainian drone strike targeted the Ilsky oil refinery in Russia’s Krasnodar Krai, sparking a massive fire.