കൊച്ചി: പുതുവത്സരാഘോഷങ്ങള്ക്കിടെ കൊച്ചി നഗരത്തില് വന് കവര്ച്ച. പുതുക്കലവട്ടത്തെ വീട് കുത്തിത്തുറന്ന് മോഷ്ടാക്കള് കൊണ്ടുപോയത് 11.11 ലക്ഷം രൂപയുടെ സ്വര്ണ്ണം. പൊതുമരാമത്ത് വകുപ്പില് ഇലക്ട്രിക്കല് കരാറുകാരനായ പ്ലാസിഡിന്റെ വീട്ടിലാണ് മോഷണം നടന്നത്. കല്യാണച്ചടങ്ങുകളുമായി ബന്ധപ്പെട്ട് വീട്ടുകാര് രണ്ടു ദിവസമായി ചുള്ളിക്കലിലുള്ള ബന്ധുവീട്ടിലായിരുന്നു. ഈ സമയത്താണ് മോഷണം നടന്നിരിക്കുന്നത്. വീടിന്റെ പിന്വാതില് തുറന്നാണ് മോഷ്ടാക്കള് അകത്തു കയറിയത്.
അലമാരക്കുള്ളിലെ ലോക്കറിലാണ് സ്വര്ണ്ണം സൂക്ഷിച്ചിരുന്നത്. വീടിനുള്ളില് കയറിയ മോഷ്ടാക്കള് അലമാരയുടെ ലോക്കു പൊളിച്ച് അകത്തുനിന്നു ലോക്കറിന്റെ താക്കോല് കണ്ടെത്തി സ്വര്ണം കവര്ന്നതാകാമെന്ന നിഗമനത്തിലാണ് പോലീസ്. വീടിന്റെ താക്കോല് അടുത്തുള്ള ബന്ധു വീട്ടില് ഏല്പ്പിച്ചിരുന്നു. വെള്ളിയാഴ്ച രാവിലെ ബന്ധുവീട്ടിലെകുട്ടി വന്നുനോക്കുമ്പോഴാണ് പിന്വാതില് കുത്തിത്തുറന്ന നിലയില് കണ്ടത്.
സംഭവസ്ഥലത്തെത്തി പോലീസ് പരിശോധിച്ചതോടെയാണ് മോഷണ വിവരം അറിയുന്നത്. എളമക്കര സി.ഐ. വി.ആര്. സുനില്, എസ്.ഐ.മാരായ ബിബിന്, രാജു, എ.എസ്.ഐ. സുബൈര് എന്നിവരുടെ നേതൃത്വത്തിലാണ് അന്വേഷണം ആരംഭിച്ചിരിക്കുന്നത്. പ്രദേശത്ത് സി.സി.ടി.വി. സ്ഥാപിച്ചിട്ടില്ലാത്തതിനാല് മറ്റ് പ്രദേശങ്ങളിലെ സി.സി.ടി.വി. ദൃശ്യങ്ങള്ശേഖരിക്കാനാണ് പോലീസ് ശ്രമം.