ജയ്പുർ: ഐപിഎല്ലിൽ (IPL) ഗുജറാത്തിനോട് തോറ്റ് രാജസ്ഥാൻ ഫൈനൽ കാണാതെ പുറത്തായെങ്കിലും, 15 വയസ്സ് മാത്രം പ്രായമുള്ള രാജസ്ഥാൻ്റെ കൗമാര വിസ്മയം വൈഭവ് സൂര്യവംശിയുടെ പോരാട്ടവീര്യം ക്രിക്കറ്റ് ലോകത്തിന്റെ കയ്യടി നേടുന്നു. വിക്കറ്റുകൾ നിരനിരയായി നഷ്ടപ്പെട്ട് ടീം വൻ തകർച്ചയെ നേരിടുമ്പോഴും ക്രീസിൽ വൻമതിലായി നിലയുറപ്പിച്ച് ബാറ്റേന്തിയ വൈഭവ് ഏറെക്കുറെ ഒറ്റയ്ക്കാണ് രാജസ്ഥാനെ കരകയറ്റിയത്. എന്നാൽ, മത്സരം തോറ്റതിന് പിന്നാലെ ഡഗൗട്ടിൽ വെച്ച് വൈഭവിനോട് രാജസ്ഥാൻ നായകൻ റിയാൻ പരാഗ് അൽപ്പം രോഷത്തോടെ സംസാരിച്ചതാണ് ഇപ്പോൾ സോഷ്യൽ മീഡിയയിലും ആരാധകർക്കിടയിലും വൻ വിവാദത്തിനും ചർച്ചകൾക്കും വഴിവെച്ചിരിക്കുന്നത്.
സെഞ്ചുറി നേടുമെന്ന് തോന്നിച്ചെങ്കിലും വെറും നാല് റൺസ് അകലെയാണ് കൗമാരതാരം നിർഭാഗ്യകരമായി പുറത്തായത്. 47 പന്തിൽ 8 ഫോറും 7 സിക്സറുകളും അടക്കം 204.25 എന്ന തകർപ്പൻ സ്ട്രൈക്ക് റേറ്റിൽ 96 റൺസെടുത്ത സൂര്യവംശിയാണ് രാജസ്ഥാൻ ഇന്നിങ്സിലെ ടോപ് സ്കോറർ. കഗീസോ റബാഡയുടെ പന്തിലാണ് സെഞ്ചുറിക്ക് തൊട്ടരികെ വെച്ച് താരം വീണത്. അർഹിച്ച സെഞ്ചുറി നഷ്ടമായതിന്റെ കടുത്ത നിരാശയോടെയാണ് വൈഭവ് കളം വിട്ടത്. ശേഷം ഡഗൗട്ടിൽ വന്നിരുന്ന വൈഭവിനെ ക്യാപ്റ്റൻ റിയാൻ പരാഗ് സമീപിക്കുകയും ദേഷ്യത്തോടെ സംസാരിക്കുകയുമായിരുന്നു. വൈഭവിനുനേരെ കൈചൂണ്ടി പരാഗ് ദേഷ്യപ്പെടുന്നത് ടിവി ക്യാമറകൾ കൃത്യമായി ഒപ്പിയെടുത്തു. നായകന്റെ ദേഷ്യപ്പെടലിന് മുന്നിൽ നിസ്സഹായതയോടെ നോക്കിനിൽക്കുന്ന വൈഭവിനെയും ദൃശ്യങ്ങളിൽ കാണാം. ഇതിന്റെ വീഡിയോകൾ ഓൺലൈനിൽ വ്യാപകമായി പ്രചരിച്ചതോടെയാണ് ആരാധകർ പരാഗിനെതിരെ തിരിഞ്ഞത്.
വിക്കറ്റുകൾ ഒരുവശത്ത് തുടർച്ചയായി പൊഴിഞ്ഞതോടെ തുടക്കത്തിൽ അതീവ ശ്രദ്ധയോടെയാണ് സൂര്യവംശി കളിച്ചത്. 31 പന്തിലാണ് താരം അർധസെഞ്ചുറി പൂർത്തിയാക്കിയത്. ഈ സീസണിൽ താരത്തിന്റെ ഐപിഎല്ലിലെ ഏറ്റവും വേഗം കുറഞ്ഞ അർധശതകമാണിത്. എന്നാൽ, അമ്പത് കടന്നതോടെ താരം ഗിയർ മാറ്റി. അടുത്ത 16 പന്തിൽ നിന്ന് മാത്രം 46 റൺസാണ് താരം അടിച്ചുകൂട്ടിയത്. മധ്യനിരയിൽ രവീന്ദ്ര ജഡേജ (35 പന്തിൽ 47) കൗമാരതാരത്തിന് ഉറച്ച പിന്തുണ നൽകി. ടീമിനെ തകർച്ചയിൽ നിന്ന് രക്ഷിക്കാൻ ഇത്രയും മികച്ച ഇന്നിങ്സ് കളിച്ച 15 വയസ്സുകാരനോട് പരസ്യമായി ദേഷ്യപ്പെട്ട പരാഗിന്റെ പെരുമാറ്റം ഒട്ടും ശരിയായില്ലെന്നാണ് രാജസ്ഥാൻ ആരാധകർ പറയുന്നത്. മത്സരത്തിൽ വെറും 11 റൺസെടുത്ത് പുറത്തായ പരാഗിന് വൈഭവിനെ ചോദ്യം ചെയ്യാൻ എന്ത് അവകാശമാണുള്ളതെന്നും, പരസ്യമായി കൈചൂണ്ടി സംസാരിച്ച് ഒരു കൗമാരക്കാരനെ മാനസികമായി തളർത്തുകയാണോ ക്യാപ്റ്റൻ ചെയ്യുന്നതെന്നും ആരാധകർ കടുത്ത ഭാഷയിൽ വിമർശിക്കുന്നു.
മറുപടി ബാറ്റിംഗിൽ ശുഭ്മൻ ഗിലിന്റെ തകർപ്പൻ സെഞ്ചുറിയും (53 പന്തിൽ 104), സായ് സുദർശന്റെ അർധ സെഞ്ചുറിയും (32 പന്തിൽ 58) ഗുജറാത്തിന്റെ പോരാട്ടം അതീവ അനായാസമാക്കി മാറ്റി. ഓപ്പണിങ് വിക്കറ്റിൽ ഇരുവരും ചേർന്ന് 12.5 ഓവറിൽ 167 റൺസ് കൂട്ടിച്ചേർത്തതോടെ തന്നെ ഗുജറാത്ത് ഫൈനലുറപ്പിച്ചു. മത്സരം പരാജയപ്പെട്ട് ഫൈനലിലെത്താനാവാതെ വന്നതോടെ കടുത്ത നിരാശയോടെ ഡഗൗട്ടിലിരിക്കുന്ന വൈഭവിനെയാണ് പിന്നീട് കണ്ടത്. ടീം തോറ്റ സങ്കടത്തിൽ മുഖം മറച്ചുനിൽക്കുന്ന 15-കാരനായ കൗമാരതാരത്തിന്റെ വികാരനിർഭരമായ ചിത്രങ്ങൾ ക്രിക്കറ്റ് ആരാധകർക്കിടയിൽ ഇപ്പോൾ നൊമ്പരമായി മാറിയിരിക്കുകയാണ്.
Despite Rajasthan crashing out of the IPL finals after a defeat against Gujarat, 15-year-old prodigy Vaibhav Suryavanshi won hearts with a brilliant 96 off 47 balls. However, a post-match controversy erupted after cameras caught Rajasthan skipper Riyan Parag angrily gesturing and shouting at Vaibhav in the dugout. Fans slammed Parag for publicly admonishing the teenager who single-handedly rescued the team, while Parag himself failed with the bat scoring just 11. Shubman Gill’s century (104) and Sai Sudharsan’s 58 guided Gujarat to an easy win, leaving young Vaibhav heartbroken in the dugout.