മലയാള സിനിമയില്‍ എണ്‍പതുകളില്‍ തിളങ്ങി നിന്ന യുവനടന്‍ ആയിരിന്നു റഹ്മാന്‍. തൊണ്ണൂറുകളുടെ അവസാനത്തോടെ സിനിമയില്‍ നിന്ന് ചെറിയ ഇടവേള എടുത്ത റഹ്മാന്‍ പിന്നീട് ശ്കതമായ തിരിച്ചുവരവാണ് നടത്തിയത്. വ്യത്യസ്ത വേഷങ്ങളിലൂടെ ഒരിക്കല്‍ കൂടി പ്രേക്ഷകരുടെ ഇഷ്ടനടനായി മാറുകയും ചെയ്തു.
ഇപ്പോള്‍ തമിഴ് സിനിമയില്‍ ആണ് റഹ്മാന്‍ കൂടുതലായി അഭിനയിക്കുന്നത്. കാര്‍ത്തിക് നരെയ്ന്‍ സംവിധാനം ചെയ്ത ധ്രുവങ്ങള്‍ പതിനാറു എന്ന ചിത്രത്തിന്റെ വിജയം റഹ്മാന്റെ കരിയറിലെ ഒരു വഴിത്തിരിവായി മാറാനാണ് സാധ്യത. ഇപ്പോള്‍ മണി രത്നം ഒരുക്കുന്ന പൊന്നിയില്‍ സെല്‍വന്‍ എന്ന ബിഗ് ബജറ്റ് ബ്രഹ്മാണ്ഡ ചിത്രത്തില്‍ ആണ് റഹ്മാന്‍ അഭിനയിക്കുന്നത്.
ഈ ചിത്രത്തിന് വേണ്ടി ഗംഭീര മേക് ഓവറില്‍ ആണ് റഹ്മാന്‍ പ്രത്യക്ഷപ്പെടുന്നത്. ഇതിനു വേണ്ടി ജിമ്മില്‍ കഠിനമായി വര്‍ക്ക് ഔട്ട് ചെയ്യുന്ന ചിത്രങ്ങള്‍ റഹ്മാന്‍ തന്നെ സോഷ്യല്‍ മീഡിയ വഴി പങ്കു വെച്ചിട്ടുണ്ട്. ഇപ്പോഴിതാ തന്റെ പുതിയ ജിം വര്‍ക്ക് ഔട്ട് ചിത്രങ്ങള്‍ പങ്കു വെച്ച് കൊണ്ട് റഹ്മാന്‍ സോഷ്യല്‍ മീഡിയയില്‍ കുറിച്ച രസകരമായ വാക്കുകള്‍ ആണ് ശ്രദ്ധ നേടുന്നത്.
റഹ്മാന്‍ കുറിച്ച വാക്കുകള്‍ ഇപ്രകാരം, എന്ത് ചെയ്യാനാ, ഓരോരോ പിള്ളേര് സിനിമാ ഫീല്‍ഡിലേക്കു വന്നോളും, കയ്യ് പെരുപ്പിച്ചു എട്ടു പത്തു പാക്കുമായി. വെറുതെ നമ്മളെ ഇട്ടു ബുദ്ധിമുട്ടിക്കാനായി. ഈ വാക്കുകള്‍ക്കൊപ്പം ആണ് തന്റെ പുതിയ ജിം വര്‍ക്ക് ഔട്ട് ചിത്രം റഹ്മാന്‍ പങ്കു വെച്ചിരിക്കുന്നത്. രണ്ടു ഭാഗങ്ങള്‍ ആയി ഒരുക്കുന്ന വമ്പന്‍ താര നിര അണിനിരക്കുന്ന ചിത്രമാണ് മണി രത്നത്തിന്റെ പൊന്നിയില്‍ സെല്‍വന്‍.
