REDDIT💻 റെഡ്ഡിറ്റ് ഹാക്ക് ചെയ്യപ്പെട്ടു, നടന്നത് ഫിഷിങ് അറ്റാക്ക്; യൂസർ ഡാറ്റ സുരക്ഷിതമെന്ന് കമ്പനി

ജനപ്രിയ സോഷ്യല്‍ ന്യൂസ് അഗ്രഗേഷന്‍ സൈറ്റായ റെഡ്ഡിറ്റ് അടുത്തിടെ ഹാക്ക് ചെയ്യപ്പെട്ടതായി കമ്പനി. തങ്ങളുടെ പ്ലാറ്റ്‌ഫോമില്‍ സുരക്ഷാ വീഴ്ചയുണ്ടായ വിവരം ഫെബ്രുവരി ഒമ്പതിനാണ് കമ്പനി അറിയിച്ചത്. ഫെബ്രുവരി അഞ്ചിനാണ് ഹാക്കിങ് നടന്നതെന്നാണ് വിവരം.

ഫിഷിങ് ആക്രമണമാണ് നടന്നതെന്ന് കമ്പനി പറയുന്നു. ജീവനക്കാര്‍ വഴിയാണ് ഹാക്കര്‍മാര്‍ റെഡ്ഡിറ്റിന്റെ സെര്‍വറുകളിലേക്ക് കടന്നത്.

തങ്ങളുടെ അന്വേഷണത്തില്‍ ഉപഭോക്താക്കളുടെ പാസ് വേഡുകളും അക്കൗണ്ടുകളും സുരക്ഷിതമാണെന്ന് വ്യക്തമായതായി റെഡ്ഡിറ്റ് പറഞ്ഞു. ചില ഡോക്യുമെന്റുകള്‍, കോഡുകള്‍, ചില ഇന്റേണല്‍ ബിസിനസ് സിസ്റ്റംസ് എന്നിവയിലേക്കാണ് ഹാക്കര്‍മാര്‍ പ്രവേശിച്ചത് എന്നും കമ്പനി വ്യക്തമാക്കുന്നു.

കമ്പനിയുടെ ഇന്‍ട്രാനെറ്റ് ഗേറ്റ് വേയുടെ വ്യാജനുണ്ടാക്കിയാണ് റെഡ്ഡിറ്റിന്റെ ജീവനക്കാരെ കബളിപ്പിച്ച് ഹാക്കര്‍മാര്‍ റെഡിറ്റിന്റെ നെറ്റ്‌വര്‍ക്കിലേക്ക് കടന്നത്.

എന്നാല്‍ ഇക്കാര്യം തിരിച്ചറിഞ്ഞ ജീവനക്കാരന്‍ ഉടന്‍ തന്നെ കമ്പനിയുടെ സുരക്ഷാ ജീവനക്കാരെ ബന്ധപ്പെടുകയും വളരെ വേഗം പ്രതിരോധ നടപടികള്‍ സ്വീകരിക്കുകയും ചെയ്തു.

ഉപഭോക്താക്കളുടെ അക്കൗണ്ടുകള്‍ സുരക്ഷിതമാണെന്ന് വ്യക്തമാക്കിയെങ്കിലും അക്കൗണ്ടുകള്‍ സുരക്ഷിതമാക്കാന്‍ ടൂ ഫാക്ടര്‍ ഒതന്റിക്കേഷന്‍ ഉള്‍പ്പടെയുള്ള മുന്‍കരുതല്‍ സ്വീകരിക്കാന്‍ കമ്പനി നിര്‍ദേശിച്ചിട്ടുണ്ട്.