CRIME 🚨പൊലീസെന്ന വ്യാജേന ഭീഷണിപ്പെടുത്തി കുരുമുളക് സ്പ്രേ അടിച്ചു,യുവാവിനെ കൊള്ളയടിച്ച യുവാവ് പിടിയില്‍

കണ്ണൂര്‍: തലശേരി നഗരത്തിൽ പൊലീസെന്ന വ്യാജേന ഇതര സംസ്ഥാന തൊഴിലാളിയായ യുവാവിനെ കൊള്ളയടിച്ച കേളകം അടയ്ക്കാത്തോട് സ്വദേശിയായ യുവാവ് റിമാൻഡിൽ. ഇതരസംസ്ഥാനതൊഴിലാളിയുടെ മുഖത്ത് കുരുമുളക് സ്പ്രേ അടിച്ചു കണ്ണുകാണാതാക്കിയ ശേഷം മൊബൈൽ ഫോൺ കവർന്ന കേസിലെ പ്രതിയാണ് പിടിയിലായത്. ഇയാളെ തലശേരി കോടതിയിൽ ഹാജരാക്കി റിമാൻഡ് ചെയ്തു.

തലശേരി നഗരത്തിലെ മുകുന്ദ് ജംഗ്ഷനിൽ കണ്ണിൽ കുരുമുളക് സ്പ്രേ അടിച്ച് ഇതര സംസ്ഥാന തൊഴിലാളിയുടെ മൊബൈൽ ഫോൺ കവർന്ന കേസിലെ പ്രതി നിഖിൽ കുമാർ എന്ന അഖിലിനെ തലശ്ശേരി പൊലീസ് അറസ്റ്റ് ചെയ്തത്. കേളകം അടയ്ക്കാത്തോട്ടിലെ വീട്ടിൽ നിന്നാണ് പ്രതിയെ കസ്റ്റഡിയിലെടുത്ത്.

ജനുവരി 17 ന് പുലർച്ചെ 5 മണിക്ക് സൈക്കിളിൽ ജോലിക്ക് പോവുകയായിരുന്നു കൊൽക്കത്ത മേദിനിപൂർ സ്വദേശി സുൽത്താന്റെ 25,000 രൂപ വില വരുന്ന മൊബൈൽ ഫോണാണ് കവർച്ച ചെയ്തത്. സി.സി.ടി.വി ക്യാമറയടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതി വലയിലയത്. ഇയാൾക്കെതിരെ കേരളത്തിനകത്തും പുറത്തുമായി നിരവധി മോഷണ കേസുകളുണ്ട്. ട്രെയിൻ കവർച്ചക്കസിലും പ്രതിയാണ് ഇയാൾ.

മോഷണം നടത്തിയ ശേഷം വീട്ടിൽ ഒളിച്ച് താമസിക്കുകയാണ് പതിവ്. പൊലീസ് അന്വേഷിച്ചെത്തിയാൽ പൊലീസിനെതിരെ പരാതി നൽകുകയാണ് പതിവ്. കഴിഞ്ഞ ദിവസം ഒ. വി റോഡിൽ നടന്ന കവർച്ചക്കേസിലും ഇയാൾക്ക് പങ്കുണ്ടോയെന്നുപൊലീസ് അന്വേഷിച്ച് വരികയാണ്. പൊലീസാണെന്ന് പറഞ്ഞ് തിരിച്ചറിയൽ കാർഡ് ആവശ്യപ്പെട്ടാണ് ഇതരസംസ്ഥാനതൊഴിലാളികളെ കൊള്ളയടിക്കുന്നത്.

കഴിഞ്ഞ ദിവസം ഒവി റോഡിൽ എം ആർ എ ബേക്കറിക്ക് സമീപത്ത് വച്ച് കൊൽക്കത്ത സ്വദേശി സഞ്്ജയിന്റെ മൊബൈൽ ഫോണാണ് പൊലീസ് ചമഞ്ഞെത്തിയ യുവാക്കൾ കണ്ണിൽ കുരുമുളക് സ്പ്രേ അടിച്ച് കവർന്നത്. രാവിലെ ജോലിക്ക് പോകുമ്പോഴായിരുന്നു ആക്രമണം പൊലീസാണെന്ന് പരിചയപ്പെടുത്തിയ രണ്ട് യുവാക്കൾ എവിടേക്ക് പോകുന്നുവെന്നും ഐഡന്റിറ്റി കാർഡ് കാണിക്കണമെന്നും ആവശ്യപ്പെടുകയായിരുന്നു.

ഐഡന്റിറ്റി കാർഡ് പോക്കറ്റിൽ നിന്ന് എടുക്കുന്നതിനിടെയാണ് കണ്ണിൽ കുരുമുളക് സ്പ്രേ അടിച്ചത്. ഇതിനിടയിൽ മൊബൈൽ ഫോൺ കവരുകയായിരുന്നു. തലശ്ശേരി പൊലീസിൽ പരാതി നൽകിയിട്ടുണ്ട്. മോഷ്ടാക്കൾ മാസ്‌ക്ക് ധരിച്ചിരുന്നു. പ്രദേശത്തെ സി സി ടി വി ദൃശ്യങ്ങൾ പൊലീസ് പരിശോധിച്ച് വരികയാണ്. ഈ സംഭവത്തിൽ ഇപ്പോൾ പിടിയിലായ അഖിലിന് പങ്കുണ്ടോയെന്ന കാര്യം പരിശോധിച്ചുവരികയാണ്.