തിരുവനന്തപുരം: കേരളത്തില് ഇന്നും കനത്ത മഴ തുടരാന് സാധ്യത. അടുത്ത മണിക്കൂറുകള്ക്കുള്ളില് ഒറ്റപ്പെട്ട ഇടങ്ങളില് കനത്ത മഴയുണ്ടാകും. തിരുവനന്തപുരം, പത്തനംതിട്ട, എറണാകുളം, പാലക്കാട്, മലപ്പുറം, തൃശൂര് ജില്ലകളില് ഇടിയോടു കൂടിയ മഴയുണ്ടാകാനും 40 കിലോമീറ്റര് വേഗത്തില് വീശിയടിക്കുന്ന കാറ്റിനും സാധ്യതയുണ്ട്.
14 വരെ കനത്ത മഴയുണ്ടാകുമെന്നാണ് കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. നാളെ ഉച്ചയോടെ വീണ്ടും മഴ കനക്കും. ബുധനാഴ്ചയും വ്യാഴാഴ്ചയും കനത്ത മഴയുണ്ടാകും. തെക്കന് കേരളത്തിലും മധ്യ കേരളത്തിലുമാണ് മഴ കൂടുതല് പെയ്യാന് സാധ്യത.
മത്സ്യത്തൊഴിലാളികള് ജാഗ്രത പാലിക്കണമെന്നു സംസ്ഥാന ദുരന്ത നിവാരണ അഥോറിറ്റി മുന്നറിയിപ്പ് നല്കിയിട്ടുണ്ട്. ബംഗാള് ഉള്ക്കടലില് രൂപം കൊണ്ട ചക്രവാതച്ചുഴി അറബിക്കടലിലേക്കു നീങ്ങുന്നതു മൂലമാണ് മഴ കൂടാന് കാരണം.