തിരുവനന്തപുരം: കേരളത്തില് തുലാവര്ഷം ആരംഭിച്ചതായി കേന്ദ്ര കാലാവസ്ഥ വകുപ്പ്. തെക്ക് കിഴക്കന് ബംഗാള് ഉള്ക്കടലിനും മധ്യ ബംഗാള് ഉള്ക്കടലിനും മുകളിലായി സ്ഥിതി ചെയ്യുന്ന ശക്തി കൂടിയ ന്യൂനമര്ദ്ദത്തിന്റെയും കോമാറിന് മേഖലയ്ക്ക് മുകളിലുള്ള ചക്രവാതച്ചുഴിയുടെയും സ്വാധീനഫലമായി തെക്കന് ബംഗാള്- മധ്യ ബംഗാള് ഉള്ക്കടലിന് മുകളില് വടക്ക് കിഴക്കന് കാറ്റ് ശക്തി പ്രാപിച്ചതിനാല് കേരളത്തിലും തമിഴ്നാട്ടിലും തുലാവര്ഷം ഇന്ന് എത്തിച്ചേര്ന്നതായി കേന്ദ്ര കാലാവസ്ഥ വകുപ്പ് അറിയിച്ചു.
ന്യൂനമര്ദ്ദത്തിന്റെയും ചക്രവാതച്ചുഴിയുടെയും സ്വാധീനഫലമായി ഇന്നുമുതല് ( ശനിയാഴ്ച ) ബുധനാഴ്ച വരെ സംസ്ഥാനത്ത് ഒറ്റപ്പെട്ട സ്ഥലങ്ങളില് ശക്തമായ മഴയാണ് പ്രവചിക്കുന്നത്. ഇന്ന് കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളില് യെല്ലോ അലര്ട്ട് പ്രഖ്യാപിച്ചു. നാളെയും തിങ്കളാഴ്ചയും കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്, പാലക്കാട് ജില്ലകളിലും ചൊവ്വാഴ്ച ഈ ജില്ലകള്ക്ക് പുറമേ മലപ്പുറം ജില്ലയിലും ഒറ്റപ്പെട്ട സ്ഥലങ്ങളില് ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളില് യെല്ലോ അലര്ട്ട് പ്രഖ്യാപിച്ചു.
അറബിക്കടലില് തേജ് ചുഴലിക്കാറ്റ് രൂപപ്പെട്ടു. അടുത്ത 12 മണിക്കൂറിനുള്ളില് തീവ്ര ചുഴലിക്കാറ്റായും തുടര്ന്നുള്ള 24 മണിക്കൂറിനുള്ളില് അതി തീവ്ര ചുഴലിക്കാറ്റായും ശക്തിപ്രാപിക്കാന് സാധ്യതയെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. തെക്ക് കിഴക്കന് ബംഗാള് ഉള്ക്കടലിനും മധ്യ ബംഗാള് ഉള്ക്കടലിനും മുകളിലായി ശക്തി കൂടിയ ന്യൂനമര്ദ്ദം സ്ഥിതിചെയ്യുന്നു. കോമറിന് മേഖലയ്ക്ക് മുകളില് ചക്രവാതച്ചുഴി നിലനില്ക്കുന്നുണ്ട്.
തെക്ക് പടിഞ്ഞാറന് അറബിക്കടലിനു മുകളിലായി സ്ഥിതി ചെയ്തിരുന്ന അതി തീവ്രന്യൂനമര്ദ്ദമാണ് ചുഴലിക്കാറ്റായി ശക്തി പ്രാപിച്ചത്. വരുംമണിക്കൂറുകളില് തീവ്ര ചുഴലിക്കാറ്റായും തുടര്ന്നുള്ള 24 മണിക്കൂറിനുള്ളില് അതി തീവ്ര ചുഴലിക്കാറ്റായും ശക്തി പ്രാപിക്കാന് സാധ്യതയുണ്ട്.
ഒക്ടോബര് 22ന് രാവിലെ വരെ വടക്ക് – വടക്ക് പടിഞ്ഞാറ് ദിശയിലും തുടര്ന്ന് ഒക്ടോബര് 24ന് രാവിലെ വരെ വടക്ക് പടിഞ്ഞാറ് ദിശയിലും പിന്നീട് വടക്ക് – വടക്ക് പടിഞ്ഞാറ് ദിശയിലും സഞ്ചരിച്ച് ഒക്ടോബര് 25 രാവിലെയോടെ യെമന് -ഒമാന് തീരത്ത് അല് ഗൈദാക്കിനും (യെമന് ) സലാലാക്കിനും ഇടയില് അതി തീവ്ര ചുഴലിക്കാറ്റ് കരയില് പ്രവേശിക്കാന് സാധ്യതയെന്നും കാലാവസ്ഥ വകുപ്പ് അറിയിച്ചു.
ഞായറാഴ്ചയോടെ, ബംഗാള് ഉള്ക്കടലിലെ ശക്തി കൂടിയ ന്യൂനമര്ദ്ദം, മധ്യ പടിഞ്ഞാറന് ബംഗാള് ഉള്ക്കടലിനു മുകളില് തീവ്ര ന്യുന മര്ദ്ദമായി ശക്തി പ്രാപിക്കാന് സാധ്യതയെന്നും മുന്നറിയിപ്പില് പറയുന്നു. തുടര്ന്നുള്ള 3 ദിവസം വടക്ക് – വടക്ക് പടിഞ്ഞാറ് ദിശയില് സഞ്ചരിച്ച് ബംഗ്ലാദേശ് പശ്ചിമ ബംഗാള് തീരത്തേയ്ക്ക് നീങ്ങാന് സാധ്യതയെന്നും കാലാവസ്ഥ വകുപ്പ് അറിയിച്ചു.