തിരുവനന്തപുരം: സംസ്ഥാനത്ത് വ്യാഴാഴ്ച വരെ കനത്ത മഴ തുടരുമെന്ന് കാലാവസ്ഥാ നിരീക്ഷണകേന്ദ്രം. മധ്യകിഴക്കന് അറബിക്കടലിലെ ന്യൂനമര്ദം തീവ്ര ന്യൂനമര്ദമായി മാറിയതിനു പിന്നാലെയാണ് സംസ്ഥാനത്ത് വീണ്ടും മഴ ശക്തിപ്പെട്ടത്.
തെക്കു കിഴക്കന് ബംഗാള് ഉള്ക്കടലിനോടു ചേര്ന്ന് തെക്ക് ആന്ഡമാന് കടലില് നിലനില്ക്കുന്ന ചക്രവാതച്ചുഴി 24 മണിക്കൂറിനുള്ളില് ന്യൂനമര്ദമായി മാറാന് സാധ്യതയുണ്ട്. ഇന്നും നാളെയും ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും വ്യാഴാഴ്ച 20 സെന്റിമീറ്റര് വരെയുള്ള തീവ്രമഴയ്ക്കുമാണു സാധ്യത.
ഇതു കണക്കിലെടുത്ത് ആലപ്പുഴ, കണ്ണൂര്, കാസര്ഗോഡ് ഒഴികെയുള്ള എല്ലാ ജില്ലകളിലും ഇന്ന് യെല്ലോ അലര്ട്ട് പ്രഖ്യാപിച്ചു. പത്തനംതിട്ട, കോട്ടയം, ഇടുക്കി, പാലക്കാട്, മലപ്പുറം, കോഴിക്കോട്, വയനാട് ജില്ലകളില് നാളെയും തിരുവനന്തപുരം, കൊല്ലം ഒഴികെയുള്ള ജില്ലകളില് വ്യാഴാഴ്ചയും യെല്ലോ അലര്ട്ട് പ്രഖ്യാപിച്ചു.