തായ്‌ലാന്‍ഡിലുമുണ്ടെടാ പിടി! രാഹുൽ മാങ്കൂട്ടത്തിലിന്റെ ഫേസ്ബുക്ക് റീച്ച് പണം നൽകി വാങ്ങിയത്‌; വീഡിയോ തെളിവുമായി ഇടത് സൈബർ ഹാൻഡിലുകൾ

കൊച്ചി: പാലക്കാട് എംഎൽഎ രാഹുൽ മാങ്കൂട്ടത്തിൽ തന്റെ സോഷ്യൽ മീഡിയ പേജുകൾക്ക് ലഭിക്കുന്ന സ്വീകാര്യത പണം നൽകി കൃത്രിമമായി ഉണ്ടാക്കിയതാണെന്ന ആരോപണവുമായി ഇടത് സൈബർ ഹാൻഡിലുകൾ രംഗത്തെത്തി. ഫേസ്ബുക്കിൽ രാഹുൽ പങ്കുവെക്കുന്ന വീഡിയോകൾക്ക് ലഭിക്കുന്ന ലക്ഷക്കണക്കിന് ലൈക്കുകളും വ്യൂസും തട്ടിപ്പാണെന്നും ഇതിനായി വലിയ രീതിയിൽ പണം ചെലവാക്കുന്നുണ്ടെന്നുമാണ് ഇവരുടെ പ്രധാന ആരോപണം. തെളിവായി വീഡിയോ ദൃശ്യങ്ങൾ സഹിതമാണ് ഇടത് പ്രൊഫൈലുകൾ ഈ പ്രചാരണം നടത്തുന്നത്. നിയമസഭാ തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ രാഷ്ട്രീയ മണ്ഡലത്തിൽ ഈ ആരോപണം വലിയ ചർച്ചകൾക്ക് വഴിമാറുകയാണ്.

വയനാട് ദുരിതാശ്വാസ ഫണ്ട് തട്ടിപ്പുമായി ബന്ധപ്പെട്ട സിപിഎം ആരോപണങ്ങൾക്കെതിരെ രാഹുൽ മാങ്കൂട്ടത്തിൽ പങ്കുവെച്ച വീഡിയോകൾക്ക് വലിയ തോതിലുള്ള പ്രതികരണങ്ങളാണ് ലഭിച്ചിരുന്നത്. “മറക്കരുത്…! നാളെ വോട്ട് ചെയ്യാൻ പോകുമ്പോൾ ഇക്കഴിഞ്ഞ പത്ത് വർഷം മറന്നു പോകരുത്” എന്ന കുറിപ്പോടെ അദ്ദേഹം പോസ്റ്റ് ചെയ്ത വീഡിയോയ്ക്ക് 1.37 ലക്ഷത്തിലധികം ലൈക്കുകളും ഇരുപത് ലക്ഷത്തോളം വ്യൂസും ലഭിച്ചു. വയനാട് ടൗൺഷിപ്പ് അടക്കമുള്ള വൈകാരിക വിഷയങ്ങളിലെ പ്രതികരണങ്ങൾക്കും സമാനമായ രീതിയിൽ വലിയ റീച്ച് ലഭിച്ചിരുന്നു. ഈ റീച്ച് സ്വാഭാവികമല്ലെന്നും കൃത്രിമ മാർഗങ്ങളിലൂടെ ഉണ്ടാക്കിയതാണെന്നുമാണ് പുതിയ ആരോപണം.

രാഹുലിന്റെ പോസ്റ്റുകൾക്ക് ലൈക്ക് ചെയ്തിരിക്കുന്ന പല ഐഡികളും തായ്‌ലൻഡ്, മലേഷ്യ തുടങ്ങിയ വിദേശ രാജ്യങ്ങളിൽ നിന്നുള്ള ഫേക്ക് പ്രൊഫൈലുകളാണെന്ന് ഇടത് സൈബർ ഗ്രൂപ്പുകൾ വീഡിയോ സഹിതം വ്യക്തമാക്കുന്നു. റിയാക്ഷൻ നൽകിയവരുടെ ലിസ്റ്റ് പരിശോധിക്കുമ്പോൾ വിദേശ പേരുകളിലുള്ള നിരവധി ഐഡികൾ കാണാനാകുന്നത് ഈ ആരോപണത്തിന് ബലം നൽകുന്നുവെന്നാണ് ഇവരുടെ പക്ഷം. എന്നാൽ, തന്റെ സോഷ്യൽ മീഡിയ റീച്ചിനെതിരെ ഉയരുന്ന ഈ പ്രചാരണങ്ങളോട് രാഹുൽ മാങ്കൂട്ടത്തിൽ ഇതുവരെ ഔദ്യോഗികമായി പ്രതികരിച്ചിട്ടില്ല. തിരഞ്ഞെടുപ്പ് പ്രചാരണം കൊഴുക്കുന്നതിനിടെ സൈബർ പോര് പുതിയ തലത്തിലേക്ക് നീങ്ങുകയാണ്.

Left-wing cyber handles have alleged that Palakkad MLA Rahul Mamkootathil is artificially inflating his social media reach by paying for Facebook likes, views, and comments. Pro-CPM profiles shared video evidence claiming that many reactions to his viral videos originate from fake accounts in countries like Thailand and Malaysia. This controversy follows the high engagement received on Mamkootathil’s videos regarding the Wayanad fund misappropriation allegations.