ന്യൂഡൽഹി: നീറ്റ് പരീക്ഷാ തട്ടിപ്പുകൾക്കെതിരെ സമരം നയിച്ച കോക്രോച്ച് ജനതാ പാർട്ടിയുടെ (CJP) പാർലമെന്റ് മാർച്ചിൽ പങ്കെടുത്ത വിദ്യാർഥികൾക്ക് നേരെയുണ്ടായ ക്രൂരമായ പോലീസ് അതിക്രമത്തിൽ കേന്ദ്ര സർക്കാരിനെ പ്രതിക്കൂട്ടിലാക്കി പ്രതിപക്ഷ നേതാവ് രാഹുൽ ഗാന്ധി. പോലീസ് അതിക്രമത്തിൽ പ്രതിഷേധിച്ച് കൈയിൽ കറുത്ത ബാൻഡ് അണിഞ്ഞാണ് രാഹുൽ വാർത്താസമ്മേളനത്തിന് എത്തിയത്. ജനാധിപത്യപരമായി പ്രതിഷേധിച്ച വിദ്യാർഥികൾ ആരും തന്നെ കുറ്റവാളികളല്ലെന്നും തങ്ങളുടെ അവകാശങ്ങൾക്ക് വേണ്ടിയുള്ള ന്യായമായ ആവശ്യങ്ങളാണ് അവർ ഉന്നയിച്ചതെന്നും അദ്ദേഹം വ്യക്തമാക്കി.
“ഭരണകൂടം ഇത്ര ക്രൂരമായി വേട്ടയാടാൻ വിദ്യാർഥികൾ ഇവിടെ എന്താണ് ചെയ്തത്? അവർ രാജ്യത്തെ തകർക്കാൻ വന്ന ഭീകരവാദികളല്ല, മറിച്ച് നമ്മുടെ രാജ്യത്തിന്റെ ശോഭനമായ ഭാവിയാണ്,” രാഹുൽ ഗാന്ധി ഓർമ്മിപ്പിച്ചു. നിരന്തരമായ പരീക്ഷാ തട്ടിപ്പുകൾ കാരണം രാജ്യത്തെ ലക്ഷക്കണക്കിന് വിദ്യാർഥികൾ കടുത്ത മാനസിക സമ്മർദ്ദത്തിലൂടെയാണ് കടന്നുപോകുന്നത്. പലരും നിരാശരായി ജീവിതം അവസാനിപ്പിക്കുകയാണെന്നും, വിദ്യാർഥികളുടെ ആവലാതികൾ കേൾക്കാനും അവരുടെ വേദന മനസ്സിലാക്കാനും കേന്ദ്ര ഭരണകൂടം തയ്യാറാകുന്നില്ലെന്നും അദ്ദേഹം കുറ്റപ്പെടുത്തി.
കഴിഞ്ഞ പത്തുവർഷത്തെ ബിജെപി ഭരണത്തിനിടയിൽ രാജ്യത്ത് ചെറുതും വലുതുമായ 152 മത്സരപ്പരീക്ഷകളുടെ ചോദ്യപേപ്പറുകളാണ് ചോർന്നതെന്ന് വ്യക്തമായ കണക്കുകൾ നിരത്തി രാഹുൽ ഗാന്ധി ആരോപിച്ചു. ഇത് കേവലം പരീക്ഷാ വീഴ്ചയല്ല, മറിച്ച് രാജ്യത്തെ ഏഴര കോടിയോളം വരുന്ന വിദ്യാർഥികളുടെയും അവരുടെ നിർധനരായ കുടുംബാംഗങ്ങളുടെയും പ്രതീക്ഷകളെയാണ് തല്ലിക്കെടുത്തിയത്. ഇന്ത്യയിലെ പരീക്ഷാ സമ്പ്രദായത്തെത്തന്നെ അട്ടിമറിച്ച കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജ്യത്തെ വിദ്യാഭ്യാസ സംവിധാനത്തെ പൂർണ്ണമായി തകർത്തുവെന്നും രാഹുൽ പറഞ്ഞു.
കേന്ദ്ര വിദ്യാഭ്യാസ മന്ത്രി എന്ന നിലയിൽ ധർമേന്ദ്ര പ്രധാൻ പരാജയപ്പെട്ട സാഹചര്യത്തിൽ അദ്ദേഹം അടിയന്തരമായി സ്ഥാനം രാജിവെക്കണമെന്ന വിദ്യാർഥികളുടെ ആവശ്യം നൂറുശതമാനം ന്യായമാണ്. ഈ തകർന്ന പരീക്ഷാ സംവിധാനം മുന്നോട്ടുകൊണ്ടുപോകാൻ അദ്ദേഹം ഒട്ടും പ്രാപ്തനല്ല. നിലവിലെ സാഹചര്യത്തിൽ ഇന്ത്യയിലെ യുവത്വത്തിന് യാതൊരുവിധ ഭാവിയുമില്ലാത്ത അവസ്ഥയാണ്. ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയുടെ കടന്നുവരവോടെ കോർപ്പറേറ്റ് മേഖലയിലെ തൊഴിലവസരങ്ങൾ പോലും ഇല്ലാതായിക്കൊണ്ടിരിക്കുകയാണെന്നും രാഹുൽ ആശങ്ക പ്രകടിപ്പിച്ചു.
വിദ്യാർഥി പ്രക്ഷോഭത്തിന് പൂർണ്ണ പിന്തുണ പ്രഖ്യാപിച്ച രാഹുൽ ഗാന്ധി കേന്ദ്ര സർക്കാരിന് മുന്നിൽ മൂന്ന് പ്രധാന ആവശ്യങ്ങൾ ഔദ്യോഗികമായി ഉന്നയിച്ചു. വിദ്യാഭ്യാസ മന്ത്രി ധർമേന്ദ്ര പ്രധാൻ അടിയന്തരമായി രാജിവെക്കുക, സമാധാനപരമായി പ്രതിഷേധിച്ച പെൺകുട്ടികളടക്കമുള്ള വിദ്യാർഥികളെ തെരുവിൽ തല്ലിച്ചതച്ച പോലീസ് ഉദ്യോഗസ്ഥർക്കെതിരെ കർശനമായ ക്രിമിനൽ നടപടി സ്വീകരിക്കുക, രാജ്യത്തെ യുവജനങ്ങളെ വഞ്ചിച്ചതിന് പ്രധാനമന്ത്രി നരേന്ദ്ര മോദി വിദ്യാർഥികളോട് പരസ്യമായി മാപ്പു പറയുക എന്നിവയാണ് പ്രതിപക്ഷം മുന്നോട്ടുവെക്കുന്ന ആവശ്യങ്ങൾ.
English Summary
Leader of the Opposition Rahul Gandhi strongly condemned the Delhi Police’s brutal lathi-charge on students protesting over exam irregularities, displaying video clips of the violence during a press conference. Wearing a black band on his arm as a sign of protest, Gandhi asserted that the students are not terrorists or criminals, but the future of the nation, who are raising just demands amid severe mental stress and rising suicides. He alleged that 152 paper leaks in the past decade have shattered the dreams of 7.5 crore students and their families. Demanding the immediate resignation of Union Education Minister Dharmendra Pradhan, disciplinary action against the violent police officers, and an apology from Prime Minister Narendra Modi, Gandhi stated that India’s youth are facing a bleak future, worsened by the impact of AI on corporate jobs.