ബർമിംഗ്ഹാം: കോമൺവെൽത്ത് ഗെയിംസിൽ ഇന്ത്യയുടെ മെഡൽ കുതിപ്പ് തുടരുന്നു. വനിതകളുടെ പതിനായിരം മീറ്റർ നടത്തത്തിൽ പ്രിയങ്ക ഗോസ്വാമി വെള്ളി സ്വന്തമാക്കി. കരിയറിലെ മികച്ച സമയം കണ്ടെത്തിയാണ് പ്രിയങ്കയുടെ മെഡൽ നേട്ടം.
49 മിനിറ്റും 38 സെക്കൻഡും കൊണ്ടാണ് പ്രിയങ്ക പതിനായിരം മീറ്റർ ദൂരം താണ്ടിയത്. കോമൺവെൽത്ത് ഗെയിംസ് അത്ലറ്റിക്സിൽ ഇന്ത്യയുടെ മൂന്നാം മെഡലാണിത്. ഇത്തവണത്തെ ഗെയിംസിൽ ഇന്ത്യയുടെ മെഡൽ നേട്ടം 27 ആയി.
മത്സരത്തിന്റെ തുടക്കത്തിൽ വളരെ വേഗത്തിൽ ലീഡിലേക്ക് കുതിച്ച പ്രിയങ്ക 4000 മീറ്റർ പിന്നിട്ടപ്പോൾ ഒന്നാമതായിരുന്നു. 8000 മീറ്റർ കിലോമീറ്റർ പിന്നിട്ടപ്പോൾ പ്രിയങ്ക മൂന്നാം സ്ഥാനത്തേക്ക് പിന്തള്ളപ്പെട്ടു. എന്നാൽ അവസാന 2000 മീറ്ററിൽ കുതിപ്പ് നടത്തിയ 26 കാരി രാജ്യത്തിനായി വെള്ളി മെഡൽ സ്വന്തമാക്കുകയായിരുന്നു. മത്സരത്തിലെ മറ്റൊരു ഇന്ത്യൻ താരം ഭാവന ജാട്ട് എട്ടാം സ്ഥാനത്താണ് ഫിനിഷ് ചെയ്തത്.
മത്സരത്തിലെ വിജയത്തോടെ റേസ് വാക്കിംഗിൽ മെഡൽ നേടുന്ന ആദ്യ ഇന്ത്യൻ വനിത താരമായി പ്രിയങ്ക മാറി. കഴിഞ്ഞ വർഷം നടന്ന ടോക്കിയോ ഒളിമ്പിക്സിൽ പ്രിയങ്ക 17-ാം സ്ഥാനത്തെത്തിയിരുന്നു.