കോട്ടയം:നിയമസഭാ തെരഞ്ഞെടുപ്പിൽ സീറ്റ് നൽകാതിരുന്ന നടപടിയിൽ പ്രതിഷേധിച്ച് കേരള കോൺഗ്രസ് നേതാവ് പി.സി.തോമസ് എൻഡിഎ വിട്ടു.പാർട്ടി സ്ഥാനാർഥികൾക്കെല്ലാം ഒറ്റചിഹ്നം തന്നെ ലഭിക്കാൻ കേരള കോണ്‍ഗ്രസ് ജോസഫ് വിഭാഗം രജിസ്ട്രേഷനുള്ള ചെറുപാർട്ടിയിൽ ലയിക്കാൻ നടത്തിയ നീക്കത്തിന്‍റെ കൂടി ഭാഗമാണ് തോമസിന്‍റെ നടപടി.
പി.സി. തോമസിന്‍റെ കേരള കോണ്ഗ്രസിൽ ജോസഫ് ഗ്രൂപ്പ് ലയിക്കുമെന്നാണ് വിവരം.ലയനം ഇന്ന് കടുത്തുരുത്തിയിൽ വച്ച് നടക്കും. കേരള കോണ്‍ഗ്രസ് ജോസഫ് ഗ്രൂപ്പിൽ നിന്നു പി.ജെ. ജോസഫിന്റെ നിർദേശ പ്രകാരം രണ്ടു പ്രമുഖ നേതാക്കളാണ് ലയന നീക്കങ്ങൾക്ക് ചുക്കാൻ പടിച്ചത്. ലയനത്തോടെ ജോസഫ് വിഭാഗത്തിന് കേരള കോൺഗ്രസ് എന്ന പേര് ലഭിക്കും.
ലയിച്ചതിനുശേഷം പാർട്ടിക്ക് പുതിയ പേര് നൽകും. കേന്ദ്ര തെരഞ്ഞെടുപ്പ് കമ്മീഷന്റെ പട്ടികയിൽ ചെണ്ട ചിഹ്നം ഇല്ലാത്തതിനാൽ മറ്റേതെങ്കിലും ചിഹ്നവും ആവശ്യപ്പെടും. പി.ജെ. ജോസഫ് തന്നെയായിരിക്കും ചെയർമാൻ. പി.സി. തോമസിനും ഇതിനോടു യോജിപ്പാണെന്നാണ് വിവരം. വർക്കിംഗ് ചെയർമാൻ സ്ഥാനമാണ് പി.സി. തോമസിന്‍റെ ആവശ്യം.
കെ.എം.മാണി നേതൃത്വം നല്‍കിയ കേരള കോണ്‍ഗ്രസ് എം. നേതാവായിരുന്ന പി.സി.തോമസ് പാര്‍ട്ടി വിട്ട്് ഐ.എഫ്.ഡി.പി പാര്‍ട്ടി രൂപീകരിച്ച് എന്‍.ഡി.എയിലെത്തിയിരുന്നു.പിന്നീട് ജോസഫിനൊപ്പം ഇടതുമുന്നണിയിലെത്തി. ഇടതുമുന്നണിയില്‍ നിന്ന് അവഗണന നേരിടുന്നു എന്ന് ചൂണ്ടിക്കാട്ടിയാണ് വീണ്ടും എന്‍ഡിഎയിലേക്ക് തിരിച്ചു പോയത്.
സീറ്റ് നിഷേധിച്ചതിനാലാണ് എന്‍ഡിഎ വിടുന്നതെന്ന് പിസി തോമസ് പ്രതികരിച്ചു. എന്‍ഡിഎയുടെ കേരളത്തിലെ ആദ്യ എംപിയാണു താന്‍. എന്നാല്‍ അവഗണന നേരിട്ടു മുന്നണിയില്‍ തുടരില്ലെന്ന് അദ്ദേഹം വ്യക്തമാക്കി.
സുപ്രീംകോടതി രണ്ടില ചിഹ്നം ജോസ് വിഭാഗത്തിന് അനുവദിച്ചതോടെ ആണ് കേരള കോണ്‍ഗ്രസ് ജോസഫ് വിഭാഗത്തിന് മുന്നില്‍ പാര്‍ട്ടി ചിഹ്നം ഒരു ചോദ്യചിഹ്നം ആയത്. പഞ്ചായത്ത് തെരഞ്ഞെടുപ്പില്‍ ജോസഫ് വിഭാഗം മത്സരിച്ച ചെണ്ട ചിഹ്നം കേന്ദ്ര തെരഞ്ഞെടുപ്പ് കമ്മീഷന്റെ പട്ടികയില്‍ ഇല്ല.
ഇതോടെ തെരഞ്ഞെടുപ്പില്‍ ജോസഫ് വിഭാഗം സ്ഥാനാര്‍ത്ഥികള്‍ക്ക് നിലവില്‍ ചിഹ്നം ഇല്ലാത്ത അവസ്ഥയായി. ഇനി സ്ഥാനാര്‍ഥികള്‍ക്ക് എല്ലാം ഒരു ചിഹ്നത്തില്‍ മത്സരിക്കണം എങ്കില്‍ പുതിയ പാര്‍ട്ടി രൂപീകരിക്കുകയോ മറ്റേതെങ്കിലും പാര്‍ട്ടിയില്‍ ലയിക്കുകയോ ചെയ്യണം. പത്രികാ സമര്‍പ്പണം പൂര്‍ത്തിയാകുന്നതിന് മുന്‍പ് പുതിയ പാര്‍ട്ടി രൂപീകരിച്ച് പുതിയ ചിഹ്നം നേടാനും സാധിക്കില്ല.
സ്ഥാനാര്‍ഥികള്‍ സ്വതന്ത്ര ചിഹ്നത്തില്‍ മത്സരിക്കുന്നതിനെക്കുറിച്ചും പാര്‍ട്ടി നേതൃത്വം ആലോചിച്ചിരുന്നു. എന്നാല്‍ വിപ്പ് നല്‍കുന്നതടക്കമുള്ള കാര്യങ്ങളിലെ സാങ്കേതിക പ്രശ്‌നങ്ങളും ഇതിന് വെല്ലുവിളി ആകുന്നുണ്ട്. ചിഹ്നം നഷ്ടപ്പട്ടത് തിരിച്ചടിയായി എന്ന് പാര്‍ട്ടി വിലയിരുത്തി.രജിസ്റ്റര്‍ ചെയ്യാത്ത രാഷ്ട്രീയ പാര്‍ട്ടിക്ക് തെരഞ്ഞെടുപ്പ് ഫണ്ട് സ്വീകരിക്കാനും കഴിയില്ല. ഈ സാഹചര്യത്തിലാണ് പുതിയ തീരുമാനമെന്ന് സൂചന.
പാര്‍ലമെന്റ് തിരഞ്ഞെടുപ്പില്‍ പി.സി.തോമസ് കോട്ടയത്ത് മത്സരിച്ചെങ്കിലും ബിജെപി വേണ്ടപോലെ പിന്തുണച്ചില്ലെന്ന് ആരോപണമുണ്ട്. തദ്ദേശ തിരഞ്ഞെടുപ്പില്‍ കേരള കോണ്‍ഗ്രസിനു സ്വാധീനമുള്ള മേഖലകളിലെ ബിജെപി സ്ഥാനാര്‍ഥികളുടെ വിജയത്തിനു പിന്നില്‍ തന്റെ പാര്‍ട്ടിയാണെന്ന വാദവും തോമസിനുണ്ട്.
പഞ്ചായത്ത് തെരഞ്ഞെടുപ്പിനുശേഷം ഘടകക്ഷിയായി യു.ഡി.എഫില്‍ ചേരുന്നതിനുള്ള ശ്രമങ്ങള്‍ നടത്തിയിരുന്നു. തുടര്‍ന്ന് നിയമസഭാ തെരഞ്ഞെടുപ്പില്‍ മുന്നണി വിപുലീകരിയ്ക്കുമെന്ന് പ്രഖ്യാപിയ്ക്കുകയും ചെയ്തു. എന്നാല്‍ തദ്ദേശഭരണ തെരഞ്ഞെടുപ്പിലെ പരീക്ഷണങ്ങള്‍ പരാജയപ്പെടതോടെയാണ് പി.സി.തോമസിനെ യു.ഡി.എഫ് കൈവിട്ടത്.
