പാലാ: നഗരസഭയിലെ ആഭ്യന്തര കലഹങ്ങൾ ഒടുവിൽ ഭരണപക്ഷത്തിനുള്ളിലെ തുറന്ന പൊട്ടിത്തെറിയിലേക്ക് വഴിമാറി. ചെയർപേഴ്സൺ ദിയാ ബിനു പുളിക്കകണ്ടത്തിന്റെ പ്രവർത്തന ശൈലിയിൽ കടുത്ത അതൃപ്തി രേഖപ്പെടുത്തിക്കൊണ്ടാണ് ഭരണപക്ഷത്തെ ആറ് അംഗങ്ങൾ യുഡിഎഫ് നേതൃത്വത്തെ സമീപിച്ചിരിക്കുന്നത്. നിലവിൽ നഗരസഭയിലെ യുഡിഎഫ് ഭരണം ഏതുനിമിഷവും താഴെവീഴാവുന്ന തരത്തിൽ അതീവ ഗുരുതരമായ സാഹചര്യത്തിലേക്കാണ് നീങ്ങുന്നത്. ഇതോടെ ഭരണം നിലനിർത്താനുള്ള നെട്ടോട്ടത്തിലാണ് യുഡിഎഫ് ജില്ലാ നേതൃത്വം.
പുളിക്കകണ്ടം കുടുംബാംഗങ്ങളായ മൂന്ന് സ്വതന്ത്ര കൗൺസിലർമാരുടെ നിർണ്ണായക പിന്തുണയോടെയാണ് പാലാ നഗരസഭയിൽ യുഡിഎഫ് ഭരണം മുന്നോട്ട് കൊണ്ടുപോകുന്നത്. എന്നാൽ, നഗരസഭയുടെ ഭരണകാര്യങ്ങളിൽ തങ്ങൾക്ക് യാതൊരുവിധ പരിഗണനയോ റോളോ ലഭിക്കുന്നില്ലെന്നാണ് വിമത കൗൺസിലർമാരുടെ പ്രധാന പരാതി. യുഡിഎഫിന്റെ ഔദ്യോഗിക കൗൺസിലർമാരായി നിന്നിട്ടും തങ്ങളെ പൂർണ്ണമായും അവഗണിച്ച്, പുളിക്കകണ്ടം കുടുംബത്തിലെ മൂന്ന് കൗൺസിലർമാർ ഏകാധിപത്യ സ്വഭാവത്തോടെയാണ് കാര്യങ്ങൾ കൈകാര്യം ചെയ്യുന്നതെന്ന് കത്തിൽ കൗൺസിലർമാർ കുറ്റപ്പെടുത്തുന്നു.
വൈസ് ചെയർപേഴ്സൺ മായ രാഹുലിന്റെ നേതൃത്വത്തിലാണ് കൗൺസിലർമാർ കത്ത് നൽകിയിരിക്കുന്നത്. മായ രാഹുലിനെ കൂടാതെ മറ്റ് അഞ്ച് ഭരണപക്ഷ കൗൺസിലർമാരും ഈ സംയുക്ത കത്തിൽ ഒപ്പുവെച്ചിട്ടുണ്ട്. ചെയർപേഴ്സണെ മാറ്റാതെ മുന്നോട്ട് പോകാൻ കഴിയില്ലെന്ന കർശന നിലപാടിലാണ് ഈ ആറംഗ സംഘം. കൗൺസിലർമാർ ഗ്രൂപ്പിൽ നിന്ന് ലെഫ്റ്റടിച്ചതിന് പിന്നാലെ കത്ത് കൂടി നൽകിയതോടെ യുഡിഎഫ് നേതൃത്വം അടിയന്തര പ്രതിരോധ നടപടികളിലേക്ക് കടന്നു.
ഭരണപ്രതിസന്ധി രൂക്ഷമായ സാഹചര്യത്തിൽ പ്രശ്നപരിഹാരത്തിനായി യുഡിഎഫിന്റെ നേതൃത്വത്തിൽ ഉന്നതതല അനുനയ ചർച്ചകൾ ആരംഭിച്ചിട്ടുണ്ട്. പാലാ നഗരസഭയിലെ 14 യുഡിഎഫ് കൗൺസിലർമാരെയും അടിയന്തരമായി വിളിച്ചുചേർത്താണ് ചർച്ച പുരോഗമിക്കുന്നത്. പ്രാദേശിക എംഎൽഎ മാണി സി. കാപ്പന്റെ വസതിയാണ് ഈ നിർണ്ണായക ചർച്ചയ്ക്ക് വേദിയാകുന്നത്. കൗൺസിലർമാരുടെ പരാതികൾ കേൾക്കാനും ഭരണം തകരാതെ കാക്കാനുമുള്ള തീവ്രശ്രമത്തിലാണ് നേതൃത്വം.
കേരള കോൺഗ്രസ് നേതാവും എംപിയുമായ ഫ്രാൻസിസ് ജോർജ് ഉൾപ്പെടെയുള്ള മുതിർന്ന യുഡിഎഫ് നേതാക്കൾ മാണി സി. കാപ്പന്റെ വസതിയിൽ നടക്കുന്ന അനുരഞ്ജന ചർച്ചകളിൽ നേരിട്ട് പങ്കെടുക്കുന്നുണ്ട്. ചെയർപേഴ്സൺ സ്ഥാനം സംബന്ധിച്ചോ അല്ലെങ്കിൽ പുളിക്കകണ്ടം കുടുംബത്തിന്റെ ഭരണപരമായ ഇടപെടലുകൾ നിയന്ത്രിക്കുന്നത് സംബന്ധിച്ചോ ഉള്ള ഉറപ്പുകൾ നൽകി വിമതരെ തണുപ്പിക്കാനാണ് നേതാക്കളുടെ ശ്രമം. വരും മണിക്കൂറുകളിൽ പുറത്തുവരുന്ന ചർച്ചാ തീരുമാനങ്ങൾ പാലാ നഗരസഭയുടെ ഭാവി നിർണ്ണയിക്കുന്നതിൽ നിർണ്ണായകമാകും.
English Summary
The political crisis in Pala Municipality worsened as six ruling coalition councilors revolted against Chairperson Diya Binu Pulikkakandam. Expressing a total loss of confidence in the Chairperson, the six UDF councilors submitted an official letter to the leadership, putting the stability of the local government at stake. The UDF has been ruling the municipality with the crucial support of three independent councilors from the Pulikkakandam family. However, the dissenting members, including Vice-Chairperson Maya Rahul, alleged that the three independent members are acting autocratically and sidelining official UDF councilors. In a bid to resolve the crisis, an emergency reconciliation meeting involving 14 UDF councilors is underway at MLA Mani C. Kappan’s residence, attended by senior leaders including Francis George MP.