തൃശൂര്: കേരള കോൺഗ്രസ് രാഷ്ട്രീയത്തിലും ഭരണതലത്തിലും കനക്കുന്ന വി.ഡി. സതീശൻ-അലോഷ്യസ് സേവ്യർ പോരിലേക്ക് എഐസിസി ജനറൽ സെക്രട്ടറി കെ.സി. വേണുഗോപാലും ഓർത്തഡോക്സ് സഭയും കൂടി ഉൾപ്പെട്ടതോടെ വിവാദം പുതിയ പരകോടിയിലേക്ക്. കെഎസ്യുവിനെ മുൻനിർത്തി മുഖ്യമന്ത്രി വി.ഡി. സതീശനെ വെട്ടാൻ നോക്കുന്ന കെ.സി. വേണുഗോപാലിന്റെ നീക്കങ്ങൾക്കെതിരെ കടുത്ത ഭാഷയിലുള്ള നയതന്ത്ര വിമർശനവുമായി ഓർത്തഡോക്സ് സഭ തൃശൂർ മെത്രാപ്പോലീത്ത യൂഹാനോൻ മാർ മിലിത്തിയോസ് രംഗത്തെത്തിയത് വലിയ രാഷ്ട്രീയ ഭൂകമ്പമാണ് സൃഷ്ടിച്ചിരിക്കുന്നത്. ഫേസ്ബുക്കിൽ ഇട്ട ഒറ്റവരി പോസ്റ്റിലൂടെയായിരുന്നു മെത്രാപ്പോലീത്തയുടെ ഈ കടുത്ത ആയുധ പ്രയോഗം. “കെസി പിള്ളേരെക്കൊണ്ട് ചൂടുചോറു വാരിച്ച് കേരളത്തിലെ പാർട്ടിയേയും വടക്കേ ഇൻഡ്യൻ പരുവത്തിലാക്കും” എന്നാണ് യൂഹാനോൻ മാർ മിലിത്തിയോസ് ഫേസ്ബുക്കിൽ കുറിച്ചത്. പാർട്ടിക്കുള്ളിലെ ഗ്രൂപ്പ് പോര് തീർക്കാൻ വിദ്യാർത്ഥി സംഘടനയെ കരുവാക്കുന്ന ഹൈക്കമാൻഡ് ശൈലിക്കെതിരെയുള്ള സഭയുടെ ഈ തുറന്ന പ്രതികരണം കോൺഗ്രസ് ക്യാമ്പുകളെ പൂർണ്ണമായി പ്രതിരോധത്തിലാക്കിയിരിക്കുകയാണ്.
ഗവൺമെന്റ് പ്ലീഡർമാരുടെ നിയമന വിവാദങ്ങൾക്കിടയിൽ മുഖ്യമന്ത്രിക്ക് കനത്ത തിരിച്ചടി നൽകിക്കൊണ്ട്, കെഎസ്യുവിന്റെ പോരാട്ടവീര്യം ഓർമ്മിപ്പിച്ച് ഫേസ്ബുക്ക് കുറിപ്പുമായി കെ.സി. വേണുഗോപാൽ രംഗത്ത് വന്നിരുന്നു. കെഎസ്യു സംസ്ഥാന പ്രസിഡന്റ് അലോഷ്യസ് സേവ്യറും മുഖ്യമന്ത്രി വി.ഡി. സതീശനും തമ്മിലുള്ള അഭിപ്രായ ഭിന്നതകൾ തെരുവിലേക്ക് പടരുന്നതിനിടയിലാണ് വേണുഗോപാലിന്റെ ഈ പഴയ കെഎസ്യു പ്രവർത്തനകാലം അനുസ്മരിച്ചുള്ള വരികൾ പുറത്തുവന്നത് എന്നത് ഇതിന്റെ രാഷ്ട്രീയ ലക്ഷ്യം വ്യക്തമാക്കുന്നു. ഇന്ന് കാണുന്ന ഇന്ത്യൻ നാഷണൽ കോൺഗ്രസിനെ കെട്ടിപ്പടുത്തത് കെഎസ്യുവിന്റെ സമാനതകളില്ലാത്ത പോരാട്ട വീര്യമാണെന്നും അതിനെ തള്ളിക്കളയാനാകില്ലെന്നുമാണ് കോൺഗ്രസ് നേതാവ് പ്രഫുല്ല ചന്ദ്രന്റെ അനുസ്മരണ കുറിപ്പിലൂടെ വേണുഗോപാൽ ഓർമ്മിപ്പിച്ചത്. അലോഷ്യസിനെ പരസ്യമായി അവഗണിച്ച സതീശന്റെ ശൈലിയോടുള്ള അതൃപ്തിയാണ് വേണുഗോപാൽ പ്രകടിപ്പിച്ചതെങ്കിലും, അത് പാർട്ടിയെ വടക്കേ ഇന്ത്യയിലെപ്പോലെ തകർച്ചയിലേക്ക് നയിക്കുമെന്നാണ് മെത്രാപ്പോലീത്ത മുന്നറിയിപ്പ് നൽകുന്നത്.
കഴിഞ്ഞ ദിവസങ്ങളിലാണ് കെ.എസ്.യുവും മുഖ്യമന്ത്രിയും തമ്മിലുള്ള അഭിപ്രായ ഭിന്നത പരസ്യമായ യുദ്ധത്തിലേക്ക് വഴിമാറിയത്. ഗവൺമെന്റ് പ്ലീഡർമാരുടെ പുതിയ നിയമനത്തിൽ മുൻപ് ക്യാമ്പസുകളിൽ കെ.എസ്.യുക്കാരെ തല്ലിച്ചതച്ച എബിവിപി, എസ്എഫ്ഐ പ്രവർത്തകരുണ്ടെന്നായിരുന്നു കെ.എസ്.യുവിന്റെ പ്രധാന വിമർശനം. എന്നാൽ കെ.എസ്.യുവല്ല, യുഡിഎഫ് സർക്കാറാണ് പ്ലീഡർമാരെ നിയമിക്കുന്നതെന്നും അതിൽ ഇടപെടാൻ വിദ്യാർത്ഥികൾക്ക് എന്ത് അവകാശമാണുള്ളതെന്നുമാണ് സതീശൻ തിരിച്ചടിച്ചത്. ഇതോടെ അഭിപ്രായ വ്യത്യാസം അതിന്റെ പരമാവധിയിലെത്തി. എറണാകുളം തേവര കോളേജിൽ നടന്ന ചടങ്ങിൽ ഇരുവരും മുഖാമുഖം കണ്ടെങ്കിലും വി.ഡി. സതീശൻ അലോഷ്യസിന് മുഖം കൊടുക്കാതെ തിരിഞ്ഞുനടന്ന ദൃശ്യങ്ങൾ വിവാദം കൊഴുപ്പിച്ചു.
English Summary
Orthodox Church Thrissur Metropolitan Yuhanon Mar Meletius launched a scathing attack on AICC General Secretary K.C. Venugopal via a Facebook post amid the ongoing rift between Chief Minister V.D. Satheesan and KSU. The Metropolitan wrote that Venugopal’s tactic of using students for political gains will ruin the Congress party in Kerala, turning it into the same decimated state as in North India. The comment comes after Venugopal publicly supported KSU’s legacy to counter CM Satheesan, who had earlier snubbed KSU President Aloysius Xavier over controversial government pleader appointments.