തിരുവനന്തപുരം: കേരള ഭാഗ്യക്കുറിയുടെ തിരുവോണം ബമ്പര് നറുക്കെടുത്തു. 25 കോടി രൂപയുടെ ഒന്നാം സമ്മാനം ലഭിച്ചത് TH577825 എന്ന നമ്പറിലുള്ള ടിക്കറ്റിനാണ്. ധനമന്ത്രി കെ.എന്.ബാലഗോപാലാണ് നറുക്കെടുത്തത്.
രണ്ടാം സമ്മാനമായി ഒരു കോടി രൂപ വീതം 20 പേര്ക്കും മൂന്നാം സമ്മാനമായി 50 ലക്ഷം വീതം 20 പേര്ക്കും നാലാം സമ്മാനമായി അഞ്ചുലക്ഷം വീതം 10 പരമ്പരകള്ക്കും അഞ്ചാം സമ്മാനമായി രണ്ടു ലക്ഷം വീതം 10 പരമ്പരകള്ക്കും നല്കുന്നു.
തിരുവോണം ബമ്പറിന്റെ 75 ലക്ഷം ടിക്കറ്റുകളാണ് ഇത്തവണ വിറ്റഴിച്ചത്.. പാലക്കാടായിരുന്നു ഏറ്റവും കൂടുതല് വില്പന. 14,07,100 ടിക്കറ്റുകള് അവിടെ വിറ്റു. 9,37,400 ടിക്കറ്റുകള് വിറ്റ തൃശ്ശൂര് ജില്ലയാണ് രണ്ടാമത്. മൂന്നാംസ്ഥാനം തിരുവനന്തപുരത്തിനാണ്. 8,75,900 ടിക്കറ്റുകള് വിറ്റു.
പൂജാ ബമ്പര് ടിക്കറ്റിന്റെ പ്രകാശനവും ഓണം ബമ്പര് നറുക്കെടുപ്പിനൊപ്പം നടന്നു. മുന്നൂറു രൂപ വിലയുള്ള പൂജാ ബമ്പര് ഭാഗ്യക്കുറിക്ക് അഞ്ച് പരമ്പരകളാണുള്ളത്. ഒന്നാം സമ്മാനം 12 കോടി രൂപയാണ്.