കൊല്ലം: കൊല്ലത്തെ പാരിപ്പള്ളിയിൽ പോലീസ് കസ്റ്റ‍ഡിയിൽനിന്നു പീഡനക്കേസ് പ്രതി രക്ഷപ്പെട്ടു. കോട്ടൂർകോണം സ്വദേശി പാക്കരൻ എന്നു വിളിക്കുന്ന വിഷ്ണു ആണ് രക്ഷപ്പെട്ടത്. വൈദ്യപരിശോധനയ്ക്ക് എത്തിച്ചപ്പോഴാണ് കൈവിലങ്ങുമായി പ്രതി രക്ഷപ്പെട്ടത്.
വൈകുന്നേരമാണ് സംഭവം. പീഡനക്കേസ് പ്രതിയായ വിഷ്ണുവിനെ വൈദ്യപരിശോധനയ്ക്കായി പാരിപ്പള്ളി പോലീസ് സ്റ്റേഷനിൽനിന്നു നെടുങ്കോലം സർക്കാർ ആശുപത്രിയിൽ എത്തിച്ചതായിരുന്നു. ഇതിനിടെ, ശുചിമുറിയിൽ പോകണമെന്നു പ്രതി പോലീസിനോട് പറഞ്ഞു.
ശുചിമുറിക്കു സമീപം പ്രതിയെ എത്തിച്ചപ്പോഴാണ് വിലങ്ങുമായി കടന്നുകളഞ്ഞത്. വൈദ്യപരിശോധന പൂർത്തിയാക്കി മജിസ്ട്രേറ്റിനു മുന്നിൽ ഹാജരാക്കാനിരിക്കെയാണ് പ്രതി രക്ഷപ്പെട്ടത്. പ്രതിയെ കണ്ടെത്താൻ പോലീസ് അന്വേഷണം ഊർജിതമാക്കി. വിവിധ പോലീസ് സ്റ്റേഷനുകളിൽ പാരിപ്പള്ളി പോലീസ് വിവരം നൽകിയിട്ടുണ്ട്.
കൊല്ലം: രണ്ട് കിലോ കഞ്ചാവുമായി കുളത്തൂപ്പുഴ സ്വദേശികളടക്കം ആറു യുവാക്കൾ അറസ്റ്റിൽ. ഇഎസ്എം കോളനി സ്വദേശികളായ ലിജു, സുധീപ് ഷാ, അഞ്ചൽ സ്വദേശികളായ ഉണ്ണികൃഷ്ണൻ, അനന്തു, ആരോമൽ, മോഹൻരാജ്, എന്നിവരാണ് കുളത്തുപ്പുഴ പോലീസിൻ്റെ പിടിയിലായത്. കുളത്തുപ്പുഴയിലെ ഒരു സ്വകാര്യ ലോഡ്ജ് കേന്ദ്രീകരിച്ചു നടത്തിയ അന്വേഷണത്തിലാണ് കഞ്ചാവുമായി പ്രതികളെ കണ്ടെത്തിയത്. രണ്ടു കിലോ 200 ഗ്രാം കഞ്ചാവാണ് കണ്ടെത്തിയത്.
