കൊച്ചി:മലയാള യുവതാരങ്ങളിൽ ഏറ്റവുമധികം ജനപ്രീതിയുള്ള നടനാണ് ധ്യാൻ ശ്രീനിവാസൻ. സിനിമകളിലൂടെയും അഭിമുഖങ്ങളിലൂടെയും പ്രേക്ഷക മനസ്സിൽ ഇടംപിടിക്കാൻ സാധിച്ച നടനാണ് ധ്യാൻ. സിനിമകൾക്ക് ലഭിക്കുന്നതിനേക്കാൾ സ്വീകാര്യതയാണ് ധ്യാൻ നൽകുന്ന ഓരോ അഭിമുഖങ്ങൾക്കും ലഭിക്കുന്നത്.
സിനിമയിൽ ഒട്ടേറെ സൗഹൃദങ്ങൾ സൂക്ഷിക്കുന്ന നടൻ കൂടിയാണ് ധ്യാൻ. ധ്യാനിന്റെ അടുത്ത സുഹൃത്തുക്കളിൽ ഒരാളാണ് നടൻ അജു വർഗീസ്. ധ്യാനിന്റെ ആദ്യ സംവിധാന സംരംഭമായ ലവ് ആക്ഷൻ ഡ്രാമയുടെ നിർമാതാക്കളിൽ ഒരാൾ അജു ആയിരുന്നു.
നിവിൻ പോളി നായകനായി എത്തിയ ചിത്രത്തിൽ നായികയായത് നയൻ‌താരയാണ്. ധ്യാനിന്റെ കഥപറയാനുള്ള കഴിവ് കൊണ്ടാണ് നയൻതാരയുടെ ഡേറ്റ് കിട്ടിയതെന്നാണ് അജു വർഗീസ് പറയുന്നത്. മൂവി വേൾഡ് മീഡിയ എന്ന ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു അജു.
അജു വർഗീസിന്റെ വാക്കുകൾ ഇങ്ങനെയാണ്:
‘എപ്പോഴും എല്ലാ കാര്യങ്ങളിലും തമാശ കൊണ്ടുവരാൻ ഇഷ്ടമാണ് ധ്യാന്. നല്ല കഥപറച്ചിലുകാരനാണ്. അല്ലെങ്കിൽ നിങ്ങൾക്ക് തോന്നുന്നുണ്ടോ ഒരു മണിക്കൂർ കൊണ്ട് നയൻതാരയെ പോലെയുളള ഒരു വലിയ താരത്തിന്റെ ഡേറ്റും ആയിട്ട് വരുമെന്ന്. അത് ഈ കള്ളത്തരം ഉള്ളത് കൊണ്ടല്ലേ. അപ്പോൾ പറഞ്ഞ കഥയേ അല്ല ലവ് ആക്ഷൻ ഡ്രാമയിലെ കഥ എന്നാണ് എനിക്ക് തോന്നുന്നത്. മാഡത്തിനോട് എന്തോ വലിയ പടമാണെന്നാണ് പറഞ്ഞിരുന്നത്. പാവം’- ചിരിച്ചുകൊണ്ട് അജു പറയുന്നു.
നയൻതാരയുമായി ഇന്നും ധ്യാനിന് നല്ല ബന്ധമാണുള്ളതും വേണമെങ്കിൽ ഇനിയും കഥ പറയാനുളള അവസരമൊക്കെ കിട്ടുമെന്നും അജു അഭിമുഖത്തിൽ പറഞ്ഞു.
താൻ ലൊക്കേഷനുകളിൽ നിൽക്കുമ്പോൾ ആളുകൾ ധ്യാനിന്റെ വിശേഷങ്ങൾ തന്നോട് വന്ന് ചോദിക്കാറുണ്ടെന്നും അജു വർഗീസ് പറഞ്ഞു. ‘ഞാൻ പല ഷൂട്ടിംഗ് ലൊക്കേഷനുകളിലും നിൽക്കുമ്പോൾ പ്രേക്ഷകർ ധ്യാനിന്റെ വിശേഷങ്ങൾ ചോദിച്ച് വരാറുണ്ട്. അതിനുമാത്രം സിനിമകൾ ഒന്നും ചെയ്യാതെ തന്നെ പ്രേക്ഷകരുടെ ഇഷ്ടം നേടാൻ കഴിയുന്നു എന്നത് ഒരു ഭാഗ്യം തന്നെയാണ്. ശരിക്കും ഒരു എന്റർടൈനർ തന്നെയാണ് ധ്യാൻ. ആരെയും വേദനിപ്പിച്ച് സംസാരിക്കാറില്ല. മുഖത്തുനോക്കി വിമർശിച്ച് ചിരിപ്പിക്കുന്ന വ്യക്തി കൂടിയാണ് ധ്യാൻ. ധ്യാനിന്റ വളർച്ചയിൽ സന്തോഷവാനാണെന്നും അജു കൂട്ടിച്ചേർത്തു.