ഇടുക്കി: ഭര്ത്താവിനെ കുടുക്കാന് കാമുകനുമായി ചേര്ന്ന് വാഹനത്തില് ലഹരി മരുന്നായ എംഡിഎംഎ ഒളിപ്പിച്ചെന്ന കേസില് ഒരാള് കൂടി അറസ്റ്റില്.കോഴിക്കോട് സ്വദേശി ശ്യാം റോഷ് (25) ആണ് പിടിയിലായത്. ഇക്കഴിഞ്ഞ ഫെബ്രുവരി 24 നാണ് കേസിനാസ്പദമായ സംഭവം നടന്നത്.
ഭര്ത്താവിനെ കുടുക്കാന് കാമുകനുമായി ചേര്ന്ന് വാഹനത്തില് ലഹരി മരുന്നായ എംഡിഎംഎ ഒളിപ്പിച്ചെന്ന കേസില് നേരത്തെ വണ്ടന്മേട് പഞ്ചായത്തിലെ 11-ാം വാര്ഡ് അംഗമായിരുന്ന സൗമ്യ എബ്രഹാം അറസ്റ്റിലായിരുന്നു. സൗമ്യയ്ക്ക് എംഡിഎംഎ ലഭ്യമാക്കിയത് ശ്യാം റോഷാണ്. ഇയാള് കോഴിക്കോട് നിന്ന് മയക്കുമരുന്ന് കൊച്ചിയില് എത്തിച്ചു നല്കുകയായിരുന്നു.
സൗമ്യയുടെ കൈവശം മയക്കുമരുന്ന് എത്തിച്ചു നല്കിയ ശാനവാസ്, ശെഫീന് ശാ എന്നിവര് നേരത്തെ പിടിയിലായിരുന്നു. സൗമ്യയുടെ കാമുകന്റെ സഹായികളായിരുന്നു ശാനവാസും ശെഫീന് ശായും. ഗള്ഫിലുള്ള കാമുകന്റെ ആസൂത്രണം അനുസരിച്ചാണ് കോഴിക്കോട് നിന്ന് എത്തിച്ച മയക്കുമരുന്ന് ഇരുവരും ചേര്ന്ന് യുവതിക്ക് കൈമാറിയത്.
മയക്കുമരുന്നിന്റെ ഉറവിടം തേടി വണ്ടന്മേട് പൊലീസും ഡാന്സാഫ് ടീമും സംയുക്തമായി നടത്തിയ തുടരനേഷണത്തിലാണ് ഇവര്ക്ക് എംഡി എം എ കോഴിക്കോടു നിന്നും എത്തിച്ചു നല്കിയ ശ്യാം റോഷ് പിടിയിലാകുന്നത്. പ്രതിയെ കോടതിയില് ഹാജരാക്കി റിമാന്ഡ് ചെയ്തു.
വണ്ടന്മേട് എസ് എച് ഒ വി എസ് നവാസ്, സിപിഒ ടിനോജ്, ഡാന്സാഫ് അംഗങ്ങളായ മഹേശ്വരന്, ജോഷി, ടോം സ്കറിയ എന്നിവരുടെ നേതൃത്വത്തിലുള്ള അന്വേഷണ സംഘമാണ് പ്രതിയെ പിടികൂടിയത്. പ്രധാന പ്രതികളില് ഒരാളായ സൗമ്യയുടെ കാമുകന് വിദേശത്തുള്ള വിനോദ് രാജേന്ദ്രന് ഇനിയും പിടിയിലായിട്ടില്ല. ഇയാളെ ഇന്ഡ്യയിലെത്തിച്ച് അറസ്റ്റ് ചെയ്യാനുള്ള ശ്രമങ്ങള് നടന്നു വരികയാണെന്ന് പൊലീസ് അറിയിച്ചു.