ഹൈദരാബാദ് : തെലങ്കാനയില് മൃഗഡോക്ടറായ യുവതിയുടെ കൊലപാതകവുമായി ബന്ധപ്പെട്ട് നാലു പേരെ പൊലീസ് കസ്റ്റഡിയിലെടുത്തു. പ്രധാന പ്രതിയെന്ന് സംശയിക്കുന്ന മുഹമ്മദ് പാഷ എന്ന ലോറി ഡ്രൈവര് ഉള്പ്പെടെ നാലു പേരെയാണ് കസ്റ്റഡിയില് എടുത്തത്. കസ്റ്റഡിയിലെടുത്തവര് ലോറി ഡ്രൈവര്മാരും ക്ലീനര്മാരുമാണ്.യുവതിയെ തട്ടിക്കൊണ്ടുപോയി കൂട്ടമാനഭംഗത്തിന് ഇരയാക്കിയ ശേഷം കൊലപ്പെടുത്തുകയായിരുന്നെന്നാണ് പൊലീസ് നിഗമനം.
ഡോക്ടറെ കഴുത്തു ഞെരിച്ചു കൊന്ന ശേഷം ബ്ലാങ്കറ്റില് പൊതിഞ്ഞ് മണ്ണെണ്ണയോ പെട്രോളോ ഒഴിച്ചു കത്തിക്കുകയായിരുന്നു.ബുധനാഴ്ച രാത്രിയാണ് ഇരുപത്തിയാറുകാരിയായ മൃഗ ഡോക്ടറെ കാണാതാകുന്നത്. ഷാദ്നഗറിലെ വീട്ടില്നിന്ന് ജോലി ചെയ്തിരുന്ന കൊല്ലുരു ഗ്രാമത്തിലെ മൃഗാശുപത്രിയിലേക്കു പോകുന്ന വഴിയാണ് സംഭവം. യാത്രാമധ്യേ വാഹനം ഷംഷാബാദിലെ ടോള് ബുത്തിനു സമീപം നിര്ത്തിയിട്ട് ഡെര്മറ്റോളജിസ്റ്റിനെ കാണാന് പോയെന്ന് അന്വേഷണത്തില് കണ്ടെത്തി.
ടോള് ബുത്തിനു സമീപം സ്ഥാപിച്ചിരിക്കുന്ന സിസിടിവിയില് യുവതിയുടെ ബൈക്ക് പാര്ക്കു ചെയ്തിരിക്കുന്നതും കാണാം.രാത്രി 9 മണിയോടെ തിരിച്ചെത്തിയ യുവതി ബൈക്കിന്റെ ടയര് പഞ്ചറായ നിലയിലാണ് കാണുന്നത്. രാത്രി 9.15ന് സഹോദരിയുമായി യുവതി ഫോണില് സംസാരിച്ചിരുന്നു. ടയര് നന്നാക്കാന് സഹായിക്കാമെന്നു സമീപത്തുള്ള ഒരാള് പറയുന്നതു ഫോണ് സംഭാഷണത്തില് കേട്ടിരുന്നുവെന്ന് സഹോദരി മൊഴി നല്കി.സമീപത്തു നിര്ത്തിയിട്ടിരിക്കുന്ന ലോഡ് നിറച്ച ട്രക്കുകളും അപരിചിതരായ പുരുഷന്മാരും തന്നെ ഭയപ്പെടുത്തുന്നെന്നും യുവതി സഹോദരിയോട് പറഞ്ഞു.
അടുത്തുള്ള ടോള് ഗേറ്റില് പോയി കാത്തിരിക്കാന് യുവതിയെ സഹോദരി ഉപദേശിച്ചു. അപരിചിതമായ സ്ഥലത്തു തങ്ങുന്നത് സുരക്ഷിതമല്ലെന്നും ഇരുചക്ര വാഹനം ഉപേക്ഷിച്ച് വീട്ടിലെത്താന് നിര്ദേശിച്ചിരുന്നതായും സഹോദരി പൊലീസിനോടു പറഞ്ഞു. കുറച്ചു സമയത്തിനു ശേഷം വീണ്ടും വിളിച്ചിരുന്നുവെങ്കിലും ഫോണ് സ്വിച്ച് ഓഫ് ആയിരുന്നു.എന്തോ പ്രശ്നമുണ്ടെന്നു മനസ്സിലാക്കിയ സഹോദരി രാത്രി പത്തോടെ ടോള് ബൂത്തില് എത്തിയെങ്കിലും ഒന്നും കണ്ടെത്താനായില്ല.
സഹോദരി ഉടനെ വിവരം ബന്ധുക്കളെ അറിയിച്ചു. തുടര്ന്ന് പരാതി നല്കാനായി ആര്ജിഐഎ പൊലീസ് സ്റ്റേഷനിലെത്തിയെങ്കിലും തങ്ങളുടെ സ്റ്റേഷന് പരിധിയിലല്ലെന്നു പറഞ്ഞ് ഷംഷാബാദ് സ്റ്റേഷനിലേക്ക് പറഞ്ഞയക്കുകയായിരുന്നു.പുലര്ച്ചെ നാലോടെയാണ് കോണ്സ്റ്റബിള്മാരെ അയച്ച് അന്വേഷണം തുടങ്ങിയതെന്നും പൊലീസ് കൃത്യസമയത്ത് ഉണര്ന്നു പ്രവര്ത്തിച്ചിരുന്നെങ്കില് യുവതിയുടെ ജീവന് രക്ഷിക്കാമായിരുന്നെന്നും ബന്ധുക്കളും ആരോപിച്ചു.
തന്റെ മകളുടെ ഘാതകരെ പൊതു മധ്യത്തില് വച്ച് ജീവനോടെ ചുട്ടുകരിക്കണമെന്ന് യുവതിയുടെ അമ്മ രോഷം കൊണ്ടു.ഷംഷാബാദിലെ ടോള് ബൂത്തിനു 30 കിമി അകലെ രംഗറെഡ്ഡി ജില്ലയില് 7.30നാണ് കത്തിക്കരിഞ്ഞ നിലയില് മൃതദേഹം കണ്ടെത്തിയത്. 70 ശതമാനത്തോളം കത്തിക്കരിഞ്ഞിരുന്നു. തിരിച്ചറിയാന് സാധിക്കാത്ത വിധം വികൃതമായ മൃതദേഹത്തില് നിന്നു ലഭിച്ച ഗണപതിയുടെ ലോക്കറ്റാണു തിരിച്ചറിയാന് ബന്ധുക്കളെ സഹായിച്ചത്.
വ്യാഴാഴ്ച രാവിലെ യുവതി വാഹനം പാര്ക്കു ചെയ്ത ടോള് ബൂത്തിനു സമീപം യുവതി ധരിച്ചിരുന്ന വസ്ത്രവും ചെരുപ്പും ഹാന്ഡ്ബാഗും ഒരു മദ്യക്കുപ്പിയും കണ്ടെത്തി. 9.30 നും 10നും ഇടയില് ഒരു ചെറുപ്പക്കാരന് ബൈക്ക് നന്നാക്കാനായി കൊണ്ടുവന്നെന്ന് അടുത്തുള്ള വര്ക്ക്ഷോപ്പ് ഉടമ പറഞ്ഞു.