കോഴിക്കോട്: വിഖ്യാത സാഹിത്യകാരൻ എം.ടി. വാസുദേവൻ നായരെയും കുടുംബത്തെയും അപകീർത്തിപ്പെടുത്തുന്ന തരത്തിൽ പുസ്തകം പ്രസിദ്ധീകരിച്ചെന്ന പരാതിയിൽ മകൾ അശ്വതി വി. നായരുടെ മൊഴി കോടതി രേഖപ്പെടുത്തി. കോഴിക്കോട് ജുഡീഷ്യൽ ഒന്നാം ക്ലാസ് മജിസ്ട്രേറ്റ് (നാല്) ദിവ്യ നടേശൻ മുൻപാകെയാണ് അശ്വതി നേരിട്ടെത്തി മൊഴി നൽകിയത്.
വിവാദമായ പുസ്തകം ഉടനടി പിൻവലിക്കണമെന്നും ഇതിന് പിന്നിൽ പ്രവർത്തിച്ച എഴുത്തുകാർക്കും പ്രസാധകർക്കുമെതിരെ നിയമനടപടി വേണമെന്നുമാണ് അശ്വതി ഹർജിയിൽ ആവശ്യപ്പെട്ടിരിക്കുന്നത്. ഹർജിയിന്മേലുള്ള തുടർന്നുള്ള നടപടികൾക്കായി കേസ് മെയ് രണ്ടിലേക്ക് കോടതി മാറ്റിവെച്ചു. അന്ന് പ്രമുഖ എഴുത്തുകാരുടെയും സാംസ്കാരിക പ്രവർത്തകരുടെയും മൊഴി കൂടി രേഖപ്പെടുത്തുമെന്ന് അശ്വതിയുടെ അഭിഭാഷകൻ എം.എസ്. സജി മാധ്യമങ്ങളോട് വ്യക്തമാക്കി.
ദീദി ദാമോദരനും എച്ച്മുക്കുട്ടിയും ചേർന്ന് എഴുതിയ ‘എംറ്റി സ്പേസ്: ബാഷ്പീകൃതയുടെ ആറാം വിരൽ’ എന്ന പുസ്തകമാണ് ഈ നിയമപോരാട്ടത്തിന് ആധാരമായത്. ബുക്ക് വേം എന്ന സ്ഥാപനം പ്രസിദ്ധീകരിച്ച ഈ പുസ്തകത്തിൽ എം.ടി.യുടെ സ്വകാര്യ ജീവിതത്തെയും കുടുംബത്തെയും മോശമായി ചിത്രീകരിക്കുന്നു എന്നതാണ് പ്രധാന പരാതി.
കുടുംബത്തിന്റെ യാതൊരുവിധ അനുമതിയുമില്ലാതെയാണ് ഇത്തരമൊരു പുസ്തകം രചിക്കപ്പെട്ടതെന്നും ഇത് ബോധപൂർവം അപകീർത്തിപ്പെടുത്താൻ ലക്ഷ്യമിട്ടുള്ളതാണെന്നും അശ്വതി കോടതിയെ ബോധിപ്പിച്ചു. മലയാള സാഹിത്യത്തിലെ ഇതിഹാസ തുല്യനായ ഒരാളെക്കുറിച്ച് വസ്തുതാവിരുദ്ധമായ കാര്യങ്ങൾ പ്രചരിപ്പിക്കുന്നത് ഗൗരവകരമാണെന്ന് പരാതിയിൽ ചൂണ്ടിക്കാട്ടുന്നു. പുസ്തകം പിൻവലിക്കണമെന്ന കുടുംബത്തിന്റെ ആവശ്യം പ്രസാധകർ നേരത്തെ തള്ളിയിരുന്നു.
ഈ വിവാദവുമായി ബന്ധപ്പെട്ട് എം.ടി.യുടെ മറ്റൊരു മകളായ സിത്താര ഗിമ്രെ നേരത്തെ സമൂഹമാധ്യമങ്ങളിലൂടെ ശക്തമായ പ്രതിഷേധം രേഖപ്പെടുത്തിയിരുന്നു. പുസ്തകത്തിലെ പരാമർശങ്ങൾ തങ്ങളുടെ കുടുംബത്തിന് വലിയ മാനസിക വിഷമമുണ്ടാക്കിയെന്നും അനുമതിയില്ലാതെ എം.ടി.യെക്കുറിച്ച് ഇത്തരം കാര്യങ്ങൾ എഴുതുന്നത് ശരിയല്ലെന്നും സിത്താര പോസ്റ്റിൽ വ്യക്തമാക്കിയിരുന്നു.
കുടുംബം ആവർത്തിച്ച് ആവശ്യപ്പെട്ടിട്ടും പുസ്തകം വിപണിയിൽ നിന്ന് പിൻവലിക്കാൻ എഴുത്തുകാരോ പ്രസാധകരോ തയ്യാറാവാത്ത പശ്ചാത്തലത്തിലാണ് നിയമസഹായം തേടാൻ അവർ തീരുമാനിച്ചത്. മലയാള സാഹിത്യ ലോകത്ത് വലിയ ചർച്ചകൾക്ക് വഴിമരുന്നിട്ടിരിക്കുകയാണ് ഈ നിയമപോരാട്ടം. എം.ടി. എന്ന വ്യക്തിയുടെ സ്വകാര്യതയും എഴുത്തുകാരന്റെ ആവിഷ്കാര സ്വാതന്ത്ര്യവും തമ്മിലുള്ള തർക്കമായി ഇത് വിലയിരുത്തപ്പെടുന്നു.
Aswathy V. Nair, daughter of legendary writer M.T. Vasudevan Nair, recorded her statement before the Kozhikode Judicial First Class Magistrate Court in a defamation case. The case pertains to the book ‘MT Space: Bashpeekruthayude Aaram Viral,’ written by Didi Damodaran and Echmukutty, which the family claims defames MT and his family. The court has scheduled further proceedings and additional witness statements for May 2nd