ചണ്ഡിഗഢ്: ഇന്നത്തെ ഇന്ത്യ ജവഹർലാൽ നെഹ്രുവിന്റെയോ, മഹാത്മാഗാന്ധിയുടെയോ അല്ല, പ്രധാനമന്ത്രി നരേന്ദ്രമോദിയുടെയും ആഭ്യന്തരമന്ത്രി അമിത്ഷായുടെയുമാണെന്ന വിവാദ പ്രസ്താവനയുമായി ഹരിയാണയിലെ ബിജെപി എംഎൽഎ ലീലാ റാം ഗുർജാർ. പൗരത്വ നിയമ ഭേദഗതിയെ അനുകൂലിച്ച് കെയ്ഥലിൽ നടന്ന ഒരു പരിപാടിയിൽ സംസാരിക്കുകയായിരുന്നു അദ്ദേഹത്തിന്റെ ഈ വിവാദ പ്രസ്താവന.
രാജ്യത്തുള്ള മുസ്ലീങ്ങളെ രാജ്യം വിട്ടുപോകാൻ നിർബന്ധിക്കുന്ന ഒരു ഗൂഢാലോചനയാണ് ഇതെന്നാണ് മുസ്ലീങ്ങൾ കരുതുന്നതെങ്കിൽ അത്തരത്തിലുള്ള ഒന്നും ഇതിന് പിറകിലില്ലെന്ന് ഞാൻ പറയാൻ ആഗ്രഹിക്കുകയാണ്. എന്നാൽ അനധികൃതമായി രാജ്യത്തെത്തിയവർ നിർബന്ധമായും പുറത്തേക്ക് പോകേണ്ടി വരും ലീലാ റാം ഗുർജാർ പറഞ്ഞു.
ഇത് മൻമോഹൻ സിങ്ങിന്റെയോ, ജവഹർലാൽ നെഹ്റുവിന്റേയോ, ഗാന്ധിയുടെയോ ഇന്ത്യയല്ല, നരേന്ദ്രമോദിയുടെയും അമിതിഷായുടെയും ഇന്ത്യയാണെന്ന് ജനങ്ങളോട് പറയാൻ ആഗ്രഹിക്കുന്നു. എതിരായി എന്തെങ്കിലും അടയാളം കിട്ടിയാൽ ഒരു നിമിഷത്തിനുള്ളിൽ അവരെ ഞങ്ങൾ തുടച്ചുമാറ്റും. – ഗുർജാർ കൂട്ടിച്ചേർത്തു.