തിരുവനന്തപുരം: ചെങ്ങന്നൂര് ചെറിയനാട് ഭാസ്കരക്കാരണവര് കൊലക്കേസില് മുഖ്യപ്രതി ഷെറിന് ശിക്ഷായിളവ് നല്കാന് മന്ത്രിസഭ തീരുമാനിച്ചത് വിവാദമായിരിക്കുകയാണ്. മന്ത്രിസഭായോഗ തീരുമാനം ഗവര്ണര് അംഗീകരിക്കുമോ എന്നാണ് ഏവരും ഉറ്റുനോക്കുന്നത്. അതിനിടെ, മുന്ഗണനാ മാനദണ്ഡം മറികടന്നാണ് ഈ തീരുമാനം എടുത്തതെന്ന ആരോപണം ശക്തമായി. മോചനശുപാര്ശ അതിവേഗത്തിലാണ് മന്ത്രിസഭായോഗത്തില് എത്തിയത്. ശുപാര്ശ ഒറ്റ മാസം കൊണ്ടാണ് ആഭ്യന്തരവകുപ്പ് വഴി മന്ത്രിസഭാ യോഗത്തില് എത്തിയത്. 20 വര്ഷം ശിക്ഷയനുഭവിച്ച രോഗികളായ സ്ത്രീകള് ഉള്പ്പെടെ ജയിലില് തുടരുന്നുണ്ട്. ഇവരെയൊന്നും പരിഗണിച്ചിട്ടില്ലെന്നാണ് ആക്ഷേപം.
എല്ലാ നിയമവശങ്ങളും ഗവര്ണര് രാജേന്ദ്ര അര്ലേക്കര് തേടും. വിശദ നിയമോപദേശവും തേടും. ഏത് സാഹചര്യത്തിലാണ് ഷെറിന് മാത്രമായി ശിക്ഷാ ഇളവ് നല്കുന്നതെന്നും പരിശോധിക്കും. ഷെറിന് നല്ല നടപ്പ് കിട്ടാനുള്ള യോഗ്യതയുണ്ടോ എന്നും പരിശോധിക്കും. ഷാരോണ് വധക്കേസും ഗ്രീഷ്മയുടെ കൊലക്കയറും ചര്ച്ചയാകുന്ന അതേ സമയത്താണ് ഷെറിന് ശിക്ഷാ ഇളവ് നല്കാനുള്ള തീരുമാനം.
ഷെറിന് മാനസാന്തരപ്പെട്ടെന്നും ജയിലിലെ നല്ലനടപ്പ് പരിഗണിച്ചാണ് ഇളവിന് ശുപാര്ശ ചെയ്തതെന്നുമാണ് കണ്ണൂര് വനിതാ ജയില് ഉപദേശകസമിതി അംഗം എം.വി.സരളയുടെ പ്രതികരണം. ഉപദേശകസമിതി പ്രത്യേക പരിഗണനയൊന്നും ഷെറിന് നല്കിയിട്ടില്ല. മോചിപ്പിക്കുന്നതില് പ്രശ്നമില്ലെന്ന് പൊലീസും കണ്ടെത്തിയെന്നും എല്ലാക്കാലത്തും ഒരാളെ കുറ്റവാളിയായി കാണരുതെന്നും എം.വി.സരള പറഞ്ഞു.
ജ്യോതികുമാര് ചാമക്കാലയുടെ ആരോപണം
ഭാസ്കര കാരണവര് വധക്കേസ് പ്രതി ഷെറിന്റെ ജയില്മോചനത്തിനായി മന്ത്രി കെ.ബി.ഗണേഷ്കുമാര് ഇടപെട്ടെന്ന് ജ്യോതികുമാര് ചാമക്കാല.ഒരു ചാനല് ചര്ച്ചയിലാണ് ചാമക്കാലയുടെ ആരോപണം. കെ ബി ഗണേശ് കുമാറിന്റെ ഓഫീസ് ഇടപെട്ടാണ് അവരെ സഹായിച്ചത്. അതിന്റെ തെളിവുകള് വരും ദിവസങ്ങളില് പുറത്തുവരുമെന്നും ചാമക്കാല പറഞ്ഞു. ഗണേഷിന്റെ അനുയായി കോട്ടാത്തല പ്രദീപും ഇടപെട്ടു. പ്രതിയോടൊപ്പം പ്രദീപ് പലവട്ടം പൊലീസ് സ്റ്റേഷനില് പോയിട്ടുണ്ട്. പറഞ്ഞത് തെറ്റാണെങ്കില് തനിക്കെതിരെ കേസെടുക്കട്ടെയെന്നും ജ്യോതികുമാര് പറഞ്ഞു.
ചാമക്കാലയുടെ വാക്കുകള്:
ഇവര് പത്തനാപുരം സ്വദേശിയാണ്, ഇവരെ സംബന്ധിച്ച് പരോള് ലഭിച്ച് സ്റ്റേഷനില് പോയി ഒപ്പിടണമെന്ന് പറയുമ്പോള് അവരോടൊപ്പം എല്ലാ ദിവസവും പോകുന്നത് കെ ബി ഗണേശ് കുമാറിന്റെ സന്തത സഹചാരി പ്രദീപാണ്. ഞാന് ചലഞ്ച് ചെയ്യുന്നു പ്രദീപും ഈ സ്ത്രീയും ഉള്പ്പെടെ എല്ലാ ദിവസവും പോയി ഒപ്പിട്ടതിന്റെയും പ്രദീപ് കൂടെ പോയതിന്റെയും സിസിടിവി ദൃശ്യങ്ങള് പത്തനാപുരം സ്റ്റേഷനില് പരിശോധിച്ചാല് കിട്ടും, ഇല്ലെങ്കില് എനിക്കെതിരെ കേസെടുക്കട്ടെ. ഞാന് ഒരാളെക്കുറിച്ചേ പറയുന്നുള്ളു ഇനിയാരെങ്കിലുമുണ്ടോയെന്ന് അറിയില്ല.
സിസിടിവി ദൃശ്യങ്ങള് സൂക്ഷിക്കണമെന്ന് പറയാനായി എസ്പിയെ വിളിച്ചപ്പോള് അദ്ദേഹം ഫോണ് എടുത്തില്ല, ഇല്ലെങ്കില് അദ്ദേഹത്തോട് അത് പറയുമായിരുന്നു. പരോള് കാലയളവിലാണ് സ്റ്റേഷനില് ഒപ്പിടേണ്ടുന്ന ദിവസം അവരെ കൊണ്ടുവന്നിട്ട് ആരോടും സംസാരിക്കാതെ റൈറ്ററുടെ അടുത്തെത്തിച്ച് ഒപ്പീടിച്ച് കൊണ്ടുപോകുന്നത് ഈ പ്രദീപായിരുന്നു. ഇല്ലെങ്കില് പറയട്ടെ അല്ലായെന്ന് അല്ലെങ്കില് തനിക്കെതിരെ കേസെടുക്കട്ടെയെന്നനും ചാമക്കാല വെല്ലുവിളിച്ചു.
സംസ്ഥാനത്തെ ജയിലുകളിലെ ജീവപര്യന്തം തടവുകാരായ വനിതകളില് ഏറ്റവും കൂടുതല് പരോള് ലഭിച്ചവരില് ഒരാള് ഷെറിനാണ്. പലപ്പോഴായി ഒരു വര്ഷത്തിലേറെ സമയം ഇവര് പരോളിലായിരുന്നു. ശിക്ഷിക്കപ്പെട്ട് തിരുവനന്തപുരം അട്ടക്കുളങ്ങര ജയിലിലായിരുന്നു ഷെറിന്. പിന്നീട് തൃശൂര് വിയ്യൂര് ജയിലിലേക്കും പിന്നാലെ അട്ടക്കുളങ്ങരയിലേക്കു മാറ്റി. 2 വര്ഷം മുന്പ് കണ്ണൂര് വനിതാ ജയിലിലേക്ക് ഷെറിനെ മാറ്റിയിരുന്നു.
പ്രമാദമായ ഭാസ്കര കാരണവര് കൊലക്കേസില് ജീവപര്യന്തം തടവിന് ശിക്ഷിക്കപ്പെട്ട ഷെറിനെ ജയിലില് നിന്നും പുറത്തിറക്കാന് മന്ത്രിസഭായോഗം തീരുമാനിച്ചതിന് പിന്നില് ഇടതു മുന്നണി നേതാവെന്ന് നേരത്തെ ആരോപണം ഉയര്ന്നിരുന്നു. ജനം ടിവിയിലെ മുതിര്ന്ന മാധ്യമ പ്രവര്ത്തകന് അനില് നമ്പ്യാരുടെ പോസ്റ്റാണ് വൈറലായത്. ആരാണെന്ന പേര് വിളിപ്പെടുത്താതെയാണ് ചിലതെല്ലാം അനില് നമ്പ്യാര് കുറിച്ചത്. പരോളിലിറങ്ങുന്ന ഷെറിനെ ജയില് വളപ്പില് നിന്നും കൂട്ടിക്കൊണ്ടു പോയിരുന്നത് ഇടതുമുന്നണിയിലെ ഒരു പ്രമുഖ കക്ഷിയുടെ നേതാവിന്റെ വാഹനത്തിലായിരുന്നു. (ഇദ്ദേഹത്തിന്റെ പേര് തല്ക്കാലം രഹസ്യമാക്കി വെക്കുന്നു). ഈ ‘മാന്യന്’ സ്ത്രീ വിഷയത്തില് ഇതിന് മുമ്പ് അന്തസ്സുള്ള ഭര്ത്താക്കന്മാരില് നിന്നും അടി വാങ്ങി കുപ്രസിദ്ധി നേടിയ ആളാണ്.ശിക്ഷായിളവിനുള്ള ഫയല് ജയില് ഉപദേശക സമിതിയുടെ ശുപാര്ശയോടെ ദ്രുതവേഗം മന്ത്രിസഭയ്ക്ക് മുന്നിലെത്തിയതും അനുകൂല തീരുമാനം എടുപ്പിച്ചതും ഈ നേതാവാണെന്നതില് സംശയമില്ല-അനില് നമ്പ്യാര് കുറിക്കുന്നു.
അനില് നമ്പ്യാരുടെ ഫെയ്സ് ബുക്ക് പോസ്റ്റ് ചുവടെ
പ്രമാദമായ ഭാസ്കര കാരണവര് കൊലക്കേസില് ജീവപര്യന്തം തടവിന് ശിക്ഷിക്കപ്പെട്ട ഷെറിനെ ജയിലില് നിന്നും പുറത്തിറക്കാന് മന്ത്രിസഭായോഗം തീരുമാനിച്ചു.ഇനി ഗവര്ണറുടെ അംഗീകാരം കൂടി ലഭിച്ചാല് മതി.
ഷെറിന് ശിക്ഷായിളവ് നല്കാന് തീരുമാനിച്ചത് അവര് 14 വര്ഷം തടവ് പൂര്ത്തിയാക്കിയത് കൊണ്ടാണത്രെ.
കേരളത്തിലെ ജയിലുകളില് 14 വര്ഷം കഴിഞ്ഞിട്ടും തടവ് ശിക്ഷയനുഭവിക്കുന്ന സ്ത്രീകളുണ്ടെന്നത് മന്ത്രിസഭയ്ക്ക് അറിയാത്തതാണോ?
അപ്പൊ ഷെറിന് എന്താണ് പ്രത്യേക പരിഗണന?
അട്ടക്കുളങ്ങര വനിതാജയിലിലെ സ്ഥിരം പ്രശ്നക്കാരിയായ തടവുകാരിയായിരുന്നു
ഷെറിന്. എന്നിട്ടും ഇവര്ക്ക് ഉന്നത ഉദ്യോഗസ്ഥര് ഇടപെട്ട് ജയിലില് എല്ലാ സുഖസൗകര്യങ്ങളും അനുവദിച്ചിരുന്നു.
ജയിലുദ്യോഗസ്ഥരെ അനുസരിക്കാതിരുന്നതിനും സഹതടവുകാരോട് മോശമായി പെരുമാറിയതിനും ഇടക്കാലത്ത് ഷെറിനെ തിരുവനന്തപുരത്ത് നിന്നും വിയ്യൂര് സെന്ട്രല് ജയിലിലേക്ക് മാറ്റിയിരുന്നു.
അവിടെയും ഇവര് പ്രശ്നങ്ങളുണ്ടാക്കി. പോയ വേഗതയില് തന്നെ തിരികെ അട്ടക്കുളങ്ങരയിലെത്തി ഷെറിന് രാജകുമാരി കണക്കെ വാണത് ഉന്നത ഉദ്യോഗസ്ഥരില് ചിലര്ക്ക് ഇവരോടുള്ള
മമത കൊണ്ടായിരുന്നു.
ഈയൊരു സ്വാധീനത്താല് ഷെറിന് അടിക്കടി പരോളും ലഭിച്ചിരുന്നു.
പരോളിലിറങ്ങുന്ന ഷെറിനെ ജയില് വളപ്പില് നിന്നും കൂട്ടിക്കൊണ്ടു പോയിരുന്നത് ഇടതുമുന്നണിയിലെ ഒരു പ്രമുഖ കക്ഷിയുടെ നേതാവിന്റെ വാഹനത്തിലായിരുന്നു.
(ഇദ്ദേഹത്തിന്റെ പേര് തല്ക്കാലം രഹസ്യമാക്കി വെക്കുന്നു)
ഈ ‘മാന്യന്’ സ്ത്രീ വിഷയത്തില് ഇതിന് മുമ്പ് അന്തസ്സുള്ള ഭര്ത്താക്കന്മാരില് നിന്നും അടി വാങ്ങി കുപ്രസിദ്ധി നേടിയ ആളാണ്.ശിക്ഷായിളവിനുള്ള ഫയല് ജയില് ഉപദേശക സമിതിയുടെ ശുപാര്ശയോടെ ദ്രുതവേഗം മന്ത്രിസഭയ്ക്ക്
മുന്നിലെത്തിയതും അനുകൂല തീരുമാനം എടുപ്പിച്ചതും ഈ നേതാവാണെന്നതില് സംശയമില്ല.
ചെറിയനാട് ഭാസ്കര കാരണവര് വധക്കേസിലെ പ്രതി ഷെറിന് ശേഷിക്കുന്ന ശിക്ഷാ കാലയളവ് ഇളവ് ചെയ്ത് ജയിലില്നിന്നു വിട്ടയയ്ക്കുന്നതിന് ഗവര്ണറോടു ശുപാര്ശ ചെയ്യാന് മന്ത്രിസഭാ യോഗം തീരുമാനിച്ചത് കഴിഞ്ഞ ദിവസമാണ്. കണ്ണൂര് ജയില് ഉപദേശക സമിതിയുടെ ശുപാര്ശയും നിയമ വകുപ്പിന്റെ അഭിപ്രായവും പരിഗണിച്ചാണു തീരുമാനം. അസാധാരണ മന്ത്രിസഭാ യോഗ തീരുമാനമാണ് ഇതെന്നാണ് വിലയിരുത്തല്. ചെറിയനാട് തുരുത്തിമേല് കാരണവേഴ്സ് വില്ലയില് ഭാസ്കര കാരണവരെ (66) കൊലപ്പെടുത്തിയ കേസില് മരുമകള് ഷെറിനു മൂന്നു ജീവപര്യന്തം തടവാണ് 2010 ജൂണില് മാവേലിക്കര അഡീഷനല് സെഷന്സ് അതിവേഗ കോടതി വിധിച്ചത്.
ശിക്ഷ ഒരേ കാലയളവില് അനുഭവിച്ചാല് മതിയെന്നും വിധിയില് ചൂണ്ടിക്കാട്ടിയിരുന്നു. ജീവപര്യന്തം തടവുശിക്ഷ എന്നാല് ജീവിതാവസാനം വരെയുള്ള തടവാണെങ്കിലും 14 വര്ഷം ജയിലില് കഴിഞ്ഞാല് ഇളവു നല്കുന്ന കാര്യം സര്ക്കാരിനു പരിഗണിക്കാം. ഷെറിന് 14 വര്ഷത്തെ ജയില് വാസം പൂര്ത്തിയാക്കിയതിനെ തുടര്ന്ന് കഴിഞ്ഞ ഓഗസ്റ്റ് 8ന് ചേര്ന്ന ജയില് ഉപദേശക സമിതി, വിട്ടയയ്ക്കാന് ശുപാര്ശ ചെയ്തിരുന്നു.
2009 നവംബര് 8നു രാവിലെയാണ് ഭാസ്കര കാരണവരെ കിടപ്പുമുറിയില് കൊല്ലപ്പെട്ട നിലയില് കണ്ട്. മകന് ബിനു പീറ്റര് കാരണവര്, മരുമകള് ഷെറിന്, കൊച്ചുമകള് ഐശ്വര്യ അന്ന കാരണവര് എന്നിവരുടെ പേരില് കാരണവര് ആദ്യം റജിസ്റ്റര് ചെയ്ത ആധാരം റദ്ദ് ചെയ്തതിലുള്ള വിരോധം മൂലം ഷെറിന് മറ്റു പ്രതികളായ ബാസിത് അലി, നിധിന്, ഷാനു റഷീദ് എന്നിവരുടെ സഹായത്തോടെ കൊലപ്പെടുത്തിയെന്നാണ് പ്രോസിക്യൂഷന് കേസ്. മൂന്നുപേരും ഇപ്പോഴും ജയിലിലാണ്.