തിരുവനന്തപുരം: ആന്റിബയോട്ടിക്കുകളുടെ അമിത ഉപയോഗം തടയാനുള്ള നടപടികള് കൂടുതല് ശക്തമാക്കും. കേരള ആന്റി മൈക്രോബിയല് റെസിസ്റ്റന്സ് സ്ട്രാറ്റജിക് ആക്ഷന് പ്ലാന് എന്ന കാര്സാപ്പിന്റെ ഭാഗമായി 450 ഫാര്മസികളുടെ ലൈസന്സ് സസ്പെന്ഡ് ചെയ്യുകയും അഞ്ചെണ്ണം റദ്ദാക്കുകയും ചെയ്തത് ഈ സൂചനയാണ് നല്കുന്നത്.
മന്ത്രി വീണാ ജോര്ജിന്റെ നേതൃത്വത്തില് എഎംആര് ഉന്നതതലയോഗം ഇന്നലെ ചേര്ന്നു. പാല്, ഇറച്ചി, മീന് എന്നിവയില് ആന്റിബയോട്ടിക് അവശിഷ്ടം കണ്ടെത്തുന്നതിന് പരിശോധനകള് ശക്തമാക്കാന് യോഗം നിര്ദേശം നല്കി. കാലിത്തീറ്റകളിലെയും കോഴിത്തീറ്റകളിലെയും ആന്റിബയോട്ടിക്കുകളുടെ അളവു കുറയ്ക്കാന് സമഗ്രമായ നടപടി സ്വീകരിക്കാനും നിര്ദേശം നല്കി. കേരളത്തിലെ എല്ലാ ആശുപത്രികളെയും ആന്റിബയോട്ടിക് സ്മാര്ട്ട് ആശുപത്രികളാക്കുന്നതിന്റെ ഭാഗമായി ഒരു കളര് കോഡിംഗ് കൊണ്ടുവരാനും തീരുമാനിച്ചു.
മൂന്നു മാസത്തിനുള്ളില് എല്ലാ ആശുപത്രികളിലും ഇതു നടപ്പിലാക്കും. ആന്റിബയോട്ടിക് സാക്ഷരതയുടെ ഭാഗമായി തദ്ദേശ സ്ഥാപനങ്ങള്ക്കുള്ള മാര്ഗരേഖ പുറത്തിറക്കും. ഇനിമുതല് നിര്ബന്ധമായും ആന്റിബയോട്ടിക്കുകള് തിരിച്ചറിയാനായി നീലക്കവറില് മാത്രമേ നല്കാന് പാടുള്ളൂ. എല്ലാ ആശുപത്രികളും മെഡിക്കല് സ്റ്റോറുകളും ഫാര്മസികളും ഇതു നടപ്പിലാക്കണമെന്നും തീരുമാനിച്ചു.
ഡോക്ടറുടെ കുറിപ്പടിയില്ലാതെ ആന്റിബയോട്ടിക്കുകള് വില്ക്കുന്ന ഫാര്മസികളുടെ ലൈസന്സ് റദ്ദാക്കുമെന്ന് നേരത്തെ. കര്സാപ്പ് (കേരള ആന്റി മൈക്രോബിയല് റെസിസ്റ്റന്സ് സ്ട്രാറ്റജിക് ആക്ഷന് പ്ലാന്) യോഗം തീരുമാനിച്ചിരുന്നു. കേരളത്തിലെ ആന്റിബയോട്ടിക് പ്രതിരോധത്തിന്റെ തോത് അറിയാനും അതനുസരിച്ച് പ്രതിരോധ പ്രവര്ത്തനങ്ങള് ക്രോഡീകരിക്കാനുമായി ഇന്ത്യയിലാദ്യമായി ആന്റി ബയോഗ്രാം (എഎംആര് സര്വെയലന്സ് റിപ്പോര്ട്ട്) പുറത്തിറക്കിയിരുന്നു.
ഇതനുസരിച്ച് പല രോഗാണുക്കളിലും ആന്റിബയോട്ടിക് പ്രതിരോധത്തിന്റെ തോത് കൂടിവരുന്നതായി കണ്ടെത്തിയിരുന്നു. ഈ സാഹചര്യത്തിലാണ് കര്ശന നടപടി സ്വീകരിക്കാന് തീരുമാനിച്ചത്. മാത്രമല്ല മൃഗങ്ങള്ക്കിടയിലും പരിസ്ഥിതി, ഫിഷറീസ്, അക്വാകള്ച്ചര് തുടങ്ങിയ വിഭാഗങ്ങളില് നടന്ന പഠനങ്ങളിലും ആന്റിബയോട്ടിക് പ്രതിരോധം കൂടി വരുന്നതായാണ് കണ്ടു വരുന്നത്. എല്ലാ മേഖലകളിലുമുള്ള അശാസ്ത്രീയമായ ആന്റി ബയോട്ടിക്കുകളുടെ ഉപയോഗമാണ് ഇതിലേക്ക് നയിച്ചത്.
മനുഷ്യരില് മാത്രമല്ല, മൃഗപരിപാലനം, കോഴിവളര്ത്തല്, മത്സ്യകൃഷി തുടങ്ങിയവയിലും കൂടുതലായി അശാസ്ത്രീയമായി ആന്റി ബയോട്ടിക്കുകള് ഉപയോഗിക്കുന്നതായി കണ്ടെത്തിയിട്ടുണ്ട്. മാത്രമല്ല പരിസ്ഥിതിയില് നിന്നും ശേഖരിച്ച സാമ്പിളുകളില് പോലും ആന്റിബയോട്ടിക്കുകളെ പ്രതിരോധിക്കാന് കഴിവുള്ള ബാക്ടീരിയകളേയും ജീനുകളേയും ആന്റിബയോട്ടിക് അംശവും കണ്ടെത്തിയിട്ടുണ്ട്.
ആന്റിബയോട്ടിക് പ്രതിരോധം കൂടാനുള്ള ഒരു മുഖ്യ കാരണമായി വിലയിരുത്തിയത് ഡോക്ടറുടെ കുറിപ്പടിയില്ലാതെ ഫാര്മസികളില് നിന്നും നേരിട്ട് ആന്റിബയോട്ടിക്കുകള് വാങ്ങി കഴിക്കുന്നതു കൊണ്ടാണ്. അത് കര്ശനമായി വിലക്കിക്കൊണ്ടുള്ള നടപടിയാണ് ആരോഗ്യ വകുപ്പ് സ്വീകരിക്കുന്നത്. ആന്റിബയോട്ടിക് സാക്ഷരതയ്ക്കുള്ള പ്രവര്ത്തനങ്ങള് ഊര്ജിതപ്പെടുത്തുന്നതിന്റെ ഭാഗമായി മാധ്യമങ്ങളുടെ പിന്തുണയോടെ അവബോധവും ശക്തിപ്പെടുത്തും.
കാര്ബപെനം മരുന്നുകളെ പ്രതിരോധിക്കാന് കഴിവുള്ള രക്തത്തിലുള്ള അണുബാധകളെ പ്രത്യേകം നോട്ടിഫയബിള് കണ്ടീഷനാക്കി പ്രഖ്യാപിക്കുന്നത് പരിശോധിക്കും. കേരളത്തിലെ ഏത് ആശുപത്രിയിലും കാര്ബപെനം മരുന്നുകളെ പ്രതിരോധിക്കാന് കഴിവുള്ള രക്തത്തിലുള്ള അണുബാധ കണ്ടെത്തിക്കഴിഞ്ഞാല് അത് ആരോഗ്യ വകുപ്പിനെ അറിയിക്കാന് നിര്ദേശം നല്കി.
1. മിക്ക അണുബാധകളും വൈറസ് മൂലമാണ് ഉണ്ടാകുന്നത്. അതിനാല് ഇവയ്ക്കെതിരെ ആന്റിബയോട്ടിക്കുകള് ഫലപ്രദമല്ല.
2. ഡോക്ടറുടെ നിര്ദ്ദേശാനുസരണം മാത്രമേ ആന്റിബയോട്ടിക്കുകള് ഉപയോഗിക്കാവൂ.
3. ഒരിക്കലും ആന്റിബയോട്ടിക്കുകള് ആവശ്യപ്പെടുകയോ ഡോക്ടറുടെ കുറിപ്പടി ഇല്ലാതെ വാങ്ങി കഴിക്കുകയോ ചെയ്യരുത്.
4. ചികിത്സ കഴിഞ്ഞു ശേഷിക്കുന്ന ആന്റിബയോട്ടിക്കുകള് ഒരിക്കലും ഉപയോഗിക്കരുത്.
5. ശേഷിക്കുന്നതോ കാലഹരണപ്പെട്ടതോ ആയ ആന്റിബയോട്ടിക്കുകള് കരയിലോ ജലാശയങ്ങളിലോ വലിച്ചെറിയരുത്.
6. രോഗശമനം തോന്നിയാല് പോലും ഡോക്ടര് നിര്ദേശിച്ച കാലയളവിലേക്ക് ആന്റിബയോട്ടിക് ചികിത്സ പൂര്ത്തിയാക്കണം.
7. ആന്റിബയോട്ടിക്കുകള് ഒരിക്കലും മറ്റുള്ളവരുമായി പങ്കിടാന് പാടില്ല.
8. അണുബാധ തടയുന്നതിന് പതിവായി കൈ കഴുകുക.
9. രോഗികളുമായുളള സമ്പര്ക്കം ഒഴിവാക്കുക.
10. പ്രതിരോധ കുത്തിവയ്പുകള് കാലാനുസൃതമായി എടുക്കുക.