ശ്രീനഗര്: ജമ്മു കശ്മീരിലെ പഹല്ഗാമില് വിനോദ സഞ്ചാരികള്ക്കുനേരെയുണ്ടായ ഭീകരാക്രമണത്തില് 20 ലേറെ പേര് കൊല്ലപ്പെട്ടതായി വിവരം. എന്നാല് ഔദ്യോഗികമായ കണക്കുകള് ഇതുവരെ പുറത്തുവന്നിട്ടില്ല. മരണസംഖ്യ 20-ല് കൂടുതലാകാമെന്ന് ഒരു ഉന്നത ഉദ്യോഗസ്ഥനെ ഉദ്ധരിച്ച് പിടിഐ റിപ്പോര്ട്ട് ചെയ്തു.
നിരവധി ആളുകള്ക്ക് പരിക്കേല്ക്കുകയും ചെയ്തിട്ടുണ്ട്. ജമ്മുകശ്മീരില് 2019ന് ശേഷം നടക്കുന്ന ഏറ്റവും വലിയ ഭീകരാക്രമണമാണ് പഹല്ഗാമില് നടന്നത്. ജമ്മു കശ്മീരിലെ പഹല്ഗാമിലുള്ള ബൈസാറനിലാണ് ഭീകരാക്രമണം ഉണ്ടായത്. വിനോദ സഞ്ചാരികള്ക്ക് നേരെ ഭീകരര് വെടിയുതിര്ക്കുകയായിരുന്നുവെന്നാണ് പ്രാഥമിക വിവരം.
ഭീകരാക്രമണത്തെ തുടര്ന്ന് പ്രദേശത്ത് നിരവധി വിനോദ സഞ്ചാരികള് കുടുങ്ങിയിട്ടുണ്ട്. ഇതില് മലയാളികളും ഉള്പ്പെട്ടിട്ടുണ്ടെന്നാണ് സ്ഥിരീകരിക്കാത്ത വിവരം. സമീപ വര്ഷങ്ങളില് സാധാരണക്കാരെ ലക്ഷ്യംവെച്ച് നടന്ന ആക്രമണത്തേക്കാള് വളരെ വലുതാണ് പഹല്ഗാമിലുണ്ടായതെന്ന് ജമ്മു കശ്മീര് മുഖ്യമന്ത്രി ഒമര് അബ്ദുള്ള പറഞ്ഞിരുന്നു.