പഴയങ്ങാടി: വിവിധ പേരുകളില്‍ പല സ്ഥലങ്ങളില്‍ സ്ത്രീകളെ പ്രലോഭിപ്പിച്ച് കല്യാണ വിവാഹത്തട്ടിപ്പ് നടത്തുന്ന അലിയാസ് എന്ന് വിളിക്കുന്ന എറണാകുളം പറവൂര്‍ സ്വദേശി എം.പി ശ്രീജത്ത്(52) അറസ്റ്റില്‍. പഴയങ്ങാടി എസ്.ഐ ഇ ജയചന്ദ്രനാണ് കണ്ണൂരില്‍ വച്ച് ഇയാളെ അറസ്റ്റ് ചെയ്തത്. ഗ്രാമങ്ങളിലെ വിവാഹബ്യൂറോയുമായി ബന്ധപ്പെട്ട് ഉന്നത ബിരുദമുണ്ടെന്നും ലോക്കോ പൈലറ്റ് തസ്തികയില്‍ ജോലി ചെയ്തു വരികയാണെന്നും കാണിച്ചാണ് പേര് റജിസ്റ്റര്‍ ചെയ്തത്.
പഴയങ്ങാടി കുളവയലിന് സമീപമുള്ള സ്ത്രീയുടെ കൂടെ നിയമപരമായി കല്യാണം കഴിക്കാതെ താമസിച്ച് വരികയായിരുന്നു. ഇതിനിടയിലാണ് പഴയങ്ങാടിയിലെ ഒരു വിവാഹബ്യൂറോ വഴി സ്ത്രീകളുടെ ഫോണ്‍ നമ്പര്‍ സംഘടിപ്പിച്ച് അവരുമായി ബന്ധം സ്ഥാപിക്കുകയും സ്ത്രീകളെ പ്രലോഭിപ്പിച്ച് കൂടെ കൊണ്ടുപോവുകയും പീഡിപ്പിക്കുകയും സ്വര്‍ണവും പണവും കൈക്കലാക്കുകയുമായിരുന്നു.
വെങ്ങരയിലെ സ്ത്രീയെ പ്രലോഭിപ്പിച്ച് വശത്താക്കി പയ്യന്നൂര്‍,കണ്ണൂര്‍,ഗുരുവായൂര്‍ കന്യാകുമാരി തുടങ്ങിയ സ്ഥലങ്ങളില്‍ കൂട്ടികൊണ്ടു പോയി പീഡിപ്പിച്ചതായി പറയുന്നു. ഇവരുടെ പരാതിയെ തുടര്‍ന്നാണ് പോലീസ് ഇയാളെ അറസ്റ്റ് ചെയ്തത്. ഇയാളെ പയ്യന്നൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു.
