മറയൂര്: കത്തുന്ന വേനല്ച്ചൂടില് കേരളം കാട്ടുതീ ഭീഷണിയില് നില്ക്കെ, മറയൂരില്നിന്ന് വരുന്നത് ഓരോ സ്ഥാപനവും മാതൃകയാക്കേണ്ട പോരാട്ടത്തിന്റെ കഥയാണ്. കാന്തല്ലൂര് വെട്ടുക്കാട്ടിലെ അഞ്ചുനാട് കോളേജ് ഓഫ് അപ്ലൈഡ് സയന്സിലേക്ക് ആഞ്ഞുവീശിയ കാട്ടുതീയെ അധ്യാപകരും വിദ്യാര്ത്ഥികളും ചേര്ന്ന് തോല്പ്പിച്ചത് സമയോചിതമായ ഇടപെടലിലൂടെയാണ്. ഒരു നിമിഷത്തെ പകച്ചുനില്ക്കലോ ശ്രദ്ധക്കുറവോ ഉണ്ടായിരുന്നെങ്കില് 150-ഓളം ജീവനുകള് അപകടത്തിലാകുമായിരുന്നു. ദുരന്തമുഖത്ത് എങ്ങനെ പതറാതെ പ്രവര്ത്തിക്കണം എന്നതിന്റെ വലിയൊരു പാഠമാണ് ഈ സംഭവം നല്കുന്നത്.
ഐ.എച്ച്.ആര്.ഡിക്ക് കീഴിലുള്ള ഈ കോളേജ് ഒരു കുന്നിന്മുകളിലാണ് സ്ഥിതി ചെയ്യുന്നത്. മൂന്നു വശവും വലിയ ചരിവുകളാല് ചുറ്റപ്പെട്ട കാടാണ്. ഉച്ചയ്ക്ക് ഒന്നരയോടെ ഭക്ഷണസമയത്താണ് വയര് കരിയുന്ന ഗന്ധം പ്രിന്സിപ്പല് ജി. ശ്രീകുമാറിന്റെയും ജീവനക്കാരന് ഇന്ദ്രജിത്തിന്റെയും ശ്രദ്ധയില്പ്പെട്ടത്. പുറത്തിറങ്ങി നോക്കുമ്പോള് കുന്നിന് താഴെനിന്ന് തീ കോളേജ് കെട്ടിടത്തിന് നേരെ ഇരച്ചുകയറുന്നതാണ് കണ്ടത്. നിമിഷനേരം കൊണ്ട് കെട്ടിടത്തിന് ചുറ്റും തീ പടര്ന്നതോടെ 150-ഓളം വിദ്യാര്ത്ഥികളും ജീവനക്കാരും കോളേജിനുള്ളില് കുടുങ്ങിപ്പോകുന്ന സാഹചര്യമുണ്ടായി.
അപകടം തിരിച്ചറിഞ്ഞ ഉടന് തന്നെ പ്രിന്സിപ്പലിന്റെ നേതൃത്വത്തില് രക്ഷാപ്രവര്ത്തനം ഏകോപിപ്പിച്ചു. ഭയന്നോടുന്നതിന് പകരം ഓരോരുത്തരും ഉത്തരവാദിത്തങ്ങള് ഏറ്റെടുത്തു. ഷോര്ട്ട് സര്ക്യൂട്ട് വഴിയുള്ള ഇരട്ടി ദുരന്തം ഒഴിവാക്കാന് ആദ്യം തന്നെ മെയിന് സ്വിച്ച് ഓഫാക്കി. ടെറസില് അടിഞ്ഞുകൂടിയ കരിയിലകള്ക്കും പ്ലാസ്റ്റിക് കസേരകള്ക്കും ഇതിനകം തീ പിടിച്ചിരുന്നു. കത്താന് സാധ്യതയുള്ള സാധനങ്ങള് ഉടന് തന്നെ സുരക്ഷിത സ്ഥാനത്തേക്ക് മാറ്റി. കോളേജിലെ ടാങ്കുകളില്നിന്ന് പൈപ്പുകള് വഴി വെള്ളമെത്തിച്ച് കെട്ടിടത്തിലേക്ക് പടര്ന്ന തീ വിദ്യാര്ത്ഥികള് തന്നെ അണയ്ക്കാന് തുടങ്ങി.
തുടര്ന്ന് മറയൂര് പോലീസും വനംവകുപ്പും സ്ഥലത്തെത്തിയതോടെയാണ് തീ പൂര്ണ്ണമായും നിയന്ത്രണവിധേയമായത്. പ്ലാസ്റ്റിക് പൈപ്പുകളും കേബിളുകളും കത്തിനശിച്ചെങ്കിലും വലിയൊരു കെട്ടിടം തന്നെ ചാരമാകുന്നത് ഒഴിവാക്കാന് ഈ കൂട്ടായ്മയ്ക്ക് കഴിഞ്ഞു. കേരളത്തിലെ പല വിദ്യാഭ്യാസ സ്ഥാപനങ്ങളും സര്ക്കാര് ഓഫീസുകളും ആശുപത്രികളും വനമേഖലയോട് ചേര്ന്നോ അല്ലെങ്കില് കാടുപിടിച്ചുകിടക്കുന്ന ഭൂമിക്ക് അടുത്തോ ആണ് പ്രവര്ത്തിക്കുന്നത്.
മറയൂരിലെ ഈ സംഭവം നല്കുന്ന മുന്നറിയിപ്പുകള് ഇവയാണ്:
ഫയര് ബെല്റ്റുകള്: കെട്ടിടത്തിന് ചുറ്റുമുള്ള പുല്ലും ഉണങ്ങിയ ഇലകളും കൃത്യമായി നീക്കം ചെയ്ത് ഫയര് ബെല്റ്റുകള് ഒരുക്കണം.
അഗ്നിശമന സംവിധാനം: കോളേജുകളില് മോട്ടോറുകള് പ്രവര്ത്തിപ്പിക്കാനുള്ള ബാക്കപ്പ് സൗകര്യവും വെള്ളവും എപ്പോഴും ലഭ്യമായിരിക്കണം.
മോക് ഡ്രില്ലുകള്: കാട്ടുതീ പടര്ന്നാല് എന്ത് ചെയ്യണം എന്നതിനെക്കുറിച്ച് ജീവനക്കാര്ക്കും വിദ്യാര്ത്ഥികള്ക്കും മുന്കൂട്ടി ധാരണ നല്കണം.
ശുചിത്വം: ടെറസുകളിലും പരിസരങ്ങളിലും പ്ലാസ്റ്റിക് മാലിന്യങ്ങളും ഉണങ്ങിയ അവശിഷ്ടങ്ങളും കൂട്ടിയിടരുത്.
ചിലപ്പതികാരത്തിലെ കണ്ണകിയുടെ ചരിത്രം പറയുന്ന അഞ്ചുനാടന് ഗ്രാമങ്ങളുടെ പാരമ്പര്യം പേറുന്ന ഈ കലാലയം വലിയൊരു ചാരക്കൂമ്പാരമാകാന് മിനിറ്റുകള് മതിയായിരുന്നു. എന്നാല്, അധ്യാപകരുടെയും വിദ്യാര്ത്ഥികളുടെയും ആത്മധൈര്യം ഒരു നാടിനെ കണ്ണീരില്നിന്ന് രക്ഷിച്ചു. ഈ ചൂടുകാലത്ത് ഓരോ സ്ഥാപന മേധാവിയും ഈ കഥ ഒരു പാഠമായി ഉള്ക്കൊള്ളേണ്ടതുണ്ട്. വേനല് കടുക്കുമ്പോള് ജാഗ്രത മാത്രമാണ് ഏക പോംവഴി.
Staff and students of Anjunadu College of Applied Science in Marayoor heroically battled a massive forest fire that threatened to engulf the campus. Their swift action, including disconnecting power and using college water reserves, saved nearly 150 lives and protected the building from being gutted. This incident serves as a crucial lesson in disaster management and preparedness for institutions located near forest areas during the summer