പാലക്കാട്ട് ആനയെ ലോറിയിൽനിന്ന് ഇറക്കുന്നതിനിടെ അപകടം; പാപ്പാന് ദാരുണാന്ത്യം

പാലക്കാട്: മേലാർകോട് ആനയെ ലോറിയില്‍നിന്ന് ഇറക്കുന്നതിനിടെ പാപ്പാന് ദാരുണാന്ത്യം. ചാത്തപുരം ബാബു എന്ന ആനയുടെ ഒന്നാം പാപ്പാൻ കുനിശേരി ദേവനാണ് (58) മരിച്ചത്. താഴേക്കോട്ടുകാവിൽ വേലമഹോത്സവത്തിന് എഴുന്നൊള്ളിപ്പിനായി കൊണ്ടുവന്ന ആനയെ ഇറക്കുന്നതിനിടെ ലോറിയുടെ ഇരുമ്പു ബാറിനും ആനയ്ക്കുമിടയിൽ കുടുങ്ങി മരണപ്പെടുകയായിരുന്നു.

ബുധനാഴ്ച വൈകിട്ട് നാലുമണിയോടെയാണ് അപകടം സംഭവിച്ചത്. ആനയെ ഇറക്കുന്നതിനായി ദേവൻ മുന്നിലെത്തി പുറത്തേക്ക് തള്ളിയപ്പോൾ ആന മുന്നോട്ട് നീങ്ങുകയായിരുന്നു. ഇതോടെ ഇരുമ്പു ബാറിനും ആനയ്ക്കുമിടയിൽ കുടുങ്ങിയ ദേവന് ​ഗുരുതരമായി പരിക്കേറ്റു. ഉടനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.