തൃശ്ശൂര്: ഹോട്ടലില് ജോലി വാഗ്ദാനം ചെയ്ത് യുവതിയെ ലംഗികമായി പീഡിപ്പിക്കുകയും നഗ്നചിത്രങ്ങളും വീഡിയോയും പകര്ത്തുകയും ചെയ്ത കേസില് പ്രതി അറസ്റ്റില്. ആലപ്പുഴ തുറവൂര് കളത്തില്വീട്ടില് വിഷ്ണു ശ്രീകുമാറാണ്(28) തൃശൂര് വെസ്റ്റ് പോലീസിന്റെ പിടിയിലായത്.
ഇയാള് സംസ്ഥാനത്തിന്റെ വിവിധഭാഗങ്ങളിലെ വാഹനം മോഷണം, വീട് കുത്തിത്തുറന്ന് മോഷണം എന്നീ കേസുകളിലും പ്രതിയാണെന്ന് പോലീസ് പറഞ്ഞു. തൃശ്ശൂരിലെ ഹോട്ടലില് മുറിയെടുത്ത പ്രതി ജോലി ശരിയാക്കി നല്കാമെന്നു പറഞ്ഞ് ഇന്റര്വ്യൂ നടത്താനെന്ന വ്യാജേന യുവതിയെ വിളിച്ചുവരുത്തുകയായിരുന്നു.
തുടര്ന്ന് യുവതിയെ കത്തികാട്ടി ഭീഷണിപ്പെടുത്തി മുറിയില് കെട്ടിയിട്ട് പീഡിപ്പിച്ചു. നഗ്നചിത്രങ്ങളും വീഡിയോകളും പകര്ത്തുകയും സംഭവം പുറത്തു പറഞ്ഞാല് ദൃശ്യങ്ങള് സാമൂഹികമാധ്യമങ്ങളില് പ്രചരിപ്പിക്കുമെന്നും കുടുംബത്തെ വകവരുത്തുമെന്നും ഇയാള് ഭീഷണിപ്പെടുത്തി.
ഇതിനിടെ, സംഭവമറിഞ്ഞ യുവതിയുടെ ബന്ധുക്കള് ഇയാളെ ഓട്ടോറിക്ഷയില് കയറ്റിക്കൊണ്ടുപോയി അരണാട്ടുകരഭാഗത്ത് ചണ്ടിപ്പുലി പാടത്ത് ഒഴിഞ്ഞ സ്ഥലത്തുവെച്ച് മര്ദ്ദിച്ചു. വിവരമറിഞ്ഞെത്തിയ പോലീസ് വിഷ്ണുവിനെ പിടികൂടുകയും മര്ദ്ദിച്ച ഏഴുപേരെ കസ്റ്റഡിയിലെടുക്കുകയും ചെയ്തു.