സംസ്ഥാനത്ത് രൂപമെടുക്കുന്നത് അതിശക്തമായ ന്യൂനമര്‍ദ്ദം, ചുഴലിക്കാറ്റിന് സാധ്യത; മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രം

തിരുവനന്തപുരം: സംസ്ഥാനത്ത് കൊറോണ പ്രതിസന്ധിക്കു പിന്നാലെ ന്യൂനമര്‍ദ്ദവും കൂടി വരുന്നതായി റിപ്പോര്‍ട്ട്. അതിശക്തമായ ന്യൂനമര്‍ദ്ദമാണ് രൂപമെടുക്കുന്നതെന്ന് കാലാവസ്ഥാനിരീക്ഷണ കേന്ദ്രത്തിന്റെ മുന്നറിയിപ്പ്. ചുഴലിക്കാറ്റിന് സാധ്യതയുണ്ടെന്നും മുന്നറിയിപ്പില്‍ പറയുന്നു.

വേനല്‍മഴ തുടരുന്നതിനിടെയാണ് ബംഗാള്‍ ഉള്‍ക്കടലില്‍ ഈ ആഴ്ച അവസാനത്തോടെ ആദ്യ ന്യൂനമര്‍ദം എത്തുന്നത്. ഇത് മേയ് ആദ്യവാരത്തോടെ ചുഴലിക്കാറ്റായി മാറിയേക്കാം. ഇതിന്റെ ഫലമായി തെക്കന്‍ കേരളത്തില്‍ ശക്തമായ മഴ ഉണ്ടാകും.

കൂടാതെ, ദക്ഷിണ കേരളത്തിലും തമിഴ്നാട്ടിലും ശ്രീലങ്കയിലും ഈ വര്‍ഷം പതിവിലും കൂടുതല്‍ കാലവര്‍ഷം ലഭിക്കാനുള്ള സാധ്യതയുണ്ടെന്നും കാലാവസ്ഥാ സംഘടനയായ സൗത്ത് ഏഷ്യന്‍ ക്ലൈമറ്റ് ഫോറത്തിന്റെ (സാസ്‌കോഫ്) പഠനത്തില്‍ വിലയിരുത്തുന്നു.