കണ്ണൂർ: അത്തായക്കുന്നിൽ കണ്ണൂർ ടൗൺ എസ്ഐയെയും കൂടെയുണ്ടായിരുന്ന പോലീസുകാരെയും ക്ലബ്ബിൽ പൂട്ടിയിട്ട് ആക്രമിച്ചു. പട്രോളിങ്ങിനിടെ ക്ലബ്ബിൽ വെച്ച് മദ്യപിക്കുന്നത് കണ്ട് പോലീസ് ക്ലബ്ബിൽ കയറിയപ്പോൾ പുറത്തുനിന്ന് വാതിൽ പൂട്ടി അകത്തുണ്ടായിരുന്ന ഏഴുപേർ മർദിക്കുകയായിരുന്നു.
ടൗൺ എസ്ഐ സിഎച്ച് നജീബിൻ്റെ തോളിനാണ് പരിക്കേറ്റത്. സിവിൽ പോലീസ് ഓഫീസർ അനീഷിനും പരിക്കുണ്ട്. സംഭവവുമായി ബന്ധപ്പെട്ട് മൂന്നുപേരെ കണ്ണൂർ ടൗൺ പോലീസ് കസ്റ്റഡിയിലെടുത്തിട്ടുണ്ട്. പരിക്കേറ്റ പോലീസുകാർ കണ്ണൂർ ജില്ലാ ആശുപത്രിയിൽ ചികിത്സ തേടിയിട്ടുണ്ട്. സംഭവത്തിൽ കണ്ണൂർ ടൗൺ പോലീസ് കേസെടുത്തു.
മയക്കുമരുന്ന് മാഫിയകളെയും ഗുണ്ടകളെയും അമർച്ച ചെയ്യുന്നതിന് കണ്ണൂർ സിറ്റി പോലീസ് കമ്മിഷണർ ആർ അജിത് കുമാറിന്റെ നിർദേശപ്രകാരം പോലീസ് രാത്രികാല പട്രോളിങ് ശക്തമാക്കിയിട്ടുണ്ട്. സ്വാതന്ത്ര്യദിനാഘോഷത്തിനു മുന്നോടിയായി പലയിടങ്ങളിലും പരിശോധനയും നടക്കുന്നുണ്ട്. ഇതിനിടെയാണ് പോലീസ് സംഘം ആക്രമിക്കപ്പെടുന്നത്.
പോലീസിന്റെ ഔദ്യോഗിക കൃത്യനിർവഹണം തടസപ്പെടുത്തുകയും ആക്രമിക്കുകയും ചെയ്ത കേസിലെ മുഴുവൻ പ്രതികളെയും ഉടൻ പിടികൂടുമെന്ന് കണ്ണൂർ ടൗൺ പോലീസ് ഇൻസ്പെക്ടർ വിനുമോഹൻ അറിയിച്ചു.