വടകര: ലോക്സഭാ മണ്ഡലത്തില് യുഡിഎഫിനെതിരെ പരാതിയുമായി എല്ഡിഎഫ്. സ്ഥാനാര്ഥി കെ.കെ.ശൈലജയെ വ്യക്തിപരമായി അപകീര്ത്തിപ്പെടുത്തുന്ന തരത്തിലാണു പ്രചാരണമെന്ന പരാതിയുമായി എല്ഡിഎഫ് തിരഞ്ഞെടുപ്പ് കമ്മിഷനെ സമീപിച്ചു.
കോവിഡ് കാലത്തെ പര്ച്ചേസുമായി ബന്ധപ്പെട്ടു നുണപ്രചാരണം നടക്കുന്നതായി ശൈലജ നേരത്തേ ആക്ഷേപം ഉന്നയിച്ചിരുന്നു. എന്നാല് ഇടതുമുന്നണിയുടെ പരാതിയില് ശൈലജയ്ക്കെതിരെ സമൂഹമാധ്യമങ്ങളില് അപകീര്ത്തികരമായ പ്രചാരണം നടക്കുന്നതായാണു പറയുന്നത്. സ്ത്രീയെന്ന പരിഗണന പോലുമില്ലാതെയാണ് അധിക്ഷേപമെന്നും എല്ഡിഎഫ് ആരോപിച്ചു.
”ചിത്രങ്ങള് മോര്ഫ് ചെയ്തു പ്രചരിപ്പിക്കുകയാണ്. ശൈലജയെയും മുഖ്യമന്ത്രി പിണറായി വിജയനെയും വ്യക്തിപരമായി അപമാനിച്ചുകൊണ്ട് മോര്ഫ് ചെയ്ത ചിത്രങ്ങള് സമൂഹമാധ്യമങ്ങളിലൂടെ പ്രചരിപ്പിക്കുന്നു. സംസ്കാരശൂന്യവും പൊതുസമൂഹത്തില് അപകീര്ത്തിപ്പെടുന്നതുമായ നിരവധി പോസ്റ്റുകള് സാമൂഹ്യമാധ്യമങ്ങളില് വന്നിട്ടുണ്ട്.
യുഡിഎഫ് സ്ഥാനാര്ഥി ഷാഫി പറമ്പിലിന്റെ അറിവോടെയാണിത്. അദ്ദേഹം ഇതിനു കൂട്ടുനില്ക്കുന്നു”- പരാതിയില് പറയുന്നു. മുഖ്യമന്ത്രി, പൊലീസ് മേധാവി, ഐജി, കലക്ടര് എന്നിവര്ക്കും പരാതി കൈമാറി.