കൊച്ചി: മലയാള സിനിമയിലും മിനിസ്ക്രീനിലും ഒരുപോലെ തിളങ്ങിനില്ക്കുന്ന നടിയാണ് ലക്ഷ്മിപ്രിയ. ബിഗ് ബോസ് സീസണ് 4-ലെ കരുത്തുറ്റ പ്രകടനത്തിലൂടെ കുടുംബപ്രേക്ഷകര്ക്കും ഏറെ പ്രിയങ്കരിയായ താരം, തന്റെ നിലപാടുകള് തുറന്നുപറയുന്നതിലും മടി കാണിക്കാറില്ല. തന്റെ പതിനെട്ടാം വയസ്സുവരെ മുസ്ലീം മതവിശ്വാസിയായിരുന്ന താരം, പിന്നീട് മതം മാറി ഹിന്ദു ആവുകയായിരുന്നു.
മുസ്ലീമായിരുന്നെങ്കിലും ആ മതത്തിന്റെ രീതികള്ക്കൊന്നും വഴങ്ങി ജീവിച്ചിട്ടില്ലെന്നാണ് ലക്ഷ്മിപ്രിയ ഒരു അഭിമുഖത്തില് വ്യക്തമാക്കുന്നത്. താന് ഇതുവരെ ഖുര്ആന് വായിച്ചിട്ടില്ലെന്നും അറബി അക്ഷരങ്ങള് ജിലേബി പോലെയാണ് തനിക്ക് തോന്നാറുള്ളതെന്നും താരം പറഞ്ഞു. മതം മാറിയപ്പോള് മുഷിഞ്ഞ വസ്ത്രം മാറ്റി പുതിയ വസ്ത്രം ധരിച്ച അനുഭവമായിരുന്നു തനിക്കെന്നും ലക്ഷ്മി പ്രിയ കൂട്ടിച്ചേര്ത്തു.
തന്റെ പൂര്വ്വികര് പുരോഗമന ചിന്താഗതിക്കാരായ മുസ്ലീംങ്ങളായിരുന്നെങ്കിലും ഹിന്ദു വിശ്വാസങ്ങളുമായി വലിയ ബന്ധം തറവാടിനുണ്ടായിരുന്നു. അച്ഛന്റെ മുത്തച്ഛനൊക്കെ ഹരിപ്പാട് കൊട്ടാരത്തിലായിരുന്നു ജോലി ചെയ്തിരുന്നത്. മണ്ണാറശ്ശാല നാഗദൈവങ്ങളെയും ചെട്ടികുളങ്ങര അമ്മയെയും തങ്ങള് പരദേവതയെ പോലെയാണ് കണ്ടിരുന്നതെന്നും അതുകൊണ്ട് തന്നെ ഹൈന്ദവ വിശ്വാസം ഉള്ളിലുണ്ടായിരുന്നുവെന്നും താരം പറയുന്നു.
വിവാഹത്തിന് മുന്പ് തന്നെ താന് മതം മാറിയിരുന്നുവെന്നും ഭര്ത്താവ് സംഘിയായതുകൊണ്ടാണ് താന് മതം മാറിയതെന്നുമുള്ള സോഷ്യല് മീഡിയ പ്രചരണങ്ങള് തെറ്റാണെന്നും ലക്ഷ്മിപ്രിയ വ്യക്തമാക്കി. താന് ഹിന്ദു ആചാരങ്ങള് പാലിക്കുന്നതിലാണ് സന്തോഷം കണ്ടെത്തുന്നത്. തന്റെ മകളും അച്ഛന്റെ കള്ച്ചര് പിന്തുടരണമെന്നാണ് ആഗ്രഹമെന്നും അതിനാല് കുട്ടിയെയും ആ രീതിയിലാണ് വളര്ത്തുന്നതെന്നും ലക്ഷ്മി പറയുന്നു.
സിനിമയ്ക്ക് പുറമെ സിനിമാ സംഘടനയായ ‘അമ്മ’യുടെ (AMMA) പ്രവര്ത്തനങ്ങളിലും ലക്ഷ്മിപ്രിയ ഇപ്പോള് സജീവമാണ്. 2025 ഓഗസ്റ്റില് നടന്ന തിരഞ്ഞെടുപ്പില് സംഘടനയുടെ വൈസ് പ്രസിഡന്റായി ലക്ഷ്മിപ്രിയ തിരഞ്ഞെടുക്കപ്പെട്ടിരുന്നു. നടിയെ ആക്രമിച്ച കേസില് നടന് ദിലീപിനെ കോടതി കുറ്റവിമുക്തനാക്കിയപ്പോള്, ദിലീപിനൊപ്പം നിന്നുകൊണ്ട് പരസ്യമായി പ്രതികരിച്ചതും വലിയ വാര്ത്തയായിരുന്നു.
അടുത്തിടെ തന്റെ വ്യക്തിജീവിതവുമായി ബന്ധപ്പെട്ട് ചില വൈകാരികമായ കുറിപ്പുകള് ലക്ഷ്മിപ്രിയ പങ്കുവെച്ചത് ആരാധകര്ക്കിടയില് വലിയ ചര്ച്ചയായിരുന്നു. ഭര്ത്താവ് ജയേഷുമായി വേര്പിരിയുകയാണെന്ന തരത്തിലുള്ള സൂചനകള് നല്കുന്ന ഒരു ഫേസ്ബുക്ക് പോസ്റ്റ് താരം പങ്കുവെച്ചെങ്കിലും പിന്നീട് അത് പിന്വലിക്കുകയായിരുന്നു. എല്ലാം തന്റെ തെറ്റാണെന്നും വേര്പിരിയേണ്ട സമയമായെന്നും അന്ന് താരം കുറിച്ചിരുന്നു.
എങ്കിലും മാസങ്ങള്ക്ക് ശേഷം ഭര്ത്താവിനും മകള്ക്കുമൊപ്പമുള്ള പുതിയ ഫാമിലി സെല്ഫികള് പങ്കുവെച്ചുകൊണ്ട് തങ്ങള്ക്കിടയിലെ പ്രശ്നങ്ങള് പരിഹരിച്ചതായി താരം സൂചന നല്കി. നിലവില് മിനിസ്ക്രീനിലെ റിയാലിറ്റി ഷോകളിലും മറ്റ് സാമൂഹിക പ്രവര്ത്തനങ്ങളിലും സജീവമായ ലക്ഷ്മിപ്രിയ, തന്റെ നിലപാടുകളില് ഉറച്ചുനിന്നുകൊണ്ട് അഭിനയരംഗത്ത് മുന്നോട്ട് പോവുകയാണ്.