ലഖിംപുര്‍ കൂട്ടക്കുരുതിയില്‍ സുപ്രീം കോടതി സ്വമേധയാ കേസെടുത്തു

ന്യൂഡൽഹി: ലഖിംപുർ കൂട്ടക്കുരുതിയിൽ സുപ്രീം കോടതി സ്വമേധയാ കേസെടുത്തു. നാളെ ചീഫ് ജസ്റ്റിസ് അധ്യക്ഷനായ ബെഞ്ച് കേസ് പരിഗണിക്കും. ചീഫ് ജസ്റ്റിസിന് പുറമെ ജസ്റ്റിസ് സൂര്യകാന്ത്, ജസ്റ്റിസ് ഹിമ കോഹ്ലി എന്നിവരടങ്ങുന്ന ബെഞ്ചാണ് കേസ് പരിഗണിക്കുന്നത്.

ആരോപണ വിധേയൻ കേന്ദ്ര ആഭ്യന്തര സഹമന്ത്രിയുടെ മകനായതിനാൽ കേസ് ഉത്തർപ്രദേശ് പോലീസ് അന്വേഷിച്ചാൽ സത്യം പുറത്തുവരില്ലെന്ന് ചൂണ്ടിക്കാട്ടി ഉത്തർപ്രദേശിൽ നിന്നുള്ള രണ്ട് അഭിഭാഷകർ സുപ്രീം കോടതി ചീഫ് ജസ്റ്റിസിന് കത്തയച്ചിരുന്നു. കോടതി മേൽനോട്ടത്തിലുള്ള സി.ബി.ഐ അന്വേഷണമാണ് ഇക്കാര്യത്തിൽ ആവശ്യമെന്നും ഇവർ വ്യക്തമാക്കിയിരുന്നു. ഈ കത്തിന്റെകൂടെ അടിസ്ഥാനത്തിലാണ് കോടതിയുടെ നടപടി.

ഉത്തർപ്രദേശ് സർക്കാരിന്റെയും കേന്ദ്ര സർക്കാരിന്റെയും വാദം കോടതി പരിഗണിക്കും. ഇതിനായി സർക്കാരുകൾക്ക് നോട്ടീസ് അയക്കാനും സാധ്യതയുണ്ട്.