തിരുവനന്തപുരം: കോവിഡ് മൂലം മരണമടഞ്ഞ പട്ടികജാതിയില്പ്പെട്ടവരുടെ ആശ്രിതര്ക്കായി കേരള സംസ്ഥാന പട്ടികജാതി പട്ടികവര്ഗ്ഗ വികസന കോര്പ്പറേഷന് നടപ്പാക്കുന്ന പ്രത്യേക വായ്പാ പദ്ധതിയില് അര്ഹരായ പട്ടികജാതിയില്പ്പെട്ടവരില് നിന്നും അപേക്ഷ ക്ഷണിച്ചു. പ്രധാന വരുമാനദായകന്റെ മരണം മൂലം ഉപജീവനമാര്ഗ്ഗം അടഞ്ഞ കുടുംബങ്ങളുടെ പുനര്ജ്ജീവനത്തിനായി കേന്ദ്ര സാമൂഹിക നീതി ശാക്തീകരണ മന്ത്രാലയത്തിന്റെ ആഭിമുഖ്യത്തിലാണ് പദ്ധതിക്ക് രൂപം നല്കിയത്.
മരണപ്പെട്ട ആളുടെ തൊട്ടടുത്ത ആശ്രിതന് പദ്ധതിയില് വായ്പയ്ക്ക് അപേക്ഷിക്കാം. പരമാവധി അഞ്ചു ലക്ഷം രൂപ വരെ മുതല്മുടക്ക് ആവശ്യമുള്ള സ്വയംതൊഴില് സംരംഭങ്ങള് ആരംഭിക്കുന്നതിന് നല്കുന്ന വായ്പയുടെ 20 ശതമാനം സബ്സിഡിയായി കണക്കാക്കും. വായ്പയുടെ പലിശ നിരക്ക് ആറു ശതമാനം ആയിരിക്കും. മരിച്ച വ്യക്തിയുടെ പ്രായം 18 നും 60 വയസ്സിനുമിടയിലായിരിക്കണം.
അപേക്ഷകന്റെ കുടുംബ വാര്ഷിക വരുമാനം മൂന്ന് ലക്ഷം രൂപയിൽ അധികമാക്കരുത്. പ്രധാന വരുമാനദായകന് മരിച്ചത് കോവിഡ് മൂലമാണ് എന്ന് തെളിയിക്കുന്നതിനാവശ്യമായ ആധികാരികമായ രേഖ ഹാജരാക്കണം. ഇതങ്ങോടൊപ്പം കോര്പ്പറേഷന്റെ നിലവിലെ മറ്റു വായ്പാ നിബന്ധനകള് പാലിക്കുന്നതിനും അപേക്ഷകര് ബാധ്യസ്ഥനായിരിക്കും. താല്പ്പര്യമുള്ളവര് നിശ്ചിത വിവരങ്ങള് സഹിതം കോര്പ്പറേഷന്റെ അതാത് ജില്ലാ ഓഫീസില് അപേക്ഷ സമര്പ്പിക്കണം.