കോഴിക്കോട്: പോക്സോ കേസില് നടനും ടെലിവിഷന് അവതാരകനുമായ കൂട്ടിക്കല് ജയചന്ദ്രന് പൊലീസിന് മുമ്പാകെ ഹാജരായി. കോഴിക്കോട് കസബ പൊലീസ് സ്റ്റേഷനിലാണ് നടന് കൂട്ടിക്കല് ജയചന്ദ്രന് ഹാജരായത്. പൊലീസ് ജയചന്ദ്രനെ ചോദ്യം ചെയ്യുകയാണ്. നേരത്തെ കേസില് കൂട്ടിക്കല് ജയചന്ദ്രന്റെ അറസ്റ്റ് സുപ്രീം കോടതി തടഞ്ഞിരുന്നു. മുന്കൂര് ജാമ്യ ഹര്ജി തീര്പ്പാക്കുന്നത് വരെ അറസ്റ്റ് പാടില്ലെന്ന് നിര്ദേശിച്ച് സുപ്രീം കോടതി സംസ്ഥാന സര്ക്കാരിന് നോട്ടീസ് അയച്ചിരുന്നു. അന്വേഷണവുമായി സഹകരിക്കാമെന്നും നടന് കോടതിയെ അറിയിച്ചിരുന്നു. തുടര്ന്നാണിപ്പോള് നടന് പൊലീസ് സ്റ്റേഷനില് ഹാജരായത്.
നടന്റെ വാദം അംഗീകരിച്ചാണ് സുപ്രീം കോടതി ജസ്റ്റിസ് ബിവി നാഗരത്ന അധ്യക്ഷനായ ബെഞ്ച് അറസ്റ്റ് തടഞ്ഞുകൊണ്ട് ഉത്തരവിട്ടത്. ഹര്ജി അടുത്ത മാസം 28ലേക്ക് മാറ്റിവെക്കുകയും ചെയ്തിരുന്നു. പോക്സോ കേസ് നിയമം ദുരുപയോഗം ചെയ്തുള്ള കേസാണിതെന്നാണ് നടന്റെ അഭിഭാഷകരായ ആര് ബസന്ത്, എ കാര്ത്തിക് എന്നിവര് വാദിച്ചത്.
ഹൈക്കോടതിയില് നടന് മുന്കൂര് ജാമ്യാപേക്ഷ നല്കിയിരുന്നെങ്കിലും തള്ളുകയായിരുന്നു. തുടര്ന്നാണ് നടന് സുപ്രീം കോടതിയെ സമീപിച്ചത്. കഴിഞ്ഞ വര്ഷം ജൂണിലാണ് കേസ് രജിസ്റ്റര് ചെയ്തത്. കേസ് രജിസ്റ്റര് ചെയ്തെങ്കിലും നടനെ പൊലീസ് അറസ്റ്റ് ചെയ്തിരുന്നില്ല. ഗുരുതരമായ കേസാണെന്നും ജാമ്യം നല്കരുതെന്നുമുളള സര്ക്കാര് വാദം അംഗീകരിച്ചായിരുന്നു ഹൈക്കോടതി ജാമ്യ ഹര്ജി തള്ളികൊണ്ട് ഉത്തരവിട്ടത്.
നാലു വയസുകാരിയെ പീഡിപ്പിച്ചുവെന്ന പരാതിയിലാണ് നടനെതിരെ പൊലീസ് കേസെടുത്തത്. കേസില് കുട്ടിയില് നിന്ന് പൊലീസ് മൂന്നുതവണ മൊഴിയെടുത്തിരുന്നു. കഴിഞ്ഞ ജൂണ് എട്ടിനാണ് നഗരപരിധിയിലെ ഒരു വീട്ടില് നടന് കൂട്ടിക്കല് ജയചന്ദ്രന് നാലു വയസുകാരിയെ ഉപദ്രവിച്ചെന്ന പരാതിയില് പൊലീസ് പോക്സോ കേസെടുത്തത്.