കൊച്ചി: കൊങ്കൺ പാതയിലൂടെ സർവീസ് നടത്തുന്ന തീവണ്ടികളുടെ സമയക്രമത്തിൽ ജൂൺ 15 മുതൽ വലിയ മാറ്റം വരുന്നു. കനത്ത കാലവർഷത്തെ തുടർന്ന് സുരക്ഷ മുൻനിർത്തി ഏർപ്പെടുത്തുന്ന മൺസൂൺ ടൈംടേബിൾ പ്രകാരം 38 ജോഡി ട്രെയിനുകളുടെ സമയത്തിലാണ് മാറ്റമുണ്ടാകുക. ഒക്ടോബർ 20 വരെയുള്ള നോൺ മൺസൂൺ ടൈംടേബിൾ അവസാനിക്കുന്നതോടെയാണിത്.
മംഗള എക്സ്പ്രസ് ഉൾപ്പെടെ 37 വണ്ടികളുടെയും പ്രധാന സ്റ്റേഷനുകളിൽ നിന്ന് പുറപ്പെടുന്ന സമയത്തിൽ മാറ്റമുണ്ട്. എന്നാൽ നേത്രാവതി എക്സ്പ്രസ് തിരുവനന്തപുരത്തുനിന്ന് പുറപ്പെടുന്ന നിലവിലെ സമയത്തിൽ (രാവിലെ 9.15) മാറ്റമുണ്ടാകില്ല. എങ്കിലും ഈ വണ്ടി തുടർ സ്റ്റേഷനുകളിൽ നിശ്ചിത സമയത്തിലും നേരത്തേയെത്തും.
കേരളത്തിൽ നിന്നുള്ള വണ്ടികൾ നേരത്തേ പുറപ്പെടും
മൺസൂൺ സമയക്രമം നിലവിൽ വരുന്നതോടെ കേരളത്തിൽ നിന്ന് കൊങ്കൺ പാതയിലൂടെ പോകുന്ന വണ്ടികളുടെ സമയം സാധാരണയേക്കാൾ വളരെ നേരത്തേയാകും. അതേസമയം, കൊങ്കൺ മേഖലയിൽ നിന്ന് കേരളത്തിലേക്ക് വരുന്ന തീവണ്ടികൾ നിലവിലുള്ള സമയത്തേക്കാൾ വൈകിയായിരിക്കും ഓടുക. കനത്ത മഴയുള്ള വെല്ലുവിളി നിറഞ്ഞ കാലാവസ്ഥയിൽ പാതയിലെ സുരക്ഷ ഉറപ്പാക്കുന്നതിനാണ് ഈ കാലയളവിൽ ട്രെയിനുകളുടെ വേഗത ക്രമീകരിക്കുന്നത്. നിലവിൽ മണിക്കൂറിൽ 110-120 കിലോമീറ്റർ വേഗതയിലാണ് ഈ പാതയിൽ ട്രെയിനുകൾ ഓടുന്നത്. എന്നാൽ മൺസൂൺ ടൈംടേബിൾ പ്രാബല്യത്തിൽ വരുന്നതോടെ ഇത് മണിക്കൂറിൽ 40-75 കിലോമീറ്ററായി കുറയ്ക്കും.
എറണാകുളത്തുനിന്ന് നിസാമുദ്ദീനിലേക്കുള്ള മംഗള എക്സ്പ്രസ് (12617) ജൂൺ 15 മുതൽ രാവിലെ 10.10-ന് എറണാകുളം ജങ്ഷനിൽനിന്ന് പുറപ്പെടും. നിലവിൽ ഉച്ചയ്ക്ക് 1.25-നാണ് ഈ ട്രെയിൻ പുറപ്പെടാറുള്ളത്.
പ്രധാന വണ്ടികളുടെ പുതിയ മൺസൂൺ സമയം (ബ്രാക്കറ്റിൽ നിലവിലെ സമയം)
- എറണാകുളം-പുണെ എക്സ്പ്രസ് (22149): പുലർച്ചെ 2.15 (നിലവിൽ രാവിലെ 5.15).
- തിരുവനന്തപുരം-നിസാമുദ്ദീൻ രാജധാനി (12431): ഉച്ചയ്ക്ക് 2.40 (നിലവിൽ രാത്രി 7.15).
- മംഗളൂരു-മുംബൈ മത്സ്യഗന്ധ എക്സ്പ്രസ് (12620): ഉച്ചയ്ക്ക് 12.45 (നിലവിൽ ഉച്ചയ്ക്ക് 2.20).
- തിരുവനന്തപുരം നോർത്ത്-പോർബന്തർ എക്സ്പ്രസ് (20909): രാവിലെ 9.10 (നിലവിൽ രാവിലെ 11.15).
കാലവർഷ സമയത്ത് കൊങ്കൺ പാതയിലൂടെ യാത്ര ചെയ്യുന്നവർ ട്രെയിനുകളുടെ പുതുക്കിയ സമയവിവരങ്ങൾ കൃത്യമായി മനസ്സിലാക്കി യാത്ര പ്ലാൻ ചെയ്യണമെന്ന് റെയിൽവേ അധികൃതർ അറിയിച്ചു.
English Summary
The Konkan Railway will implement its monsoon timetable from June 15, changing the schedule of 38 pairs of trains to ensure safety during heavy rains. While Mangala Express will depart Ernakulam at 10:10 AM instead of 1:25 PM, Netravati Express will maintain its 9:15 AM departure from Thiruvananthapuram but run earlier at subsequent stations. Trains from Kerala will depart significantly earlier, while incoming trains from the Konkan route will run delayed due to speed restrictions, which will be reduced to 40-75 kmph from the usual 110-120 kmph. This monsoon schedule will remain active until October 20.