കൊച്ചി: മോഡലിങ്ങിന്റെ മറവിൽ വിദേശത്തേക്ക് യുവതികളെ കടത്തി പെൺവാണിഭത്തിനിരയാക്കുന്ന വൻ റാക്കറ്റിനെക്കുറിച്ചുള്ള ഞെട്ടിക്കുന്ന വിവരങ്ങൾ പുറത്ത്. കേസിൽ ഉൾപ്പെട്ട ഒരു യുവതിയെക്കൂടി മരട് പോലീസ് ഇപ്പോൾ കസ്റ്റഡിയിലെടുത്തിട്ടുണ്ട്. മലപ്പുറം പൊന്നാനിയിൽ നിന്നാണ് ഇവരെ പോലീസ് സംഘം പിടികൂടിയത്. കസ്റ്റഡിയിലെടുത്ത യുവതിയെ ഉടൻ തന്നെ മരട് പോലീസ് സ്റ്റേഷനിലെത്തിച്ച് വിശദമായി ചോദ്യം ചെയ്യുമെന്നും ഇതിലൂടെ റാക്കറ്റിലെ മറ്റ് പ്രധാനികളെക്കുറിച്ചുള്ള വിവരങ്ങൾ ലഭിക്കുമെന്നുമാണ് പോലീസ് പ്രതീക്ഷിക്കുന്നത്.
കേസുമായി ബന്ധപ്പെട്ട് കഴിഞ്ഞ ദിവസം രണ്ട് യുവതികളെ പോലീസ് അറസ്റ്റ് ചെയ്തിരുന്നു. തിരുവനന്തപുരം സ്വദേശിനിയായ സിന്ധു, മരടിലെ ഫ്ളാറ്റിൽ താമസിച്ചുവരുന്ന ആലുവ സ്വദേശിനി അലീന എന്നിവരാണ് കഴിഞ്ഞ ദിവസം പിടിയിലായത്. ഇവരെ ചോദ്യം ചെയ്തതിൽ നിന്നും, ഇരയായ പെൺകുട്ടി നൽകിയ മൊഴിയുടെയും അടിസ്ഥാനത്തിലാണ് അന്വേഷണം ഊർജിതമാക്കിയതും പൊന്നാനിയിൽ നിന്ന് അടുത്ത പ്രതിയെ വലയിലാക്കാൻ പോലീസിന് സാധിച്ചതും.
മോഡലിങ് രംഗത്ത് വൻ അവസരങ്ങൾ വാഗ്ദാനം ചെയ്താണ് പ്രതികൾ പെൺകുട്ടികളെ വലയിലാക്കുന്നത്. ഇത്തരത്തിൽ മോഡലിങ്ങിനെന്ന് വിശ്വസിപ്പിച്ച് പരാതിക്കാരിയായ പെൺകുട്ടിയെ പ്രതികൾ ദുബായിൽ എത്തിക്കുകയായിരുന്നു. എന്നാൽ വിദേശത്ത് എത്തിയതോടെ കാര്യങ്ങൾ മാറിമറിഞ്ഞു. പെൺകുട്ടിയെ നിർബന്ധപൂർവ്വം മയക്കുമരുന്ന് നൽകി ബോധരഹിതയാക്കുകയും, തുടർന്ന് നഗ്നചിത്രങ്ങൾ പകർത്തുകയുമായിരുന്നു പ്രതികളുടെ ആദ്യ ലക്ഷ്യം.
ഈ ദൃശ്യങ്ങൾ കാണിച്ച് പിന്നീട് നിരന്തരം ഭീഷണിപ്പെടുത്തി പെൺകുട്ടിയെ ലൈംഗിക പീഡനത്തിനായി പലർക്കും കാഴ്ചവെക്കുകയായിരുന്നുവെന്ന് പോലീസ് വ്യക്തമാക്കുന്നു. ഇത്തരത്തിൽ ക്രൂരമായ പീഡനത്തിന് ഇരയായ പെൺകുട്ടി നാട്ടിൽ തിരിച്ചെത്തിയ ശേഷമാണ് പോലീസിൽ പരാതി നൽകിയത്. ഈ പെൺകുട്ടിയെ കൂടാതെ നിരവധി യുവതികൾ ഈ സംഘത്തിന്റെ ചതിക്കുഴിയിൽ അകപ്പെട്ടിട്ടുണ്ടെന്നാണ് പോലീസിന് ലഭിക്കുന്ന സൂചന. സമാനമായ രീതിയിൽ വഞ്ചിക്കപ്പെട്ട മറ്റ് ചില പെൺകുട്ടികളുടെ പരാതികളും ഇപ്പോൾ പോലീസിന് ലഭിച്ചുതുടങ്ങിയിട്ടുണ്ട്.
അറസ്റ്റിലായ പ്രതികളിൽ ആലുവ സ്വദേശിനിയായ അലീന മുൻപും നിരവധി ക്രിമിനൽ കേസുകളിൽ ഉൾപ്പെട്ടിട്ടുള്ള വ്യക്തിയാണെന്ന് പോലീസ് അന്വേഷണത്തിൽ കണ്ടെത്തിയിട്ടുണ്ട്. കഴിഞ്ഞ നവംബർ മാസത്തിൽ കൊച്ചി വൈറ്റിലയിലെ പ്രമുഖ ബാറിൽ നടന്ന വലിയ സംഘർഷത്തിലും അലീന പ്രതിയായിരുന്നു. കൊച്ചി കേന്ദ്രീകരിച്ച് പ്രവർത്തിക്കുന്ന ഗുണ്ടാസംഘങ്ങളുമായി ഇവർക്ക് അടുത്ത ബന്ധമുണ്ടെന്നും, കേസിൽ കൂടുതൽ അറസ്റ്റുകൾ വരും ദിവസങ്ങളിൽ ഉണ്ടാകുമെന്നും മരട് പോലീസ് അറിയിച്ചു.
English Summary:
The Maradu Police have taken another woman into custody from Ponnani in connection with a major human trafficking and sex racket operating under the guise of modeling assignments. This follows the recent arrest of two women, Sindhu from Thiruvananthapuram and Aleena from Aluva. According to the police, the victim was lured to Dubai with promises of modeling opportunities, where she was drugged, photographed in an compromising state, and subsequently blackmailed into sexual exploitation. Police revealed that Aleena has a prior criminal record, including involvement in a bar brawl in Vyttila last November, and possesses close links with local gang elements. Investigation is underway as more victims have come forward with similar complaints.