തിരുവനന്തപുരം: യു.ഡി.എഫ്. മന്ത്രിസഭയുടെ സത്യപ്രതിജ്ഞയ്ക്ക് മുന്നോടിയായി കോൺഗ്രസിനുള്ളിൽ മന്ത്രിമാരെ നിശ്ചയിക്കുന്നതിനെച്ചൊല്ലിയുള്ള ചർച്ചകൾ സമവായത്തിലെത്താതെ നീളുന്നു. അവസാന നിമിഷത്തിലും തങ്ങളുടെ പ്രതിനിധികളെ മന്ത്രിസഭയിൽ ഉൾപ്പെടുത്താനായി ഐ ഗ്രൂപ്പ് (ചെന്നിത്തല പക്ഷം), എ ഗ്രൂപ്പ്, വി.ഡി. സതീശൻ പക്ഷം എന്നിവർ കടുത്ത സമ്മർദ്ദമാണ് ഹൈക്കമാൻഡിന് മേൽ ചെലുത്തുന്നത്. സ്പീക്കർ പദവി നൽകി തന്നെ മാറ്റിനിർത്താനുള്ള നീക്കത്തിനെതിരെ മുതിർന്ന നേതാവ് തിരുവഞ്ചൂർ രാധാകൃഷ്ണൻ ശക്തമായ വിയോജിപ്പ് രേഖപ്പെടുത്തി കഴിഞ്ഞു. തനിക്ക് സ്പീക്കർ പദവി വേണ്ടെന്നും മുൻകാല ഭരണപരിചയം കണക്കിലെടുത്ത് മന്ത്രിസ്ഥാനത്തേക്ക് തന്നെ പരിഗണിക്കണമെന്നുമാണ് തിരുവഞ്ചൂരിന്റെ കർശന നിലപാട്.
മന്ത്രിസഭയിലെ മുസ്ലിം പ്രതിനിധിയെ നിശ്ചയിക്കുന്നതിനെച്ചൊല്ലിയാണ് പാർട്ടിയിൽ ഇപ്പോൾ ഏറ്റവും വലിയ തർക്കം പുകയുന്നത്. വി.ഡി. സതീശൻ പക്ഷം ഷാനിമോൾ ഉസ്മാന്റെ പേര് മുന്നോട്ടുവെക്കുമ്പോൾ, ചെന്നിത്തല പക്ഷം അൻവർ സാദത്തിനായാണ് ശക്തമായി വാദിക്കുന്നത്. ഇവർക്കൊപ്പം വൈനാട് നിന്നുള്ള മുതിർന്ന നേതാവ് ടി. സിദ്ദിഖിന്റെ പേരും മുസ്ലിം പ്രാതിനിധ്യ പട്ടികയിലുണ്ട്. മലബാറിൽ നിന്നുള്ള കെ.പി.സി.സി. ഭാരവാഹികൾ സിദ്ദിഖിനെ മന്ത്രിയാക്കണമെന്ന ആവശ്യത്തിൽ ഉറച്ചുനിൽക്കുകയാണ്. ഈ മൂന്ന് പേരുകളിൽ ആരെ ഉൾപ്പെടുത്തണമെന്ന കാര്യത്തിൽ ഹൈക്കമാൻഡ് പ്രതിനിധികൾക്കും ഇതുവരെ അന്തിമ തീരുമാനത്തിലെത്താൻ സാധിച്ചിട്ടില്ല.
വയനാട്ടിൽ നിന്നുള്ള മറ്റൊരു എം.എൽ.എ.യായ ഐ.സി. ബാലകൃഷ്ണനെ മന്ത്രിയാക്കിയേ തീരൂ എന്ന കടുത്ത നിലപാടിലാണ് ചെന്നിത്തല പക്ഷം. സംസ്ഥാന മന്ത്രിസഭയിൽ പട്ടികവർഗ്ഗ (ST) വിഭാഗത്തിന് അർഹമായ പ്രാതിനിധ്യം ഉറപ്പാക്കണമെന്ന ശക്തമായ രാഷ്ട്രീയ വാദം ഉന്നയിച്ചാണ് ഇവർ സമ്മർദ്ദം ചെലുത്തുന്നത്. ഐ.സി. ബാലകൃഷ്ണൻ മന്ത്രിസഭയിലേക്ക് വരികയാണെങ്കിൽ വയനാട്ടിൽ നിന്ന് തന്നെയുള്ള ടി. സിദ്ദിഖിന് മന്ത്രിയാകാനുള്ള സാധ്യതകൾ പൂർണ്ണമായും മങ്ങും. ഒരേ മണ്ഡലത്തിൽ നിന്നോ ജില്ലയിൽ നിന്നോ രണ്ട് പേരെ ഒന്നിച്ച് മന്ത്രിസഭയിൽ ഉൾപ്പെടുത്താൻ സാധിക്കില്ലെന്നതാണ് സിദ്ദിഖിന് തിരിച്ചടിയാകുന്നത്.
വകുപ്പുകളെയും മന്ത്രിമാരെയും സംബന്ധിച്ച ഔദ്യോഗിക പട്ടിക തയ്യാറാകാത്തതിനാൽ, രാജ്ഭവനിൽ ഗവർണറെ കണ്ട് പട്ടിക കൈമാറുന്നതിനുള്ള സമയം നിയുക്ത മുഖ്യമന്ത്രി ഇതുവരെയും തേടിയിട്ടില്ല. ഞായറാഴ്ച വൈകീട്ട് മൂന്നരയ്ക്ക് ശേഷം മാത്രമേ ഹൈക്കമാൻഡിന്റെ അന്തിമ അനുമതിയോടെയുള്ള പട്ടിക ഗവർണർക്ക് കൈമാറാൻ സാധ്യതയുള്ളൂ. ഘടകകക്ഷികളായ മുസ്ലിം ലീഗ്, കേരള കോൺഗ്രസ് എന്നിവർ തങ്ങളുടെ മന്ത്രിമാരെ പ്രഖ്യാപിച്ചെങ്കിലും കോൺഗ്രസിലെ ഈ ഗ്രൂപ്പ് തർക്കങ്ങൾ പുതിയ സർക്കാരിന്റെ സത്യപ്രതിജ്ഞാ ചടങ്ങുകളുടെ മുന്നൊരുക്കങ്ങളെ ചെറിയ രീതിയിൽ ബാധിച്ചിട്ടുണ്ട്. വരും മണിക്കൂറുകളിൽ ഡൽഹിയിൽ നിന്നുള്ള കേന്ദ്ര നേതാക്കളുടെ അടിയന്തര ഇടപെടലിലൂടെ മാത്രമേ ഈ തർക്കങ്ങൾക്ക് പരിഹാരമാകൂ എന്നാണ് സൂചന.
Internal rifts continue to delay the finalization of the Congress party’s minister list for the upcoming UDF cabinet. Senior leader Thiruvanchoor Radhakrishnan has rejected the Speaker post, demanding a cabinet berth. Meanwhile, the VD Satheesan and Ramesh Chennithala factions are locked in a tight contest over communal and regional representation. While Satheesan’s camp backs Shanimol Usman, Chennithala’s camp pushes for Anwar Sadath and IC Balakrishnan, mounting pressure for ST representation, which in turn complicates T. Siddique’s ministerial prospects.