കൊച്ചി∙ കേരള ബ്ലാസ്റ്റേഴ്സിന്റെയും ഇന്ത്യയുടെയും മുന്നേറ്റനിര താരം സഹൽ അബ്ദുൽ സമദിന്റെ വിവാഹ നിശ്ചയം കഴിഞ്ഞു. ബാഡ്മിന്റൻ താരം റേസ ഫർഹത്താണു സഹലിന്റെ ജീവിതപങ്കാളിയാകുക. ‘എന്റെ ജീവിതപങ്കാളിയെ കണ്ടെത്തിക്കഴിഞ്ഞു. കാര്യങ്ങൾ ഞങ്ങൾ ഔദ്യോഗികമാക്കുകയും ചെയ്തു’– വിവാഹ നിശ്ചയ ചിത്രത്തോടൊപ്പം സഹൽ ഇൻസ്റ്റഗ്രാമിൽ കുറിച്ചു.
കണ്ണൂര് സ്വദേശിയായ സഹല് യുഎഇയിലെ (UAE) അല്ഐനിലാണ് ജനിച്ചത്. എട്ടാം വയസ്സില് അബുദാബിയിലെ അല്-ഇത്തിഹാദ് സ്പോര്ട്സ് അക്കാദമിയില് ഫുട്ബാള് കളിക്കാന് ആരംഭിച്ചു. കേരളത്തിലെത്തിയ ശേഷം കണ്ണൂര് യൂണിവേഴ്സിറ്റി തലത്തില് മികച്ച പ്രകടനങ്ങള് നടത്തിതുടങ്ങി.മികച്ച പ്രകടനങ്ങളെ തുടര്ന്ന് അണ്ടര് 21 കേരള ടീമിലെത്തിയ സഹല് സന്തോഷ് ട്രോഫി ടീമിലും ഇടം ലഭിച്ചു. സഹലിന്റെ മികവ് കണ്ടെത്തിയ ബ്ലാസ്റ്റേഴ്സ് ക്ലബിലെത്തിക്കുകയായിരുന്നു.
സമൂഹ മാധ്യമങ്ങളിലൂടെ ഒട്ടേറെ ആരാധകരാണ് ഇരുവർക്കും ആശംസകൾ അർപിക്കുന്നത്. കഴിഞ്ഞ ഐഎസ്എൽ സീസണിൽ ഫൈനലിൽ എത്തിയ കേരള ബ്ലാസ്റ്റേഴ്സിന്റെ സുപ്രധാന താരങ്ങളിൽ ഒരാളായിരുന്നു സഹൽ. ഫൈനലിൽ പെനൽറ്റി ഷൂട്ടൗട്ടിൽ ഹൈദരാബാദിനോടാണു ബ്ലാസ്റ്റേഴ്സ് കീഴടങ്ങിയത്. കഴിഞ്ഞ മാസം അഫ്ഗാനിസ്ഥാനെതിരെ നടന്ന എഎഫ്സി കപ്പ് യോഗ്യതാ റൗണ്ട് മത്സരത്തിൽ ഇന്ത്യയുടെ വിജയ ഗോൾ നേടിയതും സഹലാണ്.