ന്യൂഡല്ഹി: ഡല്ഹിയില് കൊവിഡ് ബാധിച്ച് മരണമടഞ്ഞവരുടെ കുട്ടികള്ക്ക് പ്രതിമാസം പെന്ഷനും സൗജന്യ വിദ്യാഭ്യാസവും പ്രഖ്യാപിച്ച് മുഖ്യമന്ത്രി അരവിന്ദ് കെജ്രിവാള്. കുട്ടികള്ക്ക് 25 വയസ് പൂര്ത്തിയാകുന്നതു വരെയാണ് പ്രതിമാസം 2,500 രൂപ വീതം നല്കുന്നത്. നേരത്തെ പ്രഖ്യാപിച്ച 50,000 രൂപയ്ക്ക് പുറമേയാണ് ഈ തുക.
ദരിദ്ര കുടുംബങ്ങളില് നിന്നുള്ള 72 ലക്ഷം പേര്ക്ക് ഈ മാസം 10 കിലോ സൗജന്യ റേഷന് നല്കുമെന്നും മുഖ്യമന്ത്രി പറഞ്ഞു. ഡല്ഹി സര്ക്കാരും കേന്ദ്രസര്ക്കാരും സംയുക്തമായാണ് ഈ റേഷന് നല്കുന്നത്. റേഷന് ലഭിക്കുന്നതിന് വരുമാന സര്ട്ടിഫിക്കറ്റ് സാക്ഷ്യപ്പെടുത്തേണ്ട ആവശ്യമില്ല.
ജനങ്ങളുടെ വേദന ഞങ്ങള് മനസിലാക്കുന്നു. മരിച്ചു പോയവരെ തിരികെ കൊണ്ടുവരാന് ഞങ്ങള്ക്ക് ഒന്നും ചെയ്യാന് സാധിക്കില്ല. എന്നാല് ഞങ്ങളുടെ കഴിവിന്റെ പരമാവധി ഉപയോഗിച്ച് ജനങ്ങളെ സാമ്പത്തികമായി പിന്തുണയ്ക്കുമെന്ന് കേജരിവാള് വ്യക്തമാക്കി.