കണ്ണൂര്: ക്ഷേത്രോത്സവത്തിന്റെ ഭാഗമായുള്ള കലശത്തില് സിപിഎം നേതാവ് പി ജയരാജന്റെ ചിത്രം ഉള്പ്പെടുത്തിയത് വിവാദത്തിലേക്ക് . ക്ഷേത്രോത്സവത്തില് ചെഗുവേരയുടെ ചിത്രത്തിനൊപ്പം പി ജയരാജന്റെ ചിത്രം ഉപയോഗിച്ചതിനെതിരെ കണ്ണൂര് ജില്ലാ സെക്രട്ടറി എംവി ജയരാജന് രംഗത്തെത്തുകയും ചെയ്തു.
കലശത്തില് പാര്ട്ടി നേതാക്കളുടെ ചിത്രവും ചിഹ്നവും ഉള്പ്പെടുത്തിയത് പാര്ട്ടി നിലപാടിന് വിരുദ്ധമാണെന്ന് എംവി ജയരാജന് പറഞ്ഞു. കലശങ്ങളും ഘോഷയാത്രകളുമൊക്കെ രാഷ്ട്രീയ ചിഹ്നങ്ങളോ രാഷ്ട്രീയ നേതാക്കളുടെ ചിത്രങ്ങളോ ഇല്ലാതെയാണ് നടക്കേണ്ടത്. വിശ്വാസത്തെ രാഷ്ട്രീയവത്കരിക്കാന് പാടില്ലെന്നും അദ്ദേഹം പറഞ്ഞു.
കതിരൂര് പുല്യോട്ടുംകാവ് ക്ഷേത്രോത്സവത്തിന്റെ ഭാഗമായുള്ള കലശത്തിലാണ് പി ജയരാജന്റെ ചിത്രം ഉള്പ്പെടുത്തിയത്. തെയ്യത്തിന്റെയും പാര്ട്ടി ചിഹ്നത്തിന്റെയും ഒപ്പമായിരുന്നു ജയരാജന്റെ ചിത്രം. ചെഗുവേരയുടെ ചിത്രവും കലശത്തില് ഉണ്ടായിരുന്നു.
പി ജയരാജന് സ്വയം മഹത്വത്കരിക്കുന്നെന്ന ആരോപണം സിപിഐഎം സംസ്ഥാന സമിതിയില് വിമര്ശനം ഉയര്ന്നിരുന്നു. സമൂഹമാധ്യമങ്ങളില് ജയരാജനെതിരെ വാഴ്ത്തിക്കൊണ്ടുള്ള പോസ്റ്റുകളും വീഡിയോകളും ഗാനങ്ങളും അക്കാലത്ത് പ്രചരിച്ചിരുന്നു.